ጳዉሎሳ ጋላትያ አሱንꬅስ
ጻፍደ ኪታ
ገለ
የሱሳ አሽዛ ማቅዳኖ ኦህዘ ዎንገለ ቃላ ዱማ ዱማ በሳ ሳባክንትን፥ አይሁደ ማቆሰ አሱንꬅ አማኒ አማኒ Ꮉንግዘ ዎደ «ክርስቶሳ አማንዙንꬅ ሙሴ ህገ ፎሎደስ ኮሻነነ ኮሾሳ?» ያጋዘ ኦጨ ፈትላ ደንድዳ። የ ዎደ ጳዉሎሳ፥ «ክርስቶሳ አማንዙንꬅ ሙሴ ህገ ፎሎደስ ኮሾስ፤ የሱሳ ግዳ ክለ ደኦ ደማደስ ኮሽዘ ዋና አማኖ። አሱንꬅ ጾዘ ቲኖ ጽሎደስ ዳንዳእዘ አማኖ ጻላላራ» ያጋእ ታማርስዳ። የዝን ኤራꬅ እስያ ግዳ፥ ጋላትያ አዉራጃ የዘ ዎሳ ኬꬅተ የዘ አሱንꬅ ግዳ፥ «አስ ጾዘ ቲኖ ጽሎደስ የሱሳ አማኖ ጻላላ ማቅካይዝን ሙሴ ህገን ፎሎደስ ኮሻነ» ያጋእ ጳዉሎሳ ትምርትቶ ዎብዘ አሱንꬅ የነ።
ጳዉሎሳ ጋላትያ ማጻፈ ጻፍዳና፥ ይና ባላ ትምርትተ ጭምንትደ አሱንꬃና ቱሪ አማኖጎን አማኖ የሳጎ ማሆደስ። ጳዉሎሳ የሱሳ ሐዋረ ማቅዛኖ ጌሽ ኦሄ አይክዳ። ኤዛ ሐዋረ ማህ ጼግደ አስ ማቅካይዝን ጾዚ ማቅዳኖን ኤ ኪትንትዳና አይሁደ ማቆሰ አሱንꬅስ ማቅዛኖ ቆንጭዝ ኦህዳ። ይንላ አይꬂ አስ ጽሎደስ ዳንዳእዘ አማኖ ጻላላራ ማቅዛኖ ኦህነ። ዉርሱꬅ ዞፋንተ አማኖ ደኦ የሱሳ አማነራ በንትዘ ሲቆፓ ጎግዛ ማቅዳኖ ኦህነ።
ኣፈ ቆፉንꬅ
ገለ ቆፋ 1:1-10
ጳዉሎሳ ሐዋረትꬅ አደትꬅ ዎልቃ 1:11—2:21
ጾዘ አꬎ ኬሃትꬅ ዎንገለ 3:1—4:31
ዋሎትꬅን አማኖራ የስ 5:1—6:10
ጻꬅ ቆፋ 6:11-18
1
1 አሳፓ ዎይ አስ ባጋራ ማቅካይዝን የሱስ ክርስቶሳፓን ኤዛ Ꮉይቆፓ ደንꬅደ ጾዘ አደፓ ሐዋረ ማቃደ ጋር ኪትንትደ ታ ጳዉሎሳ፥ 2 ታራ የዘ አማንዘ እሹንꬅ ኡባ፥ ጋላትያ የዘ ዎሳ ኬꬁንꬅስ።
3 ጾዘ ኑ አዳይን ኑ ላꬄ የሱስ ክርስቶሳፓ ይንትስ አꬎ ኬሃትꬅን ሳሮትꬅ ማቀ።
4 Ꮉና ኢታ ዎድትፓ ኑና አሾደስ፥ ኑ ላꬄን፥ ኑ አዳይ ቆፋ ፋና ክርስቶሳ ኑ ናጋርት ግሾ ፋና አꬂ እንግዳ። 5 ጾዝስ መꬍናፓ መዽና የሎደስ ቦንቾ ማቀ። አምንኤ።
ቱሪ ዎንገለ ፈቶ
6 ክርስቶሳ አꬎ ኬሃትꬅተ ይንታና ጼግደ ጾዛ አሺ፥ መለ ዎንገለጎ፥ ይን ኤልሲ፥ ዋይዝ ማቀዛኮ ታና ጋማ ቆፍዛነ። 7 ኤ ፋ ኦምተ መለ ዎንገለ ባያ። ይንታና ባልꬆደስን ክርስቶሳ ዎንገለ ዎቢሳደስ ኮይዘ ኤራꬅ አሱንꬅ የነ ፋትን ቱሪ ዎንገለ ፈቶ። 8 የዝን ኑና ማቅን ዎይ ሳሎ ኪታንቾ ማቅን ኑ ይንትስ ቲኖ ኦህደ ዎንገለፓ ዱሙዽዘ ዎንገለ ይንትስ ኦህዘ ባዝ ማቅኮ፥ ኤ ባድንትዳ ማቀ። 9 Ꮉንፓ ዛጋ ኑ ጋይዳንጋራ Ꮉተን ማህ ጋነ፤ ይን ኤክደ ዎንገለፓ ዱሙዽዘ ዎንገለ ኦደን ይንትስ ኦህኮ የ አꬄ ባድንትዳያ ማቀ።
10 ዬዝን፥ ታና አስ ዎይ ጾዚ ናሾደ ፋና ኮያነነ? ዎይ ታ አስ ኡፋይሶደስ ኮያነ? ታ አስ ኡፋይሶደስ ኮይዘ ባዝ ማቅኮ፥ ክርስቶሳ አሮ ማቆስ።
ጳዉሎሳ ጼግንተ
11 ታ እሹንꬆ፥ ታ ይንትስ ኦህዘ ዎንገልታ አሳፓ ማቆሳኖ ይን ኤሮደ ፋና ታ ኮያነ። 12 ታስ Ꮉይ ዎንገልዛ የሱስ ክርስቶሳ ቆንጭዝዳ ፋትን አሳፓ ኤክካያ ዎይ አስ ታና ታማርስካያ።
13 ታ ዛጋ አይሁደ አማኖ የዘ ዎደ ዋይዝ የዘዛኮ፥ ታኒ አማንዙንꬃና ይቅስሞ ባይꬅ ባይአደስን ꬋብሶደስ ቡቱንትዳኖ ይን ስእዳ። ሐዋ. 8:3፤ 22:4-5፤ 26:9-11 14 አይሁደ አማኖ ናጎራ፥ ታ ዎደ የዘ አይሁደ እሹንሳፓ አꬋነ። ኑ አዱንꬅ ዎግትስን አꬊ ይቅስንታነ። ሐዋ. 22:3
15 የዝን ታ Ꮉጋ ታ እንቲ ሳዝተ የዝን ጾዚ ታና ዶርዳ፤ ፋ አꬎ ኬሃትꬅተ ታና ጼግዳ። ሐዋ. 9:3-6፤ 22:6-10፤ 26:13-18 16 አይሁደ ማቆሰ አሱንꬅስ ዎንገለ ኦሆደ ጋር ጾዚ ፋ ናአያ ታስ ቆንጭዝደ ዎደ ታ ኦደራን ዞርንትካያ። 17 ዎይ ታፓ ቲኖ ሐዋረ ማቅዱንꬃራ የልንቶደስ የሩሳላመ Ꮉንግካያ። የዝን ታ ቲንꬊ አራበ ጋደ ቅትዳ፤ ይንፓ ማቂ ዳማስቆ ካታማ ይእዳ። 18 Ꮉይꬕ በረፓ ሱባ፥ ጴጥሮሳራ የልንቶደስ የሩሳላመ Ꮉንግ ኤራ ታጶ እችን ቃማ ጋምእዳ። ሐዋ. 9:26-30 19 የዝን ላꬄ እሸ ያይቆባ ፋትን Ꮉንኮ ሐዋሩንꬃፓ ኦናን ታ ብእካያ።
20 ታ ይንትስ ጻፍዳና ዎርዶ ማቆሳኖ ጾዘ ቲኖ ይንትስ ማርክꬋነ።
21 ይንፓ ሱባ፥ ታኒ ሶርያን ክልቅያ ጋደ ቅትዳ። 22 ይሁዳ የዘ ዎሳ ኬꬅ አሱንꬅ ታና ኤርካያ። 23 የዝን ኡን፥ «ዛጋ ኑና ባይእዘ አꬄ፥ Ꮉተ ይና ኤ ꬋብሶደስ ኮይዘ አማንቶ ሳባካነ» ያጋዛኖ ስእዳ። 24 ስእዱንꬅ ኡባ ታ ግሾ ጾዛ ጋላትዳ።