3
Jesu nkʉlʉmba ʉkʉnkɨnda Moose
1 Po leelo, mwe baamyɨtʉ mwe biikemo, mwe mubɨlɨkɨliigwe na Kyala pamopeene na nuuswe, mummwinogonege fiijo Jesu, ʉntʉmigwa nʉ mpuuti ʉnkʉlʉmba ʉjʉ tukʉmmwitɨka. 2 Ʉmwene aalɨ ngolofu ʉkʉbomba syosa ɨsi Kyala aalɨnsʉngwile ʉkʉtɨ asibombe, bo ʉlwa Moose. “Moose aalɨ ngolofu ʉkʉbalongosya abandʉ boosa abaa nnyumba jaa Kyala.”*3:2 Bala kalata gwa Ɨmbalɨlo 12:7. 3 Ʉnjenga nyumba ikwɨmɨkigwa fiijo ʉkʉkɨnda ɨnyumba ɨjɨ ajɨjengile. Bʉbʉʉbo Jesu abagiisye ʉkwɨmɨkigwa fiijo ʉkʉnkɨnda Moose. 4 Namanga kʉkʉtɨ nyumba jɨlɨ nʉ mundʉ ʉjʉ aajɨjengile, looli Kyala jo ʉjʉ ikʉfipela fyosa.
5 “Moose aalɨ ngolofu ʉkʉbalongosya abandʉ boosa abaa nnyumba jaa Kyala,” bo ʉlwa mbombeli ʉngolofu. Ɨmbombo jaake kwalɨ ko kʉsisimɨkɨsya ɨsi Kyala ikwisa kʉsijoba piitaasi. 6 Looli Kɨlɨsiti jo Mwana ʉNgolofu, ʉgwa kʉlongosya abandʉ abaa nnyumba jaa Kyala. Na nuuswe tʉlɨ bandʉ baa nnyumba jaake, lɨnga tukwendelela ʉkwikasya nʉ kwijʉʉla ʉkʉʉmɨɨlɨla ndʉsʉʉbɨlo ʉlʉ tʉlɨ nalo.
Ʉkʉtʉʉsya ʉkwa bandʉ baa Kyala
7 Po namupɨlɨkɨsye ɨsi Mbepo Mwikemo ikʉjoba mwa Kalata ʉMwikemo, ʉkʉtɨ,
“Lɨɨlɨno, lɨnga mukʉpɨlɨka iisyʉ lya Kyala,
8 mulɨngajaga nɨ ndumbula ɨngafu,
bo ʉlwa biisʉkʉlʉ bɨɨnu.
Akabalɨlo kala, baakaanile ʉkʉlongosigwa na niine,
pabʉjo ʉbwa kʉʉngela ndʉngalangala.
9 Namanga ʉko baalɨɨngelile nʉ kʉmbɨma,
baasibwene ɨsi naababombiile kʉ fyɨnja amalongo mana.
10 Kʉnongwa ɨjo, naabakalaliile,
naatile, ‘Abandʉ aba bikʉsoba amasikʉ goosa,
abeene bakiigana ʉkʉsikonga ɨnjɨla syangʉ.’
11 Po ndɨnkʉkalala, ndɨnkʉlapa,
ndɨnkʉtɨ, ‘Abandʉ abo batikwisa kwingɨla sikʉ,
pabʉjo bwangʉ ʉbwa kʉtʉʉsya.’ ”†3:7-11 Bala kalata gwa Ɨsabʉli 95:7-11.
12 Baamyɨtʉ ndwitɨko, mujege maaso alɨngajapo najʉmo ʉgwa kʉja nɨ ndumbula ɨmbiibi ɨjaa kʉnkaana Kyala, na ɨjɨ jikwipaagʉla kwa Kyala ʉMʉʉmi. 13 Looli akabalɨlo koosa aka mukʉpɨlɨka iisyʉ ɨlɨ, “Lɨɨlɨno,” mwa Kalata ʉMwikemo, kʉkʉtɨ mundʉ ankasyege ʉnnine, ʉkʉtɨ mulɨngasyobigwa nʉ kʉgomokelako kʉ bʉtʉlanongwa, kangɨ mulɨngajaga nɨ ndumbula ɨngafu kwa Kyala. 14 Namanga tʉlɨ nʉ bʉlɨɨlanisi na Kɨlɨsiti, lɨnga tukwijʉʉla ʉkwitoteka ndwitɨko ʉlʉ twalɨ nalo, ʉkʉfuma kʉbwandɨlo mpaka kʉmmalɨɨkɨsyo. 15 Bo muno Kalata ʉMwikemo ikʉtɨ,
“Lɨɨlɨno, lɨnga mukʉpɨlɨka iisyʉ lya Kyala,
mulɨngajaga nɨ ndumbula ɨngafu,
bo ʉlwa biisʉkʉlʉ bɨɨnu.
Akabalɨlo kala, baakaanile ʉkʉlongosigwa na niine.”‡3:15 Bala kalata gwa Ɨsabʉli 95:7-8.
16 Baalɨ bo baani aba baalɨpɨliike iisyʉ lya Kyala nʉ kʉlɨkaana? Bʉle, bakaja bo bala boosa aba baalongosiigwe na Moose, ʉkʉfuma kʉ Misili? 17 Kangɨ baalɨ bo baani aba baalɨnkaleesye Kyala ɨfyɨnja amalongo mana? Bʉle, bakaja bo aba baatʉlile ɨnongwa, nʉ kʉfwa ndʉngalangala? 18 Kangɨ baalɨ bo baani aba Kyala aalapile ʉkʉtɨ atikʉbiitɨkɨsya ʉkwingɨla pabʉjo bwake ʉbwa kʉtʉʉsya? Bʉle, bakaja bo bala boosa aba baakaanile ʉkʉnkonga? 19 Po leelo tʉmeenye ʉkʉtɨ abandʉ bala baatoliigwe ʉkwingɨla pabʉjo ʉbo, kʉnongwa jaa kʉsita kʉmmwitɨka Kyala.