1 ታኒ ዋሎትꬃ የዘ አስ ባነ? ታ ሐዋረ ባነ? ታኒ ኑ ላꬃ የሱስ ክርስቶሳ ብእካ? ይን ላꬃራ ታ ዋየ ኣፈ ባነ? 2 ይን ላꬄ ባዝ ማቅደ ግሾ ታ መሉንꬅስ ሐዋረ ማቃንጽኮን፥ ይንትስ ሐዋረ ማቅዳንስ ይን ማርካ።

3 ታና ሐዋረ ባያ ጋዙንꬅስ ታ እንግዘ ማህታ Ꮉኖ። 4 ኑ ይንታፓ ሞኦደስን ኡሻደስን ቱሮ ኑስ አደትꬅ ዎልቃ ባ? 5 Ꮉንዛኮ ሐዋሩንꬅ ፋና፥ ላꬄ እሹንꬅ ፋናን ጴጥሮሳ ፋና፥ አማንዘ ኑ ማቹንꬃና ኤኪ የꬋደስ ኑስ አደትꬅ ዎልቃ ባ? 6 ዎይ ኦቺ ሞኦደስ ቤዝዘ ታናን ባርናባሳን ጻላላ? 7 ፋ ሚሸራ ዎታዳረትꬅ ኦችዘ ኦደ? ዎይ ዎይነ ቱኪ፥ እዝፓ ኣፈ ሞኦሰ ኦደ? ዎይ ዉደ የንግተራ፥ ይና ዉድትፓ ማꬅ ኡዦሰ ኦደ?

8 ታኒ ይኖ አስ ቆፋ ጋር ጋነነ? ህገ ይኖ ጋኦሳነ? 9 ሙሴ ህግተ፥ «ኡዱማ ካꬃ የꬍዘ ቦርዘ ዶንቶ አጭፐ» ጋእንት ጻፍንትዳ። ዬዝን ጾዚ ይኖ ቦራስ ቆፒ ጋይዳነ?ማሄ 25:4፤ 1 ጢሞ. 5:18 10 ጾዚ ይኖ ጋይዳና ኑስ ቆፒ ባነ? ዬ ኑ ግሾስ። ዎትዘን፥ ካꬃ ጌሽዘን ፋና የልዛኖ ኤኮዳ ጋእ ኡፋይሳራ ኦቾደስ ቤዛነ ጋእንት ቱሮ ኑ ግሾ ጻፍንትዳ። 11 ኑኒ ይን ግዳ አያና ቡዱꬅ ቡደዘባዝ ማቅኮ አሾስ ቤዘባዝ ኑ ይንታፓ ኤክኮ፥ ይና ዳማ ባዞነ?ሮመ 15:27 12 መሉንꬅ ይኖ ይንታፓ ኤኮደስ ኡንትስ አደትꬅ ዎልቃ የዝኮ፥ ኑስ ኡንታፓ አꬍዘ አደትꬅ ዎልቃ የነ።

የዝን ኑኒ ክርስቶሳ ዎንገለስ ꬉበ ማቃመ ጋር፥ ኡባነ ገንጫነ ፋትን ይና አደትꬅ ዎልቂትራ ማድንትካያ። 13 ጾዘ ኬꬃ ኦችዘ አሱንꬅ ፋ ካꬅቶ ጾዘ ኬꬃፓ ኤክዛኖ ኤሮሳነ? ማህ ዣርሾ በስተ ኦችዙንꬅ ዣርሽትፓ ኤክዛኖ ኤሮሳነ?ማሄ 25:4፤ 1 ጢሞ. 5:18 14 ይኒ ፋና፥ ዎንገለ ማርክꬍዙንꬅ የሲስ ኮሽዘ ባዝ ዎንገለፓ ኤኮደ ፋና ላꬂ ኪትዳ። ማቶ. 10:10፤ ሉቃ. 10:7

15 የዝን ታኒ Ꮉና አደትꬅ ዎልቅቶ ኡባ አኮን ማድንትካያ። ታኒ Ꮉኖ ጻፍዳና ታ አደተꬅ ዎልቅቶ ቦንችሳደስ ኮይ ባያ። ኦደን ታ ጬቅቶ Ꮉሪ አሾዳንፓ Ꮉይቆ ታስ ሎኦ። 16 ታኒ ዎንገለ ኦህዛና ታና ኪትደ ግሾ ፋትን ታና ጬቅዘባዝ ባያ። ዎንገለ ኦሃንጽኮ፥ ታና ባደ። 17 ታኒ ዎንገለ ካꬊ ሳባክኮ ታስ ዳሞዘ የነ። የዝን ታኒ ዎንገለ ካꬍካይዛራ ኪትን ሳባክዘባዝ ማቅኮ ይኖ ጾዚ ታስ Ꮉዳራ እንግዳ። 18 ዬዝን፥ ታ ዳሞዝታ አኮ? ታኒ ዎንገለ ሳባክዘ ዎደ ታ አደትꬅ ዎልቃ ማድንትካይዛራ ዎንገለ Ꮉሪ ሳባክዛና ታስ ዳሞዘ።

19 ታኒ ኦደስን አሮ ማቆስ፥ የዝን ጋሙንꬃና ኮኦደስ ኡቡንꬅስ አሮ ማቅዳ። 20 ታኒ አይሁዱንꬅ አቶደ ፋና ኡንታራ ኡንታና ማቅዳ። ታ ኦምተ ህገፓ ኦሞራ የዞስ፥ የዝን ህገፓ ኦሞራ የዙንꬅ አቶደ ፋና ህገፓ ኦሞራ የዘ አስ ማቅዳ። 21 ጾዘ ህገፓ ባለራ ከዝካይዛራ፥ ክርስቶሳ ህግትስ ኪትንትተ፥ ህገ ባይዙንꬅ አቶደ ፋና ህገ ባይዘ አስ ፋና ማቅዳ። 22 ታኒ አማኖራ ቦዙዱንꬅ አቶደ ፋና ቦዛ ማቅዳ። ታኒ ኤራꬁንꬅ አቶደ ፋና ኡንታር ኡንታና ማቅዳ። 23 ታኒ ዎንገለ ማባራ አስ ማቃደስን አንጅቶ ሻክንቶደስ፥ Ꮉኖ ኡባ ዎንገለ ግሾ ዪዝዳ።

24 ጋልጋደ ዎꬂ ኡቡንꬅ ዎጻነ፥ የዝን ፈተ ጻላላ ሽልማተ ኤክዛኖ ኤሮሳነ? ይኒ ፋና ይንትን ሽልማቶ ኤኮደስ ዎጾተ። 25 ጋልጋደ አስ ኡቡንꬅ ኡባባዝተ ፋና አሃነ። ኡን ይኖ ላቢዛና ꬋብዘ ዎርቃ ዛዉደ ኤኮደስ። የዝን ኑኒ ላቢዛና መዽና ꬋቦሰ ዎርቃ ዛዉደ ኤኮደስ። 26 ይኒ ግሾ፥ ታኒ ቆፋ ባይዘ አስ ፋና ዎጾስ። ባቆ ዡልትዘ አስ ፋና Ꮉሪ ኩሸ ደንꬆስ። 27 ይኒ ግሾ ታኒ መሉንꬅስ ዎንገለ ሳባክዳንፓ ሱባ ታ ኦምተ ኦልንትደ አስ ማቃመ ፋና ታ አሽቶ ዎልቃራ አህ ታስ ኪትንቶደ ፋና ዪዛነ።