1 ይንፓ ማቂ፥ የሱሳ አይሁዱንꬅ ቦንችዘ ባለስ የሩሳላመ ቅትዳ። 2 የሩሳላመ ዱሮ ፉርꬅ ካለ እብራይስጠ ዶናራ ቤተሳይዳ ጋዘ ተቅንትደ ጌና የነ። የ ተቅንት የዘ Ꮉꬅቲ ካለ ካንግዘን ኬእዘን እችን ኦገ የነ። 3 [ይነ Ꮉꬅታ ኤንእንትዛኖ ናግዘ] ጋማ Ꮉርግንትዙንꬅ፥ ቆቁንꬅ፥ ዎቡንꬅን ጋላ ስልዱንꬅ ዎይእዳ። 4 [አኮስ ጋይኮ፥ ፈቲ ፈቲ ቶሄ ላꬄ ኪታንቾ ጌንተ ዎꬊ Ꮉꬅቶ ኤንእዛነ። Ꮉꬅታ ኤንእዘ ዎደ ቲኒ ገልደ አꬄ ፋና አይክደ አኮ Ꮉርገፓ ፋጻነ።]*ፈቲ ፈቲ ዛጋ ማጻፉንꬅ ፋይዶ Ꮉይꬕስ ቲኖ ባግቶን ፋይዶ ኦይዲ ጉጆስ። 5 ይና በስተ Ꮉስታም ኦስፉን በረ Ꮉርግንትደ ፈቲ አስ የነ። 6 የሱሳ እዘ ዎይእደ አꬃ ብእ፥ ማህ ጋማ ዎደ Ꮉርግንትዳኖ ኤሪ አꬄጎ፥ «ፋጾደስ ኮያነ?» ያጋይዳ።

7 Ꮉርጋንችዘ ማህ፥ «ላꬆ፥ Ꮉꬅታ ኤንእንትዘ ዎደ ታና Ꮉꬅተ ኦልዘ አስ ባያ። ታ ገሎደስ ይዮደር መሉንꬅ ታፓ ቲኒ ገላነ» ያጋይዳ።

8 የሱሳ ኤጎ፥ «ደንዲ ኤቆ፤ ነ አልግዛ ቶኪ ቅቶ» ያጋይዳ። 9 አꬃይ ኢራ ፋጽዳ፤ ፋ አልግዛ ቶኪ ቅትዳ።

ይና ሳምባታ ዎደ Ꮉንዳ። 10 ይኒ ግሾ፥ አይሁዱንꬅ ፋጽደ አꬄጎ፥ «Ꮉይኖ ሳእታ ሳምባታ፤ ኔኒ ነ አልግዛ ቶክዛና ዎጋ ባያ» ያጋይዳ። ናህ. 13:19፤ ኤር. 17:21

11 የዝን አꬃይ፥ «ታና ፋꬄዘ፥ ‹ነ አልግዛ ቶኪ ቅቶ› ጋይዳ» ያጋእ ማህዳ።

12 ኡን ኤጎ፥ «ነና፥ ነ አልግዛ ቶኪ ቅቶ ጋይደ ኤ ኦደ?» ያጋእ ኦጭዳ።

13 የዝን የሱሳ ይና በስተ ጋማ አስ ግዳፓ ደሽ ጋይደ ግሾ አꬃይ ፋና ፋꬅደ ኦደ የዛኮ ኤርካያ። 14 የሱሳ ሱባፓ የ አꬃ ጾዘ ኬꬃ ደንግ፥ «Ꮉይቼ፥ ነ ፋጽዳ፤ Ꮉንፓ አꬍዘ ኢታ ባዝ ነና የላመ ጋር ማህ ናጋራ ኦችፐ» ያጋይዳ። 15 ይንፓ ማቂ፥ አꬃይ Ꮉንግ ፋና ፋꬅደ የሱሳ ማቅዛኖ አይሁዱንꬅስ ኦህዳ።

16 የሱሳ ይኖ ሳምባታ ኦደ ኦችደ ግሾ አይሁዱንꬅ የሱሳ ባይꬄ አይክዳ። 17 የሱሳ ማህ፥ «ታ አዳይ ኡባ ዎደ ኦቻነ፤ ታንን ኦቾደስ ቤዛነ» ያጋይዳ።

18 የሱሳ ሳምባታ ቦንችካይዘ ግሾ ጻላላስ ማቅካይዝን ጾዛ ፋ አደ ጋእ ፋና ጾዛራ ዎልክዝደ ግሾ አይሁዱንꬅ ኤዛ ዎꬎደስ ቲኖንፓ ምንꬂ ኮይዳ።

19 የሱሳ ማህ፥ «ታ ይንትስ ቱሮ ቱሮ ጋነ፤ ናአይ ፋስ አኮን ኦቾደስ ዳንዳኦስ። ኤ ፋ አዳይ ኦቾደራ ብእዳኖ ጻላላ ኦቻነ። አዳይ ኦችዛኖ ናአይን ኦቻነ። 20 አዳይ ፋ ናአያ ካዽዘ ግሾ ኦችዘ ኦቻ ኡባ ፋ ናአያ ቤዛነ። ይን ጋማ ቆፖደ ጋር ኤ Ꮉንፓ አꬍዘ ኦቻ ፋ ናአያ ቤዞዳ። 21 አዳይ Ꮉይቂዱንꬃና Ꮉይቆፓ ደንꬂ ኡንትስ ደኦ እንግዛንጋራ ናአይን ፋ ኮየዙንꬅስ ደኦ እንጋነ። 22 አዳይ ናአይስ ፍርዶደ ጋር አደትꬅ ዎልቃ እንግዳፕ አትን ኤ ኦናን ፍርዶስ። 23 ይኖ ኤ ኦችዳና አስ ኡባ አዳያ ቦንችዛን ጋር ናአያን ቦንቾደ ፋና። ናአያ ቦንቾሰ ኦደን ናአያ ኪትደ አዳያን ቦንቾስ።

24 «ታ ይንትስ ቱሮ ቱሮ ጋነ፤ ታ ቃልቶ ስእዘስ ታና ኪተዛ አማንዘስ መዽና ደኦ የነ። ኤ Ꮉይቆፓ ደኦ ፊንግደ ግሾ ፍርድንቶስ። 25 ታ ይንትስ ቱሮ ቱሮ ጋነ፤ Ꮉይቂደ አሱንꬅ ጾዘ ናአይ ቃልቶ ስእዘ ዎደ የኦዳ፤ ይናን Ꮉተ። ኤ ቃልቶ ስእዘ ደኦ የሳዳ። 26 አዳይ ፋስ ደኦ የዛን ፋና ናአይስን ደኦ የሳደ ፋና እንግዳ። 27 ናአይ አስ ናአ ማቅደ ግሾ አዳይ ናአይስ ፍርዶደ ጋር አደትꬅ ዎልቃ እንግዳ።

28 «ቦዛ የዙንꬅ ኤ ቃልቶ ስእ ደንድዘ ዎደ የኦደ ግሾ Ꮉነ ጋማ ቆፕፐተ። 29 ሎኦ ኦችዱንꬅ ደኦ ደንድደስ ማህ ኢታ ኦችዱንꬅ ፍርዳ ኤኮደስ ቦዛፓ ደንዶዳ። ዳነ. 12:2

30 «ታኒ ታ አደትꬅ ዎልቃራ አኮ ባዝን ኦቾደስ ዳንዳኦስ። ጾዘ ታስ ኦህዳን ጋር ፍርዳነ። ታኒ ታና ኪትደ ኮይዘ ባዝ ኦቻነፕ አትን ታ ኮይዘ ባዝ ኦቾሰ ግሾ ታ ፍርድታ ቱሮ።

31 «ታኒ ታ ባዝ ማርክꬍኮ ታ ማርካትꬅታ ቱሮ ማቆስ። 32 ታ ባዝ ማርