22
Ʉlwɨsi ʉlwa mɨɨsi agaa bʉʉmi
1 Po ʉgwandʉmi alɨnkʉʉnangɨsya ʉlwɨsi ʉlwa mɨɨsi agaa bʉʉmi, ʉlʉ lwalangalaga bo ʉlwa igalaasi. Lwafumile pa kɨkota ɨkya bʉtwa ɨkya Kyala nɨ kya Kangʼoosi. 2 Ʉlwɨsi ʉlo lwendaga mu njɨla ɨnywamu ɨjaa kaaja. Mfibafu fyosa ɨfya lwɨsi ʉlo gyalipo ɨmipiki ɨgɨ gikʉtwala ʉbʉʉmi. Ɨmipiki ɨgɨ gikʉpa ɨseke ɨsya lʉko kalongo na ibɨlɨ. Kʉkʉtɨ mwesi ʉlʉko lwake nkyɨnja. Amaani gaake go nkota ʉgwa kʉbabʉmbʉlʉsya abandʉ boosa pakiisʉ.
3 Katikwisa kʉjamo akandʉ nakamo aka Kyala akagunile nkaaja kala. Ɨkɨkota ɨkya bʉtwa ɨkya Kyala nɨ kya Kangʼoosi kikwisa kʉjamo. Po ababombeli baake bikwisa kʉmmwipuutaga. 4 Bikwisa kʉmmbona kʉmaaso, po ɨngamu jaake jikwisa kʉsimbigwa pa fyeni fyabo. 5 Pakɨlo patikwisa kʉjako kangɨ. Batikwisa kʉfumbwaga nʉ lʉmuli ʉlwa nyaale pamo iisʉba, paapo ʉNtwa Kyala jʉʉjo ikwisa kʉbamulɨkɨlaga, bikwisa kʉlongosyaga nagwe bwila na bwila.
Ʉkʉgomoka kwa Jesu Kɨlɨsiti
6 Po ʉgwandʉmi ʉjo alɨnkʉʉmbʉʉla alɨnkʉtɨ, “Amasyʉ aga gaa kʉsʉʉbɨligwa, kangɨ gaa nalooli. ɄNtwa Kyala ʉjʉ ikʉbapa abakunguluka Mbepo gwake ʉMwikemo, antʉmile ʉgwandʉmi gwake, ʉkʉtɨ abasetʉlɨle ababombeli baake, ɨsi aasikʉbombigwa kɨsita kʉkaabɨla.”
7 Jesu ikʉtɨ, “Keeta! Ngwisa nakalɨnga. Asajiigwe ʉjʉ ikʉgakola amasyʉ agaa bʉkunguluka, ʉbʉ bʉsimbiigwe mwa kalata ʉjʉ.”
8 Ʉne Johani jo ʉne naasibwene nʉ kʉsipɨlɨka ɨsyo syosa. Bo nsibwene nʉ kʉsipɨlɨka, ndɨnkʉgwa ʉlʉpi nkyeni mmalʉndɨ agaa gwandʉmi ʉjʉ aanangɨsyaga ʉne ɨsyo, ndɨnkʉmmwipuuta. 9 Looli ʉmwene alɨnkʉʉmbʉʉla alɨnkʉtɨ, “Somma! Ʉlɨngabombaga bo ʉlo! Ʉne ndɨ mbombeli itolo, bo ʉlʉ ʉlipo ʉgwe na bakunguluka biinaako, na boosa aba bikʉgakola amasyʉ agaa mwa kalata ʉjʉ. Kyala jo ʉjʉ ʉmmwipuutege!”
10 Kangɨ alɨnkʉtɨ, “Ʉlɨngafisaga bo ɨsya mbʉtiitʉ, amasyʉ agaa bʉkunguluka ʉbwa kalata ʉjʉ, namanga akabalɨlo akaa kʉboneka kalɨ kɨfuki. 11 Mpaka akabalɨlo kala bo kafikile, po ʉjʉ ikʉbomba ɨmbiibi endelelege ʉkʉbomba ɨmbiibi, ʉnnyali endelelege ʉkʉja nnyali, ʉjʉ ikʉbomba ɨsya bʉgolofu endelelege ʉkʉbomba ɨsya bʉgolofu, kangɨ ʉmwikemo endelelege ʉkʉja mwikemo.”
