4
1 Po ʉlʉfingo lwa Kyala lʉkaalɨ lʉlipo kʉ bandʉ, ʉkwingɨla mbʉjo bwake ʉbwa kʉtʉʉsya. Po leelo twikeetege ʉkʉtɨ najʉmo alɨngiisa kʉtoligwa ʉkwingɨla mbʉjo ʉbo. 2 Namanga ʉswe tʉpɨliike ɨNdʉmi ɨNunu ɨjaa pabʉjo bwake ʉbwa kʉtʉʉsya, bo ʉlʉ baapɨliike abiisʉkʉlʉ bɨɨtʉ aba baafumile kʉ Misili. Leelo ɨndʉmi ɨjo jɨkaabatʉʉlile, paapo bakaaliitiike ɨsi aajobile Kyala. 3 Aajobile kʉmyabo aatile,
“Po ndɨnkʉkalala, ndɨnkʉlapa,
ndɨnkʉtɨ, ‘Abandʉ abo batikwisa kwingɨla sikʉ,
pabʉjo bwangʉ ʉbwa kʉtʉʉsya.’ ”*4:3 Bala kalata gwa Ɨsabʉli 95:11.
Looli ʉswe twe tʉmmwitiike Kyala, jo ʉswe tukwisa kwingɨla pabʉjo bwake ʉbwa kʉtʉʉsya. Kyala aajobile bo ʉlo, na paapo ʉbʉjo ʉbo bwalipo kɨlɨngaani, ʉkʉfuma bo ikʉpela ɨkiisʉ. 4 Namanga Kalata ʉMwikemo ikʉtʉbʉʉla ɨsya isikʉ lya bʉhaano na bʉbɨlɨ, pabʉjo bʉmo apa ikʉtɨ, “Pi isikʉ lya bʉhaano na bʉbɨlɨ, Kyala aatʉʉsiisye bo amalile ɨmbombo syake syosa.”†4:4 Bala kalata gwa Ʉbwandɨlo 2:2. 5 Kangɨ Kyala aajobile ɨnongwa ɨsi ɨsya kʉtʉʉsya mmasyʉ aga gasimbiigwe apo pamwanya, ʉkʉtɨ,
“Abandʉ abo batikwisa kwingɨla sikʉ,
pabʉjo bwangʉ ʉbwa kʉtʉʉsya.”‡4:5 Bala kalata gwa Ɨsabʉli 95:11.
6 Abiisʉkʉlʉ bɨɨtʉ, na paapo baalɨ baa kwanda ʉkʉlʉmbɨlɨligwa ɨNdʉmi ɨNunu, bakaalingiile pabʉjo bwake ʉbwa kʉtʉʉsya, kʉnongwa jaa kʉsita kʉntiila Kyala. Jo nongwa ɨjɨ balipo abandʉ abangɨ aba bikwisa kwingɨla. 7 Ʉkʉkongana na ɨsyo, Kyala aalɨbaatiike iisikʉ ɨlɨngɨ, aatile, “Lɨɨlɨno”. Tʉmeenye bo ʉlo kʉnongwa jaa kʉtɨ, bo amasikʉ mingi gakɨndile, Kyala aajobile kangɨ ɨsya bʉjo ʉbo, aajobile ʉkwendela kʉ malafyale Ndaabɨti ʉkʉtɨ,
“Lɨɨlɨno, lɨnga mukʉpɨlɨka iisyʉ lya Kyala,
mulɨngajaga nɨ ndumbula ɨngafu.”§4:7 Bala kalata gwa Ɨsabʉli 95:7-8.
8 Jooswa*4:8 Jooswa aalɨ ndongosi gwa Banyaisilaɨli bo afwile Moose. Ʉmwene aabafikiisye ʉkwingɨla nkiisʉ ɨkɨ baapeeliigwe na Kyala. Aaliko kʉ bʉʉmi ɨfyɨnja fingi bo ʉmalafyale Ndaabɨti akaalɨ ʉkʉpaapigwa. lɨnga aabagiile ʉkʉbafikɨsya abandʉ bala pabʉjo ʉbo ʉbwa kʉtʉʉsya, Kyala akaabagiile ʉkʉlɨjoba iisikʉ ɨlɨngɨ ɨlya kʉtʉʉsya. 9 Po leelo kʉkaalɨ kʉlɨ ni isikʉ ɨlya pa Sabati,†4:9 ƗSabati Bala kʉ Ɨsyakʉlɨngaania. ɨlya kʉtʉʉsya abandʉ baa Kyala. 10 Ʉmundʉ gwesa ʉjʉ ikwingɨla kʉkʉtʉʉsya kwa Kyala, ikʉtʉʉsya ʉkʉbomba ɨmbombo syake, bo ʉlʉ Kyala aatʉʉsiisye ʉkʉbomba ɨmbombo syake pi isikʉ ɨlya pa Sabati. 11 Po twijʉʉlege ʉkwingɨla pabʉjo ʉbo ʉbwa kʉtʉʉsya, ʉkʉtɨ najʉmo pakatɨ pamyɨtʉ alɨngatoligwa ʉkwingɨla kʉnongwa jaa kʉsita kwitɨka, bo ʉlʉ abiisʉkʉlʉ bɨɨtʉ baabombile.
12 Namanga iisyʉ lya Kyala lyʉmi, kangɨ lɨlɨ na maka fiijo. Kangɨ lyʉgi ʉkʉkɨnda ʉlʉʉbo loloosa lʉla ʉlwa bwembe koosakoosa. Bo ʉlwa lʉʉbo ʉlʉʉgi lʉbagiile ʉkwingɨla mpaka nkatɨ mfifupa ɨfya mundʉ, bʉbʉʉbo iisyʉ lya Kyala lɨbagiile ʉkwingɨla mpaka nkatɨ mu ndumbula jaa mundʉ, nʉ kʉsimanya ɨnyiinogono syake ɨsya nkatɨ. 13 Kakajako akandʉ nakamo aka kabagiile ʉkwifisa nkyeni mwa Kyala. Kʉkʉtɨ kandʉ kalɨ pabwelu nkyeni mmyake, ʉjʉ tukwisa kwinosya ɨsya mbombo syɨtʉ nkyeni mmyake.
Jesu jo mpuuti ʉnkʉlʉmba
14 Po tʉlɨ nʉ mpuuti ʉnkʉlʉmba fiijo, Jesu ʉMwana gwa Kyala, ʉjʉ abʉʉkile kʉno aliko Kyala jʉʉjo. Kʉnongwa ɨjo tʉsikole fiijo ɨsi tukʉsiitɨka. 15 Namanga ʉmpuuti ʉnkʉlʉmba gwɨtʉ abʉmeenye ʉboonywa bwɨtʉ boosa. Ʉmwene joope aageliigwe nɨ ngelo ɨsya lʉko nʉ lʉko, bo ʉlʉ ʉswe tukʉgeligwa, looli ʉmwene akaatʉlile ɨnongwa. 16 Po tʉsegelele apa kɨlipo ɨkɨkota ɨkya bʉtwa ɨkya Kyala ʉgwa ipyana kʉ bʉkifu, ʉkʉtɨ atʉpaakɨsye, tʉkabe iipyana lyake pakabalɨlo akaa bʉtolwe.
*4:3 4:3 Bala kalata gwa Ɨsabʉli 95:11.
†4:4 4:4 Bala kalata gwa Ʉbwandɨlo 2:2.
‡4:5 4:5 Bala kalata gwa Ɨsabʉli 95:11.
§4:7 4:7 Bala kalata gwa Ɨsabʉli 95:7-8.
*4:8 4:8 Jooswa aalɨ ndongosi gwa Banyaisilaɨli bo afwile Moose. Ʉmwene aabafikiisye ʉkwingɨla nkiisʉ ɨkɨ baapeeliigwe na Kyala. Aaliko kʉ bʉʉmi ɨfyɨnja fingi bo ʉmalafyale Ndaabɨti akaalɨ ʉkʉpaapigwa.
†4:9 4:9 ƗSabati Bala kʉ Ɨsyakʉlɨngaania.