1 ይኒ ግሾ፥ ክርስቶሳ ፋ አሽተ ኑስ ማꬋ ኤክደ ግሾ ይንትን ይና ቆፍተ ሚንግ ጊግንቶተ። ክርስቶሳ ግሾ ጋእ ፋ አሽተ ማꬋ ኤክዘ አꬄ ናጋራ ኦቾስ ጋእ ጋቺ አሽዳ። 2 ይኬፓ አትደ ዎድተ ጾዘ ቆፋ ኦቾደስ ኮዮ ፋትን ኢታ አሾ አሞ ፎሎደስ ባያ። 3 ቲኖ ይን አማኖሰ አሱንꬅ የዛን ፋና የዝዳ። ይን ኢታ አሞራ፥ ቃይጸራ፥ ማꬄራ፥ ቱናትꬅ ደንꬅꬅዘ የꬃራ፥ ቦርስዘ ኤቃ ጎይነራ ዛጋ የዝደ የስታ ማቃዳ። 4 አማኖሰ አሱንꬃራ ይን ጌሻትꬅ ባይዘ ኦቻ ኦቾሰ ግሾ ጋማ ቆፒ ይንታና ጫዣነ። 5 የዝን ኡን ፋጹንꬃላን Ꮉይቂደ አሱንꬃላ አፋ ፍርዶደስ የዘ ጾዘስ ማሄ እንጎዳ። 6 Ꮉይቂደ አሱንꬅስ ዎንገለ ሳባክንትደ Ꮉኒ ግሾስ። ኡን አስ ፋና ፋ አሽተ ፍርድንቶዳ ማህ ፋና አያናራ ጾዘ ፋና ደኦ የሳዳ።

7 ይኬ፥ ኡባ ባዝስ ዉርሱꬅታ ኡክዳ። ይኒ ግሾ፥ ሚንግ ዎሶደስ ዳንዳእንቶደ ፋና ዎፑ ጋይደ ዎዝና የሰ፤ ዎጋራ የዞተ። 8 ሲቆ ጋማ ናጋራ ጌንꬅዘ ግሾ ኡባፓ አꬂ ፈታይ ፈታያ ዎዝናፓ ሲቅንቶተ። 9 ዙዝንግካይዛራ ፈታይ ፈታያ ዛቆትꬃራ ሞኮተ። አዝዜ 10:12 10 ይን ጾዛፓ ዱማ ዱማ አꬎ ኬሃትꬅ እሞ ኤክዳን ፋና ይን ፈታይ ፈታያ ይና እሞቶ ቤዛን ፋና አይኪ ፈታይ ፈታያ ማዶ። 11 የሱስ ክርስቶሳ ባጋራ ኡባ ባዛ ጾዚ ጋላትንቶደ ፋና ኦንን ኦህዘ ጾዛፓ ቃላ ኤክዳን ፋና ኦሆ። ማህ ኦደን ማድዘ ጾዚ ኤስ እንግደ ዎልቂት ፋና ማዶ። ቦንቾን ዎልቃን መꬍናፓ መዽና የሎደስ ኤስ ማቀ። አምንኤ።

12 ታ ባጉንꬆ፥ ይንታና ታማ ፋና ፋታንዘ ማꬋ ግዳራ አꬍዘ ዎደ ክሌ ባዝ Ꮉንደ ፋና አꬂ ቆፕፐተ። 13 የዝን ኤ ቦንችታ ማህ ቆንጭዘ ዎደ ይን ኡፋይስታ ዳማ ማቃደ ፋና ክርስቶሳ ማꬍቶ ይን ኤክዛነ ኡፋይቶተ። 14 ክርስቶሳ ሱንꬅት ግሾ አስ ይንታና ጫዥዘ ዎደ ጾዘ ቦንቾ አያና ይንታላ አፋ ሸምፕዘ ግሾ ይን አንጅንትዱንꬃና። 15 ይንታፓ ኦንን ማꬋ ኤክዘ ሸምፖ ዎꬍዘ ፋና ዎይ ካይስትደ ፋና ዎይ ኢታ ኦችደ ፋና ዎይ ቤዞሰ ባዛ ገልዘ አስ ፋና ዪእ ማꬋ ኤክፐ። 16 ማቆ የዝን፥ ክርስታነ ማቂ ማꬍꬍኮ ክርስቶሳ ሱንꬅት ግሾ ጾዛ ጋላቶ ፋትን ዬልꬍፐ።

17 ፍርዳ ጾዘ አሳላ ደንድዘ ዎደ የልዳ። ይኬ፥ ይና ፍርድታ ቲኒ ኑላ አፋ ደንድዘ ባዝ ማቅኮ፥ ጾዘ ዎንገለስ ኪትንቶሰ አሱንꬅ ዉርሱꬅታ አኮ ማቃደ? 18 ጽሎ ኡንእንት አትዘባዝ ማቅኮ፥ ገኑንꬅን ናጋራንቹንꬅ ዬዝን ዋያደ? 19 ይኒ ግሾ፥ ጾዘ ቆፋ ፋና ማꬋ ኤክዙንꬅ ፋ ሸምፖ Ꮉዳርቶ ፋና መꬍደ፥ አማንꬅዘ ጾዘስ እንግ ሎኦ ባዝ ኦቾ። አዝዜ 11:31