1 ጾዘን ላꬄ የሱስ ክርስቶሳ አሮ፥ ያይቆባ፥ ሳአ ኡባ ላልንትደ ታጶ ላምእ ኮቹንꬅስ ኪትደ ኪታ። ማቶ. 13:55፤ ማር. 6:3፤ ሐዋ. 15:13፤ ጋላ. 1:19

ሳሮ ይንትስ ማቀ።

2 ታ እሹንꬆ፥ ይንታና ዱማ ዱማ ፋታና የልዘ ዎደ ይን ሎኦ ባዝ ደንግደ ፋና ኩሙꬅ ኡፋይሳራ ኤኮተ። 3 ይን አማንቶ ፋታንዛና ዳንዳአ ይንትስ እንግዛኖ ኤራነ። 4 ይን ዉርሱꬅ የሎደስ ዳንዳእኮ አኮ ፋጨ ባይዝን ፎሎን ኩሙꬅ ማቃደ ፋና ኦችዛ ማቀ። 5 ይንታፓ ኦደስን ጭንጫትꬅ ꬋብኮ ጾዝ ዎሶ። ኤስ እንግንቶዳ። ጾዚ ኦደን ቦርካይዛራ ኡቡንꬅስ ኬሃትꬃራ እንግዘ ጾዚ። 6 የዝን ኤ ዎስዘ ዎደ ሶእካይዛራ አማኖራ ጾዝ ዎሶ። ሶእዘ ኦደን ባቆ ኡርቂን ኤንእዘ አባ ጋር። 7-8 ላምእ ቆፋ የዘን ፋ ኦግተ ኤቆሰ ኦደን ላꬃፓ አኮን ደንጎዳ ጋእ ቆፕፐ።

9 አማንዘ ዳሁንꬅ፥ ጾዚ ኡንታና ꬎቅ ኦችዘ ዎደ ኡፋይቶ። 10 ማህ አማንዘ ዱሩንꬅ ጾዚ ኡንታና ዝቂ ኦችዘ ዎደ ኡፋይቶ። ዱረ አሱንꬅ ፉ ፋና ꬋቦዳ።ኢሳ. 40:6-7 11 አዋ ፋ ምሻራ ከዛነ ማቶ መልዛነ፥ ፉꬍታን ጉፋነ፤ ኤ ሎኦትꬅታን ꬋባነ። ይኒ ፋና፥ ዱረ አሱንꬅ ፋ ኦችተ ጨር ላልተራ ꬋቦዳ።

12 ማꬋ ጋሚ ኣꬍዳንፕ ሱባ፥ ጾዚ ፋና ሲቅዙንꬅስ እንጎዳ ጋእ ቃላ ገልደ ደኦ ዎርቃ ዛዉደ ኤኮደ ግሾ ማꬍተ ገንጭዘ አስ አንጅንትዳያ። 13 ኦደን ፋታንንትዘ ዎደ «ታና ጾዚ ፋታናነ» ጋይፐ። ጾዚ ኢታራ ፋታኖስ፤ ማህ ኤ ኦደን ፋታኖስ። 14 የዝን ፈቲ ፈቲ አስ ፋ ኢታ አሞራ ጎችንትዘ ዎደን ጭምንትዘ ዎደ ፋታንንታነ። 15 ይንፓ ሱባ፥ አሞትꬅ ዎዳጺ ናጋራ የላነ፤ ማህ ናጋራ ድጪ Ꮉይቆ የላነ።

16 ታ ሲቆ እሹንꬆ፥ ጭምንትፐተ። 17 ሎኦ እሞን ኩሙꬅ አንጆ ኡባ ሳሎፓን ሳሎ ፎእቶ መꬍደ ጾዘ አደፓ የእነ። ጾዚ ዳሾ ፋና ኡባ ዎደ ላምንቶስ። 18 ኑኒ፥ ኤ መꬍደ ባዝስ አንግስ ማቃደ ፋና ኑና ቱሪ ቃላራ ቆፒ የልዳ።

19 ታ ሲቆ እሹንꬆ፥ Ꮉኖ ቆፖተ። አስ ኡባ ስኦደስ ኤልሶ፥ የዝን ኦሆደስን Ꮉንቆደስ ኤልስፐ። 20 አስ Ꮉንቆ ጾዘ ኮይዘ ጽሎትꬅ ኮኦስ። 21 ይኒ ግሾ፥ ቱና ኦቻን ኢታ ባዝ ኡባ Ꮉሲ፥ ጾዚ ይን ዎዝንተ ቱክደ ይን ሸምፕቶ አሾደስ ዳንዳእዘ ቃላ አዳትꬃራ ኤኮተ።

22 የዝን ጾዘ ቃላ ኦቻላ ፌሾተፕ አትን ይን ኦምተ ባልንትተራ ስእዙንꬃና ጻላላ ማቅፈተ። 23 ቃላ ስእ ኦቾሰ አስ፥ ኤ ፋ ስንቶ ማስቶተራ በእዘ አꬄ ፋና። 24 ኤ ፋ ስንቶ ብእ ቅታነ፥ የዝን ኤ አኮ አዝዛኮ ኤልሲ ቦታነ። 25 የዝን ኦደን ናጋራ አሮትꬃፓ ኬስዘ ፎሎ ህገ ቆፒ ብእ፥ ሚንግ ኤቅዘ፥ ስእዳኖ ቦትካይዛራ ኦቻላ ፌሽዘ አꬃይ፥ ፋ ኦቻ ኡባነ አንጅንቶዳ።

26 ፋ እልአንꬅቶ ናግካይዛራ ጎይናነ ጋዘ አꬃይ ፋና ጭማነ፤ ኤ ጎይንታ Ꮉሪ። 27 ጾዘ አዳይ ቲኖ ቦረ ባይዘ ጌሽ ጎይኖ Ꮉኖ፦ እንዳን አደን ባይዘ ናኡንꬃናን አዝኒ ባይዙꬃና ኡን ማꬍተ ማደን አላመ ቱናፓ ፋና ናገ።