1 Lo taro hi Abisa netui Jerobom mo sege. 2 Me i Jerobom mo veve lawe tubui lo valena, “Go maraga go tau goro na nagomu huri a tangaloi rain mese ilogo huri ve i nigo i tubui lo valengu. Siu goi vano Saelo, taie hi tangaloi ligoligogi i Ahisa u veve lawea au hurive nain ratahigi goro na tangaloi ngere. 3 Me lo limemu goin lei na bereti hangavulu mena kek te gaivihe me a lahai hani, me gom vano lobena. Ngeie vin veve na havagi vin vei lawe na maresu mwera lehe.” 4 Me nge mo vai mwere hi Jerobom u horae, mo maraga me mo vano Saelo mo vano lo valei Ahisa. I Ahisa hi vei lei tea vena lehi na vavine hi ba matana ru dodo huri u sesea. 5 Me Huqe mo veve lawe Ahisa, “I tubui lo valei Jerobom mo vomai ve na hinke leo denigo huri netune mo sege, me nigo goin duvie mwere. Tavohe mo dadari, vin vei huri ve nge a tangaloi dolue.” 6 Tavohe i Ahisa mo rongo na dumi garune lo matai turegi, move, “?Tubui lo valei Jerobom go soro. Huri havai gom vaie huri ve nigo a tangaloi dolue? U horau mena roro asi lawego. 7 Go vano gom veve lawe Jerobom, ‘Nge lehe a havai i Huqe, a Huqe Mauri noi Israel, u veve: “Nau ragasigo dena sinobu me nau rivugo gom tomue goro na nogu tangaloi Israel. 8 Nau heve vohogi na tanoi ratahigi dena babagi lui ratahigi Devet me nau betea lawego, nge hateve gu mwerei na nogu tangaloi tabanagi i Devet, ngeie u wiribibi na nogu leohora. Me u huri eu gena loloi domine, mo vai na havai u vovohoi hogosie lolo mataku. 9 Nigo gu vei na gineu esi u liure rau toga tomue. Gu bolo na nom huqe wagineu, a nunui huqe gairue lo vatu homu; gu vutu na merongu me gu labe dorigi eu. 10 Huri hi, neu nain hora na tatuana vin hivo lure lo babagi lui Jerobom. Nain tei vohogi na mwera doluegi dena babagi lui Jerobom: ngerehi tangaloi lalawua me ngere tangaloi vurogi. Nain hure vohogi na babagi lui Jerobom ngere mwera doluegi vin mwerehi a tangaloi mo hure vohogi na qatuisongo. 11 Wiriu rain genire hi lui Jerobom ram mate lolo vanue renge, me a manu rai genire hi ram mate lolo vanue.” I Huqe u vevea beno!’ 12 Nge i nigo go mule taligu. Nge tavohe goi dadari lolo nom vanue renge, a maresu mwera hi vin mate. 13 Israel doluegi rain ngara hie siu rain tulegi nie. Ngeie gategale hogosie lui Jerobom rain tulegi nie, huri nge hogosie lo babagi lui Jerobom i Huqe i Huqe Mauri noi Israel u haqe na gineu garea lune. 14 I Huqe vin rivu na nona ratahigi goro na Israel, ngeie vin tei vohogi na babagi lui Jerobom. U tevuigi beno lo rani bagataha. 15 Me I Huqe vin wehire tau Israel me ngere rain rurururu. Me ngere rain ruru mwere na ere mo ruru lolo wai. Nge vin sara vohogi na tangaloi tau Israel dena tano garea ngehi u betea lawe retamara, siu vin geburegi nire rain gagaliu na wai meuri Evaretes, huri rau vutu na meroana noi Huqe gena nora beru noi huqe vurogi Asera. 16 Huqe vin siregi nire Israel huri na asiana noi Jerobom. Huri u vagasile tau mo vai na Israel ram vagasile.” 17 I tubui lo valei Jerobom mo maraga mo mule taligu vano Tisa. Tavohe mo dadari lo mataituregi valena maresu mwera hi mo mate. 18 Mwerehi i Huqe u veve lawe na nona gaihora tangaloi ligoligogi Ahisa, Israel ram tangihie siu ram tulegi nie.