1 Eto enda nei embomeni na God ta ke avo ingito ke be hotembea avo apostles te ambotani te Judea enda ta mihie duru ingia. 2 Eto iji nei Peter na Jerusalem da ta pambunu enana na Peter ta degi ke ngahia na eto ingia, 3 “Umo do eto Judea embomeni ta ke pepeni poeketo enda nei embo ta bande ta pambuto enana ga inde?” ainge eo 4 Peter na tapa do ena avo harikena. 5 “Na da Joppa ta mihie pari ue ehure ta einge kogona. Uhu pe hirikehei bo peni vahai avo pekihi ta jigito humbuto nau degi ta vovuoi koguena, 6 bo amita jo ta o nei te nei te o koso o te di te tapa koguena 7 amo God na nau degi ta ke einge ehei ingihana, ‘Peter, ereto o teto heveto indijo’ ainge ehei 8 mine einge ijiena, ‘Bada, na o sapura indahu o amo te mane indagona amo dago ta ke pepeni mihia avo eto mane indagora.’ ainge ehene 9 ke uhu ta eto ehako einge ijija. ‘Eto God na do au javotoho asuja avo inena sapura ke mane asoa’ ainge ijija 10 eto ke vahai avo iji nei heriso nei vahai eto bo peni amo ehako uhu ta vihito pahunu 11 embo 3 ainge Caesarea ta eto puvuto nau evari bande pe ta heteto na jombure uo 12 Ahihi Otohu na ‘Do mane hotembasoa te tehora enana ga pambasoa’ ainge ijija. Eto namei kamei 6 ainge namote pambuto Captain Cornelius ta bande jo ta horihare 13 Anera vahai na Cornelius ta degi ke do ijija avo hihi tirei ingihera amo einge ijija, ‘Da Joppa ta ke ikejo pambau Simon Peter puvuto 14 umote no embomeni te ke au ingito amita ke agi ururovo ungo orekasuja.’ ainge Anera na ijija avo tirei ingihana. 15 Eto na ihiketo ke ijio Ahihi Otohu na dago Judea embomeni Iesu ambo ambo ere uahera ta degi puvuna ainge dombo enana ta degi Ahihi Otohu ihiketo puvuhija. 16 Eto avo kito Bada Iesu ta ke avo hotembihena eto John na embo umo na bapataito ena rate dago na Ahihi Otohu na bapataito asora avo hotembihena 17 eto dago Iesu Keriso ke be hotembeto amita Ahihi Otohu hande eto humbuhora eto enda nei embomeni na eha ere humbuhora avo eto na God ta ari avo haekari inono re te?” ainge enu 18 embomeni na ke avo ingito ke nei ae God jakeka ijie ke mine ara einge ea, “Aravora amo ke be eto God na eha enda nei embomeni ta degi hande ere ua amo enana ta ari sasapura avo eto ajato ijiroro God na enana ta irari datoho ikasuja.”

19 Eto Steven teo pehena eto Judea embomeni na Iesu ta ambotani ta degi ari sasapura neite neite eo osaga kito enda nei nei Phonecia ta Cyprus ta Antioch ta pambuto Judea embomeni ta perekari Iesu ta ke hande ere uahera. 20 Rate ambotani nei da Cyprus embo te Cyrene embo te aingeto da Antioch ta pambuto Bada Iesu ta duru javotoho avo Greek embomeni ta degi hande ere uahera. 21 Eto enana Bada ta sovera na ke hande eo enda nei embomeni isapamane jo haperekenu Iesu ambo ambo ea.

22 Eto Jerusalem ta ekalesia embomeni na duru avo ingito embo Barnabas be kioja ikeo Antioch ta pambuna. 23 Eto pambuto God na enda nei embomeni ta degi ari javotoho ena avo kina. 24 Eto Barnabas amo embo javotoho Ahihi Otohu na enetari eto God ta sovera humbari embo avoeto amina kito tunga javotoho eto embomeni na jo tapa na God ke be eto hotembeto iresora avo oje kahena. Eto embo isapamane na puvuto ambotani ga vahaita ea. 25 Eto Barnabas na Saul jombure ue Saul tohota da Tarsus ai ta mihinu 26 pambuto Saul hambuto humbuto ehako Antioch ta puvuna. Eto enana heriso iji koso be jua vahai amita jo ta embomeni isapamane Antioch ta ekalesia ahepoekea. Eto Antioch ta embomeni na Iesu ta ambotani ta javo ‘Christian’ ikea.

27 Eto amita ijite peroveta na Jerusalem ta eto Antioch ta puvua. 28 Eto peroveta vahai javo Agabus ta degi Ahihi Otohu na ke ikenu ereto enda tapa ta beuje iji peni vahai be puvuresuja avo ereto harikena. Eto Rome ta King Claudius ta iji te beuje avo puvuna 29 eto Antioch ta ekalesia embomeni na Judea ta Christian embomeni hondate eto hande ikasi uje eo embo vahai vahai na donda heka humbuto nei peni ikena nei isapa ikena. 30 Eto tapa humbuto ikeo Paul te Barnabas te aingeto hande avo humbuto pambuto Jerusalem ekalesia ta okokose ta ikea.