1 ታኒ አስ ቃላራን ኪታንቾ ቃላ ኦህንቶደስ ዳንዳእኮን፥ ታስ ሲቆ ꬋብኮ፥ ጨር ግርዘ ሉለ ፋና። 2 ትንቢተ ኦህዘ እሞትꬅ ታስ የዝኮን፥ ጋꬅ ቆፋ ኡባ ኤርኮን፥ ኤራትꬅ ኡባ የዝኮን፥ ማህ ደረ ደንꬂ መለ በሳ ካንግዘ አማኖ ታስ የዝኮን፥ ሲቆ ꬋብኮ፥ ታና አኮን ማዶስ Ꮉር። ማቶ. 17:20፤ 21:21፤ ማር. 11:23 3 ታስ የዘ ባዝ ኡባ ዳሁንꬅስ እንግኮን፥ መለ አቶ የዝን፥ ታና ታማስ አꬂ እንግኮን፥ ሲቆ ꬋብኮ ታና አኮን ማዶስ።

4 ሲቆ ዳንዳአ። ሲቆ ኬሃ። ሲቆ ቃናቶስ። ሲቆ ጬቅንቶስ። ሲቆ ኡቱርቶስ። 5 ሲቆ ቤዞሰ ባዝ ኦቾስ። ሲቆ ቂርꬎስ። ሲቆ ዥልꬎስ። ሲቆ ፋ ቆህቶ ፋይዶስ። 6 ሲቆ ቱርራ ኡፋይታነ ፋትን ዎርዶራ ኡፋይቶስ። 7 ሲቆ ኡባ ዳንዳአነ፤ ኡባ አማናነ፤ ሎኦ ባዝ Ꮉኖዳ ጋእ፥ ኡፋይሳራ ናጋነ፤ ኡባ ገንጫነ።

8 ሲቆ ዉርሱꬅ የሎደስ ꬋቦስ። የዝን ትንቢተ አቶዳ፤ ዱማ ዱማ ዶናራ ኦህንትዛና አቶዳ፤ ኤራትꬅን አꬎዳ። 9 ኑ ኤራትꬃፓን ኤራꬅቶ ኤራነ፤ ትንቢተፓ ባግቶ ኦህነ። 10 የዝን ፎሎ ማቅደ የእዘ ዎደ ፎሎ ማቅካይዘ አቶዳ።

11 ታኒ ናአ የዘ ዎደ ናአ ጋር ኦህነ፤ ናአ ጋር ቆፓነ፤ ናአ ጋር ቁርቻነ። ታ ዎዛንትደ ዎደ ናአትꬅ Ꮉንቶ አሽዳ። 12 Ꮉተ ፎኦ ባይዘ በሳ ማስቶተራ በእዛንጋራ በእነ፥ የዝን የ ዎደ ኑ ጌሽ በአዳ። Ꮉተ ታ ኤራትꬃፓ ኤራꬅ ኤራነ፥ የዝን የ ዎደ ጾዚ ታና ኤርዛን ጋር ፎሊ ኤሮዳ።

13 ይኬ፥ አማኖ፥ ኡፋይስን ሲቆ፥ Ꮉንꬅ Ꮉይꬑንꬅ ሚንግ የሳዳ። የዝን Ꮉንሳፓ አꬍዘ ሲቆ።