12 Jesu ikʉtɨ, “Keeta! Ngwisa nakalɨnga. Ɨfya kʉbahomba ngwisa nafyo, ʉkʉbahomba boosa ʉkʉkongana nɨ mbombo syabo. 13 Ʉne jo ʉne ngwanda, kangɨ jo ʉne ngʉmalɨɨkɨsya. Ndɨ gwa kwanda, kangɨ ndɨ gwa kʉmmalɨɨkɨsyo. Ʉne ne bwandɨlo, kangɨ ne bʉmalɨɨkɨsyo.”
14 Basajiigwe abandʉ aba bikʉsuka ɨmyenda gyabo,*22:14 Bala kalata gwa Ʉbʉsetʉli 7:14. ʉkʉtɨ biitɨkɨsigwe ʉkwingɨla mfipata ɨfya kaaja. Bikwisa kʉlya ɨseke ɨsya mpiki ʉgwa bʉʉmi. 15 Looli ʉko panja kʉlɨ na balosi, abalogwe na bagogi, na aba bikwipuuta kʉ tʉndʉ ʉtʉ akaja jo Kyala, pamopeene na boosa aba babʉganile ʉbʉtʉngʉlʉ nʉ kʉtʉngʉlʉpa. Abo bikwisa kʉjaga panja pakaaja bo ʉlwa mbwa.
16 “Ʉne Jesu, nʉntʉmile ʉgwandʉmi gwangʉ kʉkʉbasisimɨkɨsya ʉmwe ʉbwanalooli ʉbwa nongwa ɨsi, ʉkʉtɨ sikafumusigwe kʉ fipanga ɨfya Kyala. Ʉne ndɨ nsi, kangɨ ndɨ gwa ndʉjungu ʉlwa malafyale Ndaabɨti, ndɨ lʉtondwa kɨpanda bʉsikʉ†22:16 Kɨpanda bʉsikʉ Ʉlʉtondwa ʉlʉ lukʉlangala nʉlʉbʉnjʉ fiijo bo bʉkaalɨ ʉkʉkya. Bala kalata gwa Ɨmbalɨlo 24:17. ʉlʉ lukʉlangala fiijo.”
17 Mbepo Mwikemo na ʉjʉ ikwegigwa bikʉtɨ, “Isaga!” Joope ʉjʉ ikʉsipɨlɨka ɨsi atɨgɨ, “Isaga!” Joope ʉjʉ alɨ nɨ kyʉmɨlwa nʉ kʉlonda amɨɨsi, iise eege amɨɨsi agaa bʉʉmi agaa itolo.
Amasyʉ agaa kʉmalɨɨkɨsya
18 Ngʉbasoka abandʉ boosa aba bikʉgapɨlɨka amasyʉ agaa bʉkunguluka ʉbwa kalata ʉjʉ. Ʉmundʉ lɨnga ikongelapo kokoosa, Kyala ikwisa kʉmmongelapo ʉbʉtolwe ʉbʉ bʉsimbiigwe mwa kalata ʉjʉ. 19 Kangɨ lɨnga ikʉsoosyapo iisyʉ lyolyosa ɨlya bʉkunguluka ʉbwa mwa kalata ʉjʉ, Kyala ikwisa kʉsoosyapo ɨkɨjabo kyake ɨkya seke ɨsya mpiki gʉla ʉgʉ gukʉpa ʉbʉʉmi, nʉ kʉsoosyapo ʉbʉjo bwake nkaaja akiikemo, ʉbʉ bʉsimbiigwe mwa kalata ʉjʉ.
20 Ʉjʉ ikʉsisimɨkɨsya ɨsyo syosa ikʉtɨ, “Nalooli ngwisa nakalɨnga.” Ameni. Gwisege Ntwa Jesu!
21 Ɨliipyana lya Ntwa Jesu lɨjege na nuumwe mwesa. Ameni.