1 Eto iji amite King Herod nei na ekalesia embo nei nei ta degi sapura asi humbuto tipura ta ikena. 2 Eto apostel vahai John ta namei James avo asivo na tunga tiukenu 3 Judea embomeni kito tunga javotoho uo Herod na kito Peter andito humbuto tipura ta ikena 4 amita iji te Judea embomeni na bread tevokoari na pondo ea pondo amita be amo sivo ikae avo eto bread pajirae amina pondo ere uahera eto Peter tipura ta iketo tipura simba ari embo tapa 16 ainge ikenu iji vahai vahai embo 4 simba ere uahera amita be amo Peter arahata pambaguja eto pondo javo ‘Pass-over’ avo indito Peter humbuto embo tapa ta tihi ta pehumbasi ena. 5 Eto ekalesia embo tapa na Peter tipura ta mihina avo eto pari peni vahai God ta degi ikea.

6 Eto Peter iho vujau court asuja amita mume amina tipura simba ari embo heriso amiga arumbeto ingeni nei amo embo amita ingeni ta punduna eto ingeni nei amo embo nei ta ingeni ta punduna aingeto Peter orohuta evinu eto simba ari embo nei heriso amo pe araha ta heteto mihio 7 mume orohuta God ta Anera usasa te tapa orohuta irerembeto puvuto Peter ta koho ta jigito jahevenu erenu, 8 “Umo sau sau ereto hete,” ainge enu amita ingeni ta pundurari amo oenga houketo venu Anera na, “No pupuri tigito utu goru asuketo no bo na pohuketo nau ambota hae,” ainge enu 9 Peter na Anera ta ke agi eto ambo ambo ena, rate ke avo be mane ehure ari ke avo hotembena. 10 Eto simba ari embo nei serikea pambuto nei serikea pahuo huga bokiri peni amo oenga hirikenu arahata pambua. Eto pambuto degi tutumota Anera saivenu 11 Peter na ke be kito, “Na ehure mane God na amita Anera ikehei puvuto Herod ta ingeni ta na humbija amo Judea embomeni ta uje avo God na haekehija,” 12 ainge eto pambuto John Mark amita e Mary ta bande ta ekalesia embomeni peni vahai be Peter avoembo pari ue mihio 13 peheto kito huga pe ta vahihiri unu bande ta pure ari kakara javo Rhoda amina puvuto 14 Peter ta ke hajire ingito tunga javotoho eto huga pe hirikae toto egerembeto huheveto pambuto embomeni ta degi einge ena, “Peter huga pe ta heteto mihia,” ainge enu 15 embomeni na, “Umo kava kakarara” ainge eo kakara na, “Na ke be erena” ainge enu embomeni na, “Amo Anera Peter ta tombu vahai avo puvuto miheite?” ainge ijio 16 Peter na vahihiri kaiketo unu pambuto pe hiriketo Peter kito vani vini eto ke taimbea. 17 Eto Peter na embo tapa ke ambu ara ingeni na ahe ahe eto Bada na Peter tipura ta daingeto umbuna amita hihi avo tirinu irae enu ke einge ena, “Iesu ta namei James te ungotenau namei kamei ta degi ke evi evu ingore,” ainge eto degi nei ta pambuna. 18 Eto iho vujenu tipura simba ari embo na kiae eto ke peni vahai be ea. Eto Herod na amita pure embomeni ikenu degi tapa jombure ea rate hambae ea, 19 eto tipura simba ari embopo ganoka ena rate ke mine ae eo Herod na enu tunga tiukea.

Ainge eto Herod na da Judea toto Caesarea ta pambuto mihie 20 da Tyre te Sidon te ta embomeni ta degi tumo ere uahija. Eto Tyre te Sidon ta embomeni na vahaita puvuto Herod ta bande simba ari embo javo Blastus amita degi ke eo ingito osaga kito tapa Herod ta degi pambuto peka humbari ta ke avo Blastus na Herod ta degi ena amita be amo Tyre te Sidon embomeni na enana ta indari Herod ta enda ta eto ere umbuhahera.

21 Eto Herod na ke ari iji ikenu puvunu amita bo asukari javotoho humbuto asuketo amita avo arumba peni ai ta arumbeto embo ta degi ke ijinu 22 embomeni na jajage eto, “Amo embo na ae rate God na eria,” ainge ea. Eto Herod na, “Na God ke avojo,” ainge ae avoeto God ke eo ingito osa enu 23 God ta Anera na enu hamo ta kakesa na pagenu pehena.

24 Eto God ta ke na enda neita neita ikeo pambuna. 25 Eto Barnabas te Saul te Jerusalem ta pambuto Antioch ekalesia ta hande iketo John Mark humbuto egerembeto puvua.