1 Lo tagugi a ratahigi mo toga surigi lolo valena me a Huqe mo bete lawea mangana dena nona tavalui vuro sao doluegi dalie, 2 ratahigi mo veve lawe Natan tangaloi ligoligogi, “Neu nge, nam toga lolo vale rau veie lo gai siaga a tora, nge a Angai Waratau noi Huqe Mauri mo eno mo sigei lolo vale siusiu.”

3 Natan mo duvi lawe ratahigi vena, “Havagi mo eno lolo domimu, vano gom vaie, ba huri i Huqe ngeie meigo.” 4 Nge lolo bongi hinge a leo noi Huqe mo vumai lawe Natan, mo veve vena: 5 “Go vano go veve lawe nongu tangaloi tabanagi Devet, ‘Nge lehe a havai i Huqe u veve: Hatie, nigo goin mese bulu na valengu vena nain toga lolona. 6 Neu hateve nau toga lolo vale lo tarogi hi neu nau laire ngere Israel dena Ijib mo dadari bagataha. Neu nau gilu lategi lolo vale siusiu mo voragi valengu. 7 Lolo ute ngere hi nam gilu lategi meire Israel doluegi, neu nau veve lawe na nora tomtomuegi vena rain tomuegi na nongu sinobu tau Israel, nge i neu hateve nau veve lawera vena. “Huri na havai gohe vutu na valengu tea lo gai siaga hi a tora?” ’ 8 Siu siserigi lehe, goin veve lawe na nongu tangaloi tabanagi Devet vena, ‘Nge lehe a havai i Huqe Managi u veve: Nau leigo dena duvu garea, me dena nomu tabana hi gom tomuegi sibsib, vena goin voragi leogoroi nongu sinobu tau Israel. 9 Nau dige meigo tavohe gom vano logo logo, me nau vei vohogi doluegi na nomu tavului vuro denigo. Siserigi lehe neu nain vei na henamu vin lawoa, mwere na henara tangaloi lalawoa tau lolo ure. 10 Me neu nain vei rarai na tantano huri na nongu sinobu tau Israel siu nain vei rarai hurire huri vena ngere rai togagi venue sibora me rain mese tatu taligu. A tangaloi esi rain mese saugi nire taligu, mwere hi rau vei lo tavuigi, 11 siu nau vei lo tavuigi nau vile wahe na tangaloi vagamwasoi sao goro na nongu sinobu tau Israel. Mwerehi, neu nain bete lawego vage mangana dena nomu tavului vuro. A Huqe mo veve matamwasaragi lawego huri vena i Huqe sibona vin vei ragasi na babagi lo ratahigi lumu: 12 Tavohe goi mate goin manga mei retubumu, neu nain ragasi na babagi lui netumu, ngeie hi netumu sibomu, me neu nain teu na nona ratahigi goro. 13 Ngeie hi vin vutu na vale huri na henagu, siu nain teu na herei nona ratahigi goro vagituei. 14 Neu nain voragi tamana, me ngeie vin voragi netungu. Tavohe mo vai gineu esi neu nain gagavoe gena gaitatali, mwerehi tangaloi ram tatali reneture. 15 Nge a nongu vaigarea vin he vano te vohogi denie, mwere hi nau lei vohogi den Sol, ngehi nau lei vohogi siu nigo goin voragi ratahigi. 16 Me dena babagi hi lumu mena nomu ratahigi goro vin eno vagituei lo nagongu, heremu vin teuana vagituei.’ ” 17 Natan mo veve na leo ngere hi doluegi lawe Devet mwerehi i Huqe u vosangie lawea.

18 Me i ratahigi Devet mo vano mo toga lo nagoi Huqe, me mo veve vena, “Huqe Lawoa: I neu a tangaloi vurogi, me lo babagi hinge neu lune vage, huri i nigo gu vei eu nam voragi na ratahigi. 19 Nge mwere vena he tatarise tea lo matamu, Huqe Lawoa, nigo gu veve vage huri na taro mo vumai mo sigei huri lo babagi lui nomu tangaloi tabanagi. Huqe Lawoa, neu a tangaloi hogosie! 20 Neu nahe navu na gineu tea vage denigo,Huqe Lawoa ba huri nigo gu ilo na nom tangaloi tabanagi. 21 Mo huri na nomu leo me mo huri na nomu tarani, nigo gu vei na gineu lalawoa me mo vaie mo vosangi ana lawe na nomu tangaloi tabanagi. 22 Huqe Lawoa, nigo gu lawoa garagara hogo. Hate gategale mwereigo, hate Huqe vage nge i nigo hogosie, mwerehi gau rongo gena qero mai sibomai. 23 Me hate tangaloi rau mwereire nomu sinobu tau Israel. A burigi gategale hogosie ngehinge i nigo gu vagamwasoire vena rain voragi nomu sibomu. Me gu vei na henamu sibona. Me gu vei gineu lalawoa gagarea, siu huri gu livusi na taureure sao mena nora huqe sao dena nom sinobu, ngerehi gu vagamwasoire dena Ijib. 24 Nigo gu vei na nom sinobu tau Israel mwere na nomu tavagi tuei. Me nigo, Huqe, gu voragi nora Huqe Mauri. 25 Me siserigi lehe, Huqe Gogona, go wiribibi tavagi tuei a waratau hinge gu vei huri na nomu tangaloi tabanagi mei renetune. Vai mwere hinge gu warataugi, 26 siu huri a henamu vin lawoa tavagi tuei. Siu sinobu rain veve vena, ‘I Huqe Managi huire garagara a Huqe goro na Israel!’ Me a babagi lo nomu tangaloi tabanagi Devet vin veiana lolo matamu mwerehi gom tarani. 27 Huqe Managi, Huqe Mauri tau Israel, nigo gu haharagi lawe na nomu tangaloi tabanagi, vena, ‘Neu nain ragasi na babagi lo ratahigi lumu.’ Huri tangaloi nom tabanagi u hamqe na gaiture lo tataro a tataro hi lawego. 28 Huqe Lawoa, nigo a Huqe Mauri! Nom leo rau hogo, me nigo gu warataugi na gineu gagarea lawe na nom tangaloi tabanagi. 29 Siserigi hi goin rongo garea huri goin vei gareagi na babagi lo nom tangaloi tabanagi, hurive vin vano rorongo tavagi tuei lolo matamu; huri nigo HUQE Lawoa gu veve, siu mena nomu vaigareagi lo babagi hi lo nom tangaloi tabanagi vin garea tavagi tuei.”