12
ጾዚ ኑስ አደ
1 ይኬ፥ ꬎነ ፋና ኑ ካንቶ ዉቲ ጋንግ Ꮉኒ ፋና ማርኩንꬅ ኑ ካለ የዘ ግሾ ኑና ꬉቢዘ ኡባኖን አይክንቲ የዘ ናጋራ Ꮉሲ፥ ኑ ቲኖ የዘ ጋልጋደ ዎꬅቶ ገንጭ ዎጾዳ። 2 ኑ አማንትስ ኦገ ቡግዳያን ኑና ፎሎ የልꬅዘ የሱሳላ አፋ ኑ ኣፍቶ ጋዶዳ። የሱሳ ቲኖፓ የዘ ኡፋይስት ግሾ ማስቃላላ ዋየ ዳንዳእ፥ ዬላ Ꮉይቆ ለቂ፥ ጾዛፓ ምዛቅ ዛላራ በትዳ።
3 ይኬ፥ ይን ዶጪ ኡፋይስ ጋቻመ ፋና ናጋራንቹንꬅ እጻ ዳንዳእደ የሱሳ ቆፖተ። 4 ናጋራራ የዘ ቡተ Ꮉጋ ሱꬅ ላሎደ ዎንꬅስ ኤቅንትካያ። 5 ጾዚ ፋ ቃልተ፥ ፋ ናኡንꬅ ፋና ይንታና ዞሪዳኖ ቦትዳ። ኢዮ. 5:17፤ አዝዜ 3:11-12
«ታ ናአዮ፥ ጾዘ ሴረ ለቂፐ፤
ኤ ነና ሴርዘ ዎደ ኡፋይስ ጋችፐ።
6 ላꬂ ፋ ካዽዘ አꬃ ሴራነ፤
ማህ ፋ ናአ ፋና ኤክዛ ኡባ ጋራፋነ»
ያጋይዳ። 7 ጾዚ ይንታና ፋ ናኡንꬅ ፋና ሴርዘ ዎደ ገንጮተ፤ አዳይ ሴሮሰ ናአይ ኦደ? 8 ጾዚ ፋ ናኡንꬃና ኡባ ሴራነ፤ ይን ሴርንታንጽኮ ቱሪ ኤ ናአ ባይዝን ባላኮ ናአ። 9 ማህ ኑና የልደ ኑ አዱንꬅ ኑና ሴራነ፤ ኑንን ኡንታና ቦንቻነ። ዬዝን፥ ኑኒ ደኦ የሳደስ ኑ አያና አደስ ዋይዝ አꬊ አቆሶ? 10 ይኬ፥ ኑ አዱንꬅ ፋስ ሎኦ የሳደ ፋና ኤራꬅ ዎደስ ኑና ሴርዳ። የዝን ጾዚ ኑ ማደስ፥ ኑ ኤ ጌሻትꬅቶ ግሽንቶደ ፋና ሴራነ። 11 ኑ ሴርንትዘ ዎደ ዥልዛነ ፋትን ኡፋይሶስ። የዝን ሱባፓ ሴረꬅቶ ኤክደ አስስ ሴርꬅታ፥ ሳሮ ኩምደ ጽሎትꬅ ኣፈ አፍዛነ።
ዞረን ናግዘን
12 ይኬ፥ ይን አርጋጭደ ኩሽቶን ይን ላቢደ ቡንቅቶ ምንꬆተ።ኢሳ. 35:3 13 ዎቢደ ፋጾደ ጋር ፋትን አꬊ መቃመ ጋር ይን ቶህትስ ሉለ ኦገ ጊግዞተ። አዝዜ 4:26
14 አስ ኡባራ ሳሮ የሳደስን ጌሻትꬃራ የሳደስ ምንጎተ፤ ጌሻትꬅ ባይዝን ኦደን ላꬂ በአደስ ዳንዳኦስ። 15 ይንታፓ ኦደስን ጾዘ አꬎ ከሃትꬅታ ፋጫመ ፋና፥ ማህ ጫሞ ኣፈ ኣፍዘ ጻጶ ዶሊ ጋማ አስ ቱንዘን ꬋብስዘ ቡዱꬅ ፋና ማቃመ ጋር ናግንቶተ። ማሄ 29:18 16 ይን ግዳ ኦላልዘ አስ ዎይ ፈቲ ቶሄ ሙእዘ ካꬃስ ፋ አንግስትሞ ለቂ ባይዝደ ኤሳዎ ፋና አስ የዛመ ጋር ናግንቶተ። መꬎ 25:29-34 17 ሱባፓ ኤሳዎ ይና አንጅቶ ኤኮደስ ኮይዘ ዎደ ካይዳኖ ኤራነ። ኤ ይና አንጅቶ አፉꬃራ ሚንግ ኮይኮን፥ ደንጎደስ ዳንዳእካያ፤ ኤ ናጋራፓ ማቃደስ እጻ ደንግካያ። መꬎ 27:30-40
18 ይን ኩሽተ ቦችንትዘ ሲና ደረጎ፥ ኤጽዘ ታማጎ፥ ꬉማጎ፥ ቃይቃዮጎን፥ ጎተጎ፥ ከዘ 19:16-22፤ 20:18-21፤ ማሄ 4:11-12፤ 5:22-27 19 ሞይዘ ኦለ ዎይ ቃላ ስንትዘ በሳጎ ይእካያ። ይና ቃልቶ ስእደ አሱንꬅ መለ ጉጃ ቃላ ስአመ ፋና ዎስዳ። 20 አኮስ ጋይኮ፥ «መለ አቶ የዝን፥ ጾꬂ የ ደርዛ ቦችኮ፥ ሹቻራ ꬎግንቲ Ꮉይቆ» ያጋእ ኪታ ኡን ቶኮደስ ዳንዳእካያ። ከዘ 19:12-13 21 ይና Ꮉንዘ ባዝታ ጋማ ዳጋንꬅዘ ባዝ ማቅደ ግሾ ሙሴ፥ «ታኒ ዣሽሞራ ጎቅዳ» ያጋይዳ። ማሄ 9:19
22 የዝን ይን ጽዮነ ደርዘጎ፥ ደኦ ጾዚ የዘ የሩሳላመ ካታማ፥ ፈትላ ሺቂ ኡፋይትዘ ጋማ ሙኩል ኪታንቹንꬃጎ ሳሎ ይእዳ። 23 ኡን ሱንꬅታ ሳሎ ጻፍንትደ ዎሳ ኬꬅስ አንግስ ናኡንꬃጎ፥ አስ ኡባ ፍርድዘ ጾዛጎ፥ ፎሎ ማቅደ ጽሎ አሱንꬅ አያናጎ ይእዳ። 24 ክለ ጫቅትስ ግዳ ማቂ እግንꬅዘ የሱሳጎ፥ አቤላ ሱꬃፓ አꬍዘባዝ ኦህዘ ዉጹርክንትደ ሱꬃጎ ይእዳ። መꬎ 4:10
25 ይንትስ ኦህዘ አꬄ ቃልቶ ስኦስ ጋአመ ጋር ናግንቶተ። ዛጉንꬅ ሳአፓ ኦህደ ኪቶ ስአንጽ እጺ አትካይዘባዝ ማቅኮ ዬዝን፥ ሳሎፓ ኦህዘ ቃልቶ ኑኒ ኮዮስ ጋይኮ ዋይዝ አቶደ?ከዘ 20:22 26 የ ዎደ ኤ ቃልታ ሳአ ኤንእዝዳ። የዝን Ꮉተ ታኒ፥ «ሳአ ጻላላ ማቅካይዝን ፈቲ ቶሄ ማህ ሳሎ ኤንእሳዳ» ያጋይዳ። ሐጌ 2:6 27 «ፈቲ ቶሄ ማህ» ጋዘ ቃልታ ኤንእንቶሰባዝ ሚንግ የሳደ ጋር ኤንእንትዘ መꬍንትደ ባዝታ ꬋቦዳኖ ቤዛነ።
28 ኑኒ ኤንኦደስ ዳንዳኦሰ ካእቱሞ ኤክዘ ግሾ ጾዛ ጋላታነ፤ ጾዛ ኡፋይስዘ ኦገራ ቦንቾራን ዣሽሞራን ኤዛ ጎይኖዳ። 29 ይኬ፥ ኑ ጾዘ ቱርፕ ምችዘ ታማ። ማሄ 4:24