ጳዉሎሳ ቆሮንቶሳ አሱንꬅስ
ጻፍደ ቲኖ ኪታ
ገለ
ጳዉሎሳ ቆሮንቶሳ አሱንꬅስ ጻፍደ ቲኖ ኪታ ጻፍንትዳና፥ ጳዉሎሳ ቆሮንቶሳ ግዳ ኤስደ ዎሳ ኬꬅተ አማንዘ አስ ደእተ አማኖላ አፋ ደንድዘ ማꬍትስ ማሄ እማደስ። የ ዎደ ቆሮንቶሳ ካታማ ሳአላ የዘ ዱማ ዱማ አሱንꬅ የዘ ግርኬ አዉራጃ ካታማን አካያ ጋእንትዘ ሮመ ዋና ካታማ። ይና ካታምታ ዛልኤራ ኤርንትደ፥ ዎጋራ ሚንግደ፥ ዱማ ዱማ ኢታ ደኦር ዳልግዳኖን ሃይማኖተ ጋማትꬃራ ኤርንትዳኖ።
ሐዋርዘ ምንꬂ ኦሆደስ ኮይዳና፥ ይና ዎሳ ኬꬅት ግዳ መꬍንትደ ሻክንተባዝ፥ ዱማ ዱማ ኢታ ደኦባዝ፥ ኦላለ ባዝ፥ ኤከን ገለባዝ፥ ዎሳ ኬꬅ ዎጋባዝ፥ ጌሽ አያና እንግዘ ባዝን Ꮉይቆፓ ደንዶ ባዝ። ዎንገለ Ꮉና ኦጭቶ ዋይዝ ማሆድ የዛኮ ሐዋርዘ ምንꬂ ኦህነ።
ሲቆ ጾዚ ፋ አሱንꬅስ እንግደ አꬍዘ እሞትꬅ ማቅዳኖ ዞፋነ ታጶ Ꮉይꬕ ቤዛነ፤ ማህ ዞፋነ ታጶ Ꮉይꬕ Ꮉይ ማጻፍዘ ግዳ ጋማ ኤርንትደ በስ ጋእንት ኤርንታነ።
ኣፈ ቆፉንꬅ
ገለ ቆፋ 1:1-9
አማንዘ አሱንꬅ ግዳ መꬍንትደ ሻክንተ 1:9—4:21
ኦላለ Ꮉንታን ካራ አስ የስ ዎጋ 5:1—7:40
አማንዘ አስን አማኖሰ አስ 8:1—11:1
ዎሳ ኬꬅን ጎይኖ ዎጋ 11:2—14:40
ክርስቶሳ ደንድቶን አማንዘ አስ ደንድቶ 15:1-58
ይሁዳ ግዳ የዘ ማꬍꬍደ አማንዘ አሱንꬅስ ማደ 16:1-4
ጻꬅ ቆፋ 16:5-24
1
1 ጾዘ ቆፋራ የሱስ ክርስቶሳ ሐዋረ ማቃደስ ጼግንትደ ጳዉሎሳን፥ ኑ እሸ ሶስተንሳ፥ 2 ቆሮንቶሳ የዘ ጾዘ ዎሳ ኬꬅትስ፥ የሱስ ክርስቶሳራ ጌዥዱንꬅስ ኡንትስን ኑስ ላꬂ ማቅደ ኑ ላꬄ የሱስ ክርስቶሳ ሱንꬅቶ ኡባ በሳ ጼግዘ ኡቡንꬅስ፤ሐዋ. 18:1
3 ጾዘ፥ ኑ አደፓን ላꬄ የሱስ ክርስቶሳፓ ይንትስ አꬎ ኬሃትꬅን ሳሮትꬅ ማቀ።
ጳዉሎሳ ጾዝ ጋላታነ
4 ጾዚ ክርስቶስ የሱሳ ባጋራ ይንትስ እንግደ አꬎ ኬሃትꬅት ግሾ ታኒ ኡባ ዎደ ጾዛ ጋላታነ። 5 ኡባ ባዛራ ኦሄራን ማቅን ኤራትꬃራ ክርስቶሳራ ዱርꬍዳ። 6 ኑ ክርስቶሳ ባዝ ኦህደ ማርካትꬅታ ይን ግዳ ምንግዳ። 7 ይኒ ግሾ፥ ይን ኑ ላꬄ የሱስ ክርስቶሳ ቆንጭꬅቶ ናግተራ የዝኮ አኮ አያና እሞን ይንትስ ፋጮስ። 8 ኤዝን ማህ ኑ ላꬄ የሱስ ክርስቶሳ ላምእንꬃ የእተ ቦረ ባይዙንꬃና ማቂ ዉርሱꬅ የሎደ ጋር ይንታና ሚንꬆዳ። 9 ፋ ናአይጎ፥ ኑ ላꬄ የሱስ ክርስቶሳ ፈተትꬃጎ ጼግደ ጾዘ አማንንትዳያ።
አማንዘ አሱንꬅ ግዳ መꬍንትደ ሻክንተ
10 ታ እሹንꬆ፥ ይን ግዳ ሻክንተ የዝፐ፤ ኡቡንꬅ ጊጊ ፈቲ ዎዝናራን ፈቲ ቆፋራ ማቂ የዞተ፥ ያጋእ ኑ ላꬄ የሱስ ክርስቶሳ ሱንꬅተ ታ ይንታና ዎሳነ። 11 ታ እሹንꬆ፥ ቀሎኤ ካራ አሱንꬅ ይን ግዳ ላሌ የዛኖ ታስ ኦህዳ። 12 ይንታፓ ፈተ ፈተ፥ «ታኒ ጳዉሎሳስ፤ ታኒ አጵሎሳስ፤ ታኒ ጴጥሮሳስ፤ ታኒ ክርስቶሳስ» ያጋነ። ሐዋ. 18:24 13 ዬዝን ክርስቶሳ ሻክንትዳነ? ይን ግሾ ማስቃላላ አፋ ሱጹንትደ ጳዉሎሳነ? ዎይ ይን ጳዉሎሳ ሱንꬅተ ጻማቅንትዳነ?
14 ታኒ ቃርስጶሳፓን ጋዮሳፓን መለ ይንታፓ ኦናን ጻማቅካይዘ ግሾ ጾዝ ጋላታነ። ሐዋ. 18:8፤ ሐዋ. 19:29፤ ሮመ 16:23 15 ይኒ ግሾ፥ ኦደን ይንታና ታ ሱንꬅተ ጻማቅንትዳ ጋእ ኦሆደስ ዳንዳእዘ ባያ። 16 [ማህ እስጢፋኖሳ ካራ አሱንꬃና ታ ጻማቅዳ፥ ጉጂ መለ ኦና ጻማቀዛኮን ቲርንቶስ።]1 ቆሮ. 16:15 17 ክርስቶሳ ታና ኪትዳና ዎንገለ ኦሆደ ጋራፕ አትን ጻማቆደ ጋር ባያ። ክርስቶሳ ማስቃላ ጨር ማቃመ ጋር ዎንገለ ቃላ ታ ታማርስዛና አስ ጭንጫትꬅ ቃላራ ባያ።
ክርስቶሳ ጾዘ ጭንጫትꬅን ዎልቃ
18 ማስቃላ ቃልታ ꬋብዙንꬅስ ኤያትꬅ፥ የዝን ኑስ አትዱንꬅስ ጾዘ ዎልቃ። 19 ጌሽ ማጻፍተ፥
«ታኒ ጭንጩንꬅ ጭንጫትꬅቶ ꬋብሶዳ፤
ኤሩንꬅ ኤራትꬅቶ ꬋብሶዳ»
ያጋነ።ኢሳ. 29:14
20 ዬዝን፥ ጭንጫ አባ የነ? ህገ አስታማርዘ አባ የነ? ዎይ Ꮉና አላመ ኤሩንꬅ አባ የነ? ጾዚ Ꮉና አላመ ጭንጫትꬅቶ ኤያትꬅ ማህካነ?ኢዮ. 12:17፤ ኢሳ. 19:12፤ 33:18፤ 44:25
21 Ꮉና አላመ አሱንꬅ ፋ ጭንጫትꬃራ ጾዛ ኤራመ ፋና ጾዚ ፋ ጭንጫትꬃራ ጎርድዳ፤ የዝን ኤያትꬃራ ፋይድንትዘ፥ ኑ ኦህዘ ዎንገለ ቃላ አማንዱንꬂ አቶደ ጋር ጾዘ ሎኦ ቆፋ ማቅዳ። 22 አይሁዱንꬅ ክሌ ባዝ በአደስ ኮያነ፤ ማህ ግርኩንꬅ ጭንጫትꬅ ኮያነ። 23 የዝን ኑኒ ማስቃላላ አፋ ሱጹንትደ ክርስቶሳ ሳባካነ። ይና አይሁዱንꬅስ ꬉበ፤ ማህ ግርኩንꬅስ ኤያትꬅ። 24 የዝን ጾዚ ጼግንትዱንꬅስ፥ አይሁደ ማቅን፥ ግርኬ ማቅን ክርስቶሳ ጾዘ ዎልቃን ጾዘ ጭንጫትꬅ። 25 ጾዘ ኤያትꬅታ አስ ጭንጫትꬃፓ አꬋነ፤ ማህ ጾዘ ቦዛትꬅታ አስ ጻላትꬃፓ አꬋነ።
26 ይኬ፥ ታ እሹንꬆ፥ ይን ጼግꬅቶ ቦኦተ፤ አስ ፋና ጭንጫ ማቅደ ጋሙንꬅ፥ ዎልቃራ የዘ ጋሙንꬅ፥ ሹማ ማቅደ ጋሙንꬅ ጼግንትካያ። 27 የዝን ጾዚ ጭንጩንꬃና ዬልሳደስ አላመ የዘ ኤዩንꬃና ዶርዳ፤ ማህ ሚንꬁንꬃና ዬልሳደስ አላመ የዘ ቦዙንꬃና ዶርዳ። 28 ጾዚ Ꮉና አላምተ ዳማ ጋእንትደባዝ ꬋብሶደስ፥ Ꮉና አላምተ ቦዙንꬃና፥ ለቂንትዱንꬃና አኮ Ꮉኖሱንꬃና ዶርዳ። 29 ኦደን ጾዘ ቲኖ ጬቂንትፐ። የዝን ጬቅንትዘ ኦደን ጾዘላ ጨቅንቶ። 30 የዝን ጾዚ ይንትስ ክርስቶስ የሱሳራ ፈተትꬃ የሳደ ጋር ዪዝዳ። ኤ ኑስ ጾዛፓ ጭንጫትꬅ፥ ጽሎትꬅ፥ ጌሻትꬅን ዎዞን ማቅዳ። 31 ይኒ ግሾ፥ ጌሽ ማጻፍተ፥ «ጬቅንትዘ ኦደን ላꬃላ ጬቆ» ያጋይዳ። ኤር. 9:24