ክለ ጫቆ ዕብራዌ 11

አማኖ

1 አማኖ ጋዛና፥ ደንጎዳ ጋእ ኡፋይሳራ አማንንቲ ናግዘ ባዝን ኑ ብእካይዘ ባዝ ብእደ ፋና ማህ ኤክዘባዝ። 2 ዛጋ አዱንꬅ አማኖራ ጾዛፓ ማርካትꬅ ኤክዳ።

3 አላመ ጾዘ ቃላራ መꬍንትዳኖ ኑ አማኖራ ኤራነ። ማህ በንትዘ ባዝ በንቶሰ ባዛፓ መꬍንትዳ።

4 አቤላ ቃኤላፓ አꬍዘ ዣርሾ ጾዝስ ዣርሽዳና አማኖራ። ጾዚ አቤላ እሞትꬅቶ ኡፋይት ኤክደ ዎደ ኤ ጽሎ ማቅዳኖ ማርክꬍዳ። አቤላ መለ አቶ የዝን፥ Ꮉይቂን ኤ አማንታ Ꮉይኖ የሎደስ ኦህንታነ።

5 ሄኖካ Ꮉይቂካይዛራ ሳሎ ኤክንትዳና አማኖራ። ጾዚ ኤዛ ኤክደ ግሾ ኦደን ኤዛ በአደስ ዳንዳእካያ። ሄኖካ ሳሎ ኤክንቶዳንፓ ቲኖ ኤ ጾዘ ኡፋይስደ አስ ማቅዛና ኦህንትዳ። 6 አማኖ ባይዝን ኦደን ጾዝ ኡፋይሶደስ ዳንዳኦስ። ጾዛጎ የእዘ ኦደን ጾዚ የዛኖን ፋና ኮየዙንꬅስ አንጆ እንግዛኖ አማኖደስ ኮሻነ።

7 ኖሄ Ꮉጋ በንቶሰ ባዝስ ጾዚ ኤስ ኦህደ ዎደ ጾዝስ ዣሽቲ፥ ፋናን ፋ ካራ አሱንꬃና አሾደስ አማኖራ ማርካበ ኬጽዳ። የይዝ ፋ አማንትራ አላምቶ ፍርድ፥ አማኖራ በንትዘ ጽሎትꬅ ጾዛፓ ኤክዳ።

8 አብራሃማ ላታ ማህ ኤኮደ ሳአ ቅቶደ ጋር ጾዚ ኤዛ ጼግደ ዎደ መለ አቶ የዝን፥ ኤ አባ ቅትዛኮ ኤራንጽኮን ኪትንትዳና አማኖራ። 9 አብራሃማ ጾዚ ኤስ እንጎዳ ጋይደ ሳእተ በተ አስ ፋና የዝዳና አማኖራ። ጾዚ የ እንጎዳ ጋይዳኖ ኤራ ዎላ ላቶደስ የዘ ይሳቃራን ያይቆባራ ዱማ ዱማ ዱንካነ ግዳ የዝዳ። 10 ኤ፥ ጾዚ ቆፒ ኬጽደ ጻላ ባሳ የዘ ካታማ ናጋነ።

11 ሳራ ፋ ኦምተ ጭንግዳኖ ማቅኮን ኡፋይስ እንግደ ጾዘ አማንንትዳያ ማቅዳኖ ኤርደ ግሾ ዎዳጾደስ ዎልቃ ደንግዳና አማኖራ። 12 ይኒ ግሾ፥ Ꮉይቂደ አስ አዝዘ ፈቲ ꬊራፓ ሳሎ ጾልንቶ ጋራን አባ ጋጻ የዘ ፋይዶ ባይዘ ሻፈ ፋና ኮች የልንትዳ።

13 የንꬅ አሱንꬅ ኡባ ፋስ ጋእንትደ ኡፋይስ ቃላ ኤክካይዛራ አማኖራ Ꮉይቂዳ። የዝን Ꮉኮራ ይኖ ብእ፥ ደንግደ ፋና ማህ፥ ኡፋይሳራ ኤክዳ። ማህ ኡን ሳአላ ዛቆን በተ አስ ማቅዛኖ ኤርዳ። 14 ይኒ ፋና ጋዘ አሱንꬅ ፋ ሳእቶ ናግዛኖ ቆንጨ ቤዛነ። 15 ኡን አሺ ከዝደ ሳእቶ ሱባ ቆፕደባዝ ማቅዛኮ ሱባ ማቃደስ ዳንዳአነ። 16 የዝን Ꮉተ አꬍዘ ሳሎ ጋደ አሙꬋነ። ይኒ ግሾ፥ ጾዚ ኡንትስ ካታማ ጊግዝደ ግሾ «ኡን ጾዝ» ጋእንት ጼግንቶደስ ዬልꬎኦስ።

17 አብራሃማ ፋታንንትደ ዎደ ይሳቃ ዣርሽዳና አማኖራ። ያና ኡፋይስ ቃልቶ ኤክደ አብራሃማ ፋ ፈቲ ናአ ዣርሾደስ ጊግዳ። 18 ጾዚ አብራሃማጎ፥ «ነ ዛርታ ይሳቃ ባጋራ ጼግንቶዳ» ያጋእ ኦህዳ። 19 ጾዚ Ꮉይቆፓ ደንꬆደስ ዳንዳእዛኖ አብራሃማ አማንደ ግሾ ይሳቃ Ꮉይቆፓ ፋጺ ደንድደ ፋና ማህ ኤክዳ።

20 ይሳቃ ዎደፓ Ꮉኖደባዝ ኤሪ ያይቆባን ኤሳዎ አንጅዳና አማኖራ።

21 ያይቆባ Ꮉይቆደስ ይእተ፥ ፈታ ፈታ ዮሰፋ ናኡንꬃና አንጅዳናን ጉፈላ ካቲ ጎይንዳና አማኖራ።

22 ዮሰፋ Ꮉይቆደስ ኡክደ ዎደ እስራኤለ አሱንꬅ ግብጸፓ ኬዞዳኖ ኦህዳና ፋ መቃꬅቶ ይሳደባዝ ኡንታና ኪትዳና አማኖራ።

23 ሙሴ የልንትዳንፓ ሱባ ኤ እንታን ኤ አዳይ ብሽታ ሎኦ ናአ ማቅዳኖ ብእ Ꮉይꬕ አግና አችዳና አማኖራ፤ ኡን ካት አዋጀስ ዣሽትካያ።

24 ሙሴ ድጭዳንፓ ሱባ ግብጸ ካት ኡርት ናአ ጋእንቶዳኖ እጽዳና አማኖራ። 25 ሙሴ ናጋራራ ኤራꬅ ዎደስ ኡፋይቶዳንፓ፥ ጾዘ አሳራ ማꬋ ኤኮዳኖ ዶርዳ። 26 ኤ ቲኖፓ ደንጎደ አንጅቶ ጵርጭ ዪዚ ብእደ ግሾ ግብጸ ቆሎፓ አꬂ ክርስቶሳ ግሾ ቦርንቶዳኖ ጋማ አꬍዘ ዱረትꬅ ማቅዳኖ ኤርዳ።

27 ሙሴ ካት ካች ዣሽትካይዛራ፥ ግብጸፓ ኬዝዳና አማኖራ። በንቶሰ ጾዛ ብእደ አስፋና ዪእ ፋ ቆፍተ ገንጭዳ። 28 Ꮉይቆ ክእዘ ኪታንቹንꬅ እስራኤለ አሱንꬅ አንግስ ናኡንꬃና ዎꬋመ ጋር ሙሴ ፋስካን ሱꬅ ዉጹርኬ ዎጋ ኦችዳና አማኖራ።

29 እስራኤለ አሱንꬅ መላ ሳአራ የꬍዘ ፋና የꬊ፥ ዞቆ አባ ፊንግዳና አማኖራ። የዝን ግብጸ አሱንꬅ ገሎደስ ፋታኒ በአደራ Ꮉꬅታ ኡንታና ቆꬍዳ።

30 እስራኤለ አሱንꬅ እያርኮ ካታማ ሹች ጋሰ ላፑን ዎደ ዉቲ፥ ጎልእዝዳና አማኖራ። 31 ኦላለራ ኤርንትዳና ረአባ ጋደ ጌድዙንꬃና ሞክደ ግሾ ኪትንቶሰ አሱንꬃራ Ꮉይቃንጽ አትዳና አማኖራ።

32 ይኬ፥ መለ ታ አኮ ጋኦ? ጌድዮና ባዝ፥ ባራቀ ባዝ፥ ሳምሶና ባዝ፥ ዮፍታሄ ባዝ፥ ዳዉተ ባዝ፥ ሳሙኤላ ባዝ፥ ማህ ናቡንꬅ ባዝ ኦሆደስ ታስ ዎደ ማቆስ። 33 ኡን አማኖራ ካእቱምቶ ጋምዳ፤ ጽሎትꬃራ አህዳ፤ ጾዚ እንጎዳ ጋይደ ኡፋይስቶ ኤክዳ፤ ጋሙንꬅ ዶና ጎርድዳ፤ 34 ታማ ዎልቃ ዎꬍዳ፤ ሞርኩንꬅ ማሻፓ አትዳ፤ ፋ ላቢስተ ምንግዳ፤ ኦላራ ዎልቃማ ማቅዳ፤ አላጋ ቶራንቹንꬃና ባይእዳ። 35 ማቹንꬅ ኡን እግኑንꬅ Ꮉይቂዱንꬅ Ꮉይቆፓ ፋጽን ኤክዳ።

ማህ መሉንꬅ አꬍዘ Ꮉይቆፓ ደንዶ ኤኮደስ ኮይ ዱማ ዱማ ዋየ ኤክዳ፤ አቻፓ ብልንቶዳኖ እጽዳ። 36 መሉንꬅ አሳራ ቦርንቲ አላንጋራ ጋራፍንትዳ፤ መሉንꬅ ሳንꬃላታራ አጭንቲ አች ኬꬃ ኦልንትዳ። 37 ኡን ሹቻራ ꬎግንትዳ፤ ማጋዘራ ላምእ ኬዚ ጳልቂንትዳ፤ ፋታንንትዳ፤ ማሻራ Ꮉይቂዳ፤ ኡንትስ ኡባ ባዝ ꬋብን ማꬍꬍዳ። ዱሮ ሞኦን ዴሽ ሞኦ ማእ Ꮉንትዳ። 38 ኡንትስ Ꮉና አላምታ ጊጋንጽ እጽን አኮ ባይዘ ሳአን፥ ደረላ አፋ፥ ዎምኦን ኦላ ግዳን ውትዳ።

39 ጾዚ ኡን አማንትባዝ ማርክꬍኮን፥ ይና ኡባ ጋእንትደ ኡፋይስ ቃልቶ ኤክካያ። 40 ጾዚ ኑስ ሎኦ ባዝ ቆፕዳ፤ ይኒ ግሾ ኡን ኑ ባይꬅ ፎሎ ማቆስ።

11:3 መꬎ 1:1፤ ማዝ. 33:6፥ 9፤ ዋሐ. 1:3

11:4 መꬎ 4:3-10

11:5 መꬎ 5:21-24

11:7 መꬎ 6:13-22

11:8 መꬎ 12:1-5

11:9 መꬎ 35:27

11:11 መꬎ 18:11-14፤ 21:2

11:12 መꬎ 15:5፤ 22:17፤ 32:12

11:13 መꬎ 23:4፤ 1 ዜና 29:15፤ ማዝ. 39:12

11:17 መꬎ 22:1-14

11:18 መꬎ 21:12

11:20 መꬎ 27:27-29፥ 39-40

11:21 መꬎ 47:3፤ 48:1-20

11:22 መꬎ 50:24-25፤ ከዘ 13:19

11:23 ከዘ 1:22፤ 2:2

11:24 ከዘ 2:10-12

11:28 ከዘ 12:21-30

11:29 ከዘ 14:21-31

11:30 ኢያ. 6:12-21

11:31 ኢያ. 2:1-21፤ 6:22-25

11:32 ዳኑ. 4:6—5:31፤ 6:11—8:32፤ 13:2-16፤ 11:1-12፤ 1 ሳመ. 16:1፤ 1 ካት 2:11

11:33 ዳነ. 6:1-27

11:34 ዳነ. 3:1-30

11:35 1 ካት 17:17-24፤ 2 ካት 4:25-37

11:36 1 ካት 22:26-27፤ 2 ዜና 18:25-26፤ ኤር. 20:2፤ 37:15፤ 38:6

11:37 2 ዜና 24:21