1 ይንፓ ማቂ፥ የሱሳ ጽባርዮሳ ጋዘ ጋልላ አባፕ ሰኮ ጋጻ ፊንግዳ። 2 ኤ Ꮉርጋንቹንꬃና ፋꬂ ክሌ ባዝ ኦችዳኖ ብእደ ግሾ ጋማ አሱንꬅ ኤዛ ካልዳ። 3 የሱሳ ደረላ ኬዚ፥ የይጋ ፋ ታማሩንꬃራ ዎላ በትዳ። 4 አይሁዱንꬅ ቦንችዘ ፋስጋ ባአለ ኡክዳ። 5 የሱሳ ጋማ አሱንꬅ ፋጎ የእዛኖ ብእ ፍልጶሳጎ፥ «Ꮉንꬅ አሱንꬃና ኡባ ሙሳደስ ማቃደ ካꬃ አባፓ ዎንጎደ?» ያጋይዳ። 6 ኤ ይኖ ፍልጶሳ ፋታኖደስ ጋይዳፕ አትን ኤ ፋ ኦምተ አኮ ኦቾድየዛኮ ኤራነ።

7 ፍልጶሳ ማህ የሱሳጎ፥ «መለ አቶ የዝን፥ ኦማ ኦማ፥ ፈቲ ፈቲ ባርꬅ የልꬆደስ፥ ላምእ ጼት ድናረራ *ድናረ ጋዘ ብራ፦ ፈቲ ድናረ ፈቲ አስ ፈቲ ዎደ ኦቺ ፌዢ ኤክዘ ብራ። ላምእ ጼት ድናረ ፈቲ አስ ፈቲ በረ ባጋ ኦቺ ኤክዘ ብራ ዛዋ። (ማቶ 20:2) ቦኦተ። ቦራ ዎንግኮን ማቆስ» ያጋይዳ።

8 ማህ የሱሳ ታማሩንꬃፓ ፈተ፥ ስሞን ጴጥሮሳ እሸ እንድርያሰ፥ 9 «እችን በሸ ባንጋ ቦራን ላምእ ሞሎ አይክደ ፈቲ ናአ Ꮉነ የነ፥ የዝን Ꮉንꬅ አሱንꬅ ኡባስ ይና አኮ ማዶደ?» ያጋይዳ።

10 የሱሳ ፋ ታማሩንꬃጎ፥ «አሱንꬃና በትꬆተ» ያጋይዳ። ይና በስተ ጋማ ቡጫ የነ፤ አሱንꬅ ኡባ በትዳ። ꬊራꬅ አሱንꬅ ፋይድታ እችን ሙኩል ማቃዳ። 11 የሱሳ ቦርዛ ኤኪ ጾዝ ጋላቲ ማቂ ፋ ታማሩንꬅስ እንግዳ። ኡንትን በትደ አሱንꬅስ የልꬅዳ። ሞልቶን ኤኪ ይኒ ፋና ዪዚ እንግን፥ አሱንꬅ ፋ ኮይዳን ጋር ሙይዳ። 12 ኡን ኡቡንꬅ ምዥዳንፓ ሱባ የሱሳ ፋ ታማሩንꬃጎ፥ «ፈትባዝን ኢታመ ጋር አትደ ጉፍቶ ሺሾተ» ያጋይዳ። 13 ይኒ ግሾ፥ ኡን ኡባ ሺሽዳ። አሱንꬅ ሙእን አትደ ባንጋ ቦራ ጉፋ ሺሽን ታጶ ላምእ ሌማተ ማቅዳ።

14 አሱንꬅ የሱሳ ኦችደ ክሌ ባዝ በኤዘ ዎደ «Ꮉይ ቱሮ Ꮉና አላምተ የኦዳ ጋእንትደ ናብዛ» ያጋይዳ። 15 የሱሳ ኡን ኤዛ አይኪ ዎልቃራ ካት ማሆደስ Ꮉንዛኖ ኤሪ፥ ፋስ ደረላ ማህ ከዝዳ።

16 ሳእታ ኡጉርን የሱሳ ታማሩንꬅ አባጎ ዎꬍዳ። 17 ሳእታ ቃምደ ግሾን የሱሳ Ꮉጋ ኡንታጎ ይእካይዘ ግሾ ኤ ታማሩንꬅ ጎንግተ ገሊ አባ ፊንግ ቅፍርናሆመ ቅቶደስ ደንድዳ። 18 ዳማ ባቆ ባቂደ ግሾ አባ Ꮉꬅታ ኤንእዳ። 19 እችን ዎይ እዝፑን ክሎ ምትረ ማቃደ ጋር ኡን አባላ Ꮉንግዳንፓ ሱባ የሱሳ አባላ የꬍተራ የእዛኖ ብእ ዣሽትዳ። 20 የዝን ኤ፥ «ዣሽትፐተ፥ ታና» ያጋይዳ። 21 ኡን ኡፋይት ኤዛ ጎንግተ ገልꬅዳ፤ ኢራ ጎንግዘ ኡን Ꮉንግዘ አባ ጋጻ የልዳ።

22 ዎንትስት ዎደ አባፓ ሰኮ ጋጻ አትደ ጋማ አሱንꬅ ፈቲ ጎንገ ጻላላ የዛኖ ብእዳ። የሱሳ ፋ ታማሩንꬃራ ጎንግተ ገሊ፥ ኡንታራ Ꮉንጎሳኖን ኡን ፋ ፋስ Ꮉንግዳኖ ብእዳ። 23 የዝን ጽባራዶሳፓ መለ ጎንጉንꬅ የሱሳ ጾዝ ጋላትን፥ አሱንꬅ ቦራ ሙይደ በስቶ ይእዳ። 24 አሱንꬅ የሱሳ ዎይ ኤ ታማሩንꬅ እዘ ባይዛኖ ብእ፥ የሱሳ ኮዮደስ ጎንግተ ገሊ ቅፍርናሆመ ቅትዳ።

25 አሱንꬅ የሱሳ አባፓ ሰኮ ፍንꬃ ደንግደ ዎደ «አስታማርዛዮ፥ Ꮉነ አይደ ነ ዪዶ?» ያጋይዳ።

26 የሱሳ ማህ፥ «ታኒ ይንትስ ቱሮ ቱሮ ጋነ፤ ይን ታና ኮይዛና ቦራ ሙእ ምዥደ ግሾ ፋትን ክሌ ባዝ ብእደ ግሾ ባያ። 27 ꬋብዘ ካꬃስ ኦችፐተ፥ የዝን መዽና ደኦ የዘ ካꬃ እንግዘ አስ ናአይስ ኦቾተ። ኤዛን ጾዘ አዳይ አታሚ ትልዝዳ።»

28 ዬዝን ኡን፥ «ኑኒ ጾዘ ኦቻ ኦቾደስ አኮ ኦቾደ?» ያጋእ የሱሳ ኦጭዳ።

29 የሱሳ ማህ፥ «ይን ኦቾደ ጋር ጾዘ ኮይዘ ኦችታ Ꮉኖ፦ ኤ ኪትዳያ አማኖደ ፋና» ያጋይዳ።

30 ኡን ማህ፥ «ኑኒ ብእ፥ ነና አማኖደ ጋር አኮ ክሌ ባዝ ነ ቤሳደ? ነ አኮ ኦቾደ? 31 ጌሽ ማጻፍተ፥ ‹ኡን ማአደ ጋር ቦራ ሳሎፓ እንግዳ› ጋእንት ጻፍንትዳንጋራ ኑ አዱንꬅ አኮ ባይዘ ጋናሳ ማና ሙይዳ» ያጋይዳ። ከዘ 6:4፥ 15፤ ማዝ. 78:24

32 የሱሳ፥ «ታ ይንትስ ቱሮ ኦህነ፤ ይንትስ ሳሎፓ ቱሪ ቦራ እንግደ ታ አዳይፕ አትን ሙሴ ባያ። 33 ይኬ፥ ጾዚ እንግዘ ቦራ ሳሎፓ ዎꬍደ አላመስ ደኦ እንግዛያ» ያጋይዳ።

34 ኡን ማህ፥ «ላꬆ፥ ኑስ የ ቦርዛ ኡባ ዎደ እንጎ» ያጋይዳ።

35 የሱሳ፥ «ታኒ ደኦ ቦራ፤ ታጎ የእዘ ኦደን ሙሎ ናይꬎስ። ማህ ታና አማንዘ አꬄን ባርꬎስ። 36 የዝን ታ ይንትስ ኦህዳ፤ ይን ታና ብእዳ፥ የዝን አማንካያ። 37 ታ አዳይ ታስ እንግደ ኡቡንꬅ ታጎ ዮኦዳ፤ ማህ ታጎ የእዛ ኦናን ባለ ዳኮስ። 38 ታኒ ታ ኮይዘ ባዝ ኦቾደስ ማቅካይዝን ታና ኪትደ ኮይዘ ባዝ ኦቾደስ ሳሎፓ ይእዳ። 39 ታና ኪትደ ኮይዛና Ꮉኖ፦ ታኒ ኤ ታስ እንግደ ኡቡንꬃና ዉርሱꬅ ዎደ Ꮉይቆፓ ደንꬆደ ጋራፕ አትን ፈተን ꬋቦደ ጋር ኮዮስ። 40 ይኬ፥ ታ አዳይ ኮይዛና ይኖ፦ ናአያ ብእ አማንዘ ኡባ መዽና ደኦ ኤኮዳ፤ ታኒ የንꬃና ኡባ ዉርሱꬅ ዎደ መዽና ደኦስ Ꮉይቆፓ ደንꬆዳ» ያጋይዳ።

41 የሱሳ፥ «ታኒ ሳሎፓ ዎꬍደ ቦራ» ጋይደ ግሾ አይሁዱንꬅ ኤላ ዙዝንግዳ። 42 ኡን፥ «Ꮉይኒ ኑ ኤ አዳያን ኤ እንቶ ኤርዘ ዮሰፋ ናአ የሱሳ ባነ? ዬዝን፥ ኤ ዋይዝ፥ ‹ታ ሳሎፓ ዎꬍዳ› ጋዉደስ ዳንዳኤ?» ያጋይዳ።

43 የሱሳ ማህ፥ «ፈተ ፈተራ ዙዝንግዛኖ አሾተ። 44 ታና ኪትደ ታ አዳይ ታጎ ክእዘ አሳፓ አትን ታጎ ዮኦደስ ዳንዳእዘ ኦደን ባያ። ታ ዉርሱꬅ ዎደ ኤዛ መዽና ደኦስ Ꮉይቆፓ ደንꬆዳ። 45 ናቡንꬅ፥ ‹አስ ኡባ ጾዛፓ ታማርዱንꬃና ማቃዳ› ጋእ ጻፍዳ። አዳያ ስእዘን ኤፓ ታማርደ ኦደን ታጎ የእነ። ኢሳ. 54:13 46 ጾዘ ካለፓ ይእዳይፕ አትን አዳያ በኤዘ ኦደን ባያ፤ ኤ ጻላላ አዳያ ብእዳ።

47 «ታ ይንትስ ቱሮ ቱሮ ጋነ፤ ታና አማንዘ መዽና ደኦ የነ። 48 ታኒ ደኦ ቦራ። 49 ይን አዱንꬅ አኮ ባይዘ ጋናስ ሳአ ማና ሙእዳ፥ የዝን Ꮉይቂዳ። 50 ሳሎፓ ይእደ ቦራ Ꮉያ፤ Ꮉይ ቦርዛ ሙእደ ኦደን Ꮉይቆስ። 51 ሳሎፓ ይእደ ደኦ ቦርዘ ታና። ኦደን Ꮉይ ቦርዛ ሙእኮ መꬍናስ የሳዳ። ማህ Ꮉና አላምታ ደኦ የሳደ ጋር ታኒ ይንትስ እንጎደ ቦርዘ ታ አሽቶ» ያጋይዳ።

52 አይሁዱንꬅ፥ «Ꮉይ አꬃይ ፋ አሽቶ ኑ ማአደ ጋር ኑስ ዋይዝ እንጎደስ ዳንዳኤ?» ያጋእ ፋ ግዳ ዎላ ላልዳ።

53 ይኒ ግሾ፥ የሱሳ ኡንታጎ፥ «ታኒ ይንትስ ቱሮ ቱሮ ጋነ፤ አስ ናአይ አሽቶ፥ ይን ማአንጽኮ፥ ማህ ኤ ሱꬅቶ ይን ኡዣንጽኮ፥ ይንትስ ደኦ ባያ። 54 ታ አሽቶ ሙእዘን ታ ሱꬅቶ ኡዥዘ አꬄስ መዽና ደኦ የነ። ታኒ ዉርሱꬅ ዎደ ኤዛ Ꮉይቆፓ ደንꬆዳ። 55 ታ አሽታ ቱሪ ካꬃ፤ ታ ሱꬅታን ቱሪ ኡሽ። 56 ታ አሽቶ ሙእዘን ታ ሱꬅቶ ኡዥዘ አꬄ ታ ግዳ የነ፤ ታንን ኤ ግዳ የነ። 57 ደኦ አዳይ ታና ኪትን፥ ታ ኤ ባጋራ ደኦ የዛንጋራ፥ ታና ሙእዘ አꬄን ታ ባጋራ ደኦ የሳዳ። 58 ሳሎፓ ዎꬍደ ቦርዘ Ꮉያ፦ ይን አዱንꬅ ሙእ Ꮉይቂደ ማና ፋና ባያ፤ Ꮉይ ቦርዛ ሙእዘ አꬄ መዽና የሳዳ» ያጋይዳ።

59 የሱሳ ቅፍርናሆመ ካታማ አይሁደ ዎሳ ኬꬃ Ꮉኖ ታማርስዳ።

60 የሱሳ ታማሩንꬃፓ ጋማ ባግታ ይኖ ስኤዘ ዎደ «Ꮉና ገሎሰ ትምርተ፤ ኦደስ ገለ?» ያጋይዳ።

61 የሱሳ ፋ ታማሩንꬅ ይንስ ዙዝንግዳኖ ኤሪ፥ «Ꮉና ይንታና ባልꬃነ? 62 ዬዝን፥ አስ ናአይ ቲኖ ፋ የዘ በሳ ኡደ ከሳደራ ይን ብእዛኮ ዋያደ? 63 ጌሽ አያና ደኦ እንጋነ፤ አስ ዎልቃ አኮን ማዶስ። ታ ይንትስ ኦህዘ ቃልታ ደኦ እንግዘ ጌሽ አያናፓ ይእዳ። 64 የዝን ይን ግዳ አማኖሱንꬅ የነ» ያጋይዳ። አማኖሱንꬅ ኦድ የዛኮ የሱሳ ቲኖፓን ኤራነ። ማህ ፋና አꬂ እንጎደ ኦና የዛኮ ኤራነ። 65 ማህን የሱሳ፥ «አዳይ ዮኦ ጋይካይዘ ኦደን ታጎ ዮኦደስ ዳንዳኦስ ጋእ ታ ኦህዛና ይኒ ግሾ» ያጋይዳ።

66 ይኒ ባጋራ፥ የሱሳ ካልዙንꬃፓ ጋሙንꬅ ኤዛ አሺ ሱብ ማቅዳ፤ ማህን ኤራ Ꮉንግካያ። 67 የሱሳ ታጶ ላምእ ፋ ታማሩንꬃና፥ «ይንትን አሺ ቅቶደስ ኮያነ?» ያጋእ ኦጭዳ።

68 ስሞን ጴጥሮሳ ማህ፥ «ላꬆ፥ ኑኒ ኦደጎ ቅቶደ? ኔስ መዽና ደኦ ቃላ የነ። ማቶ. 16:16፤ ማር. 8:29፤ ሉቃ. 9:20 69 ነ ጾዘ ጌሽ ማቅዳኖ ኑኒ አማናነን ኤራነ» ያጋይዳ።

70 የሱሳ ኡንታጎ፥ «ታ ይንታና ታጶ ላምኡንꬃና ዶርካነ? የዝን ይንታፓ ፈተ ጻላሄ» ያጋይዳ። 71 የሱሳ ይኖ ጋይዳና ስሞና ናአይ አስቆሮቱ ይሁዳ ግሾ። ይሁዳ የሱሳ አꬂ እንጎደስ የዘ ታጶ ላምእ ታማሩንꬃፓ ፈታ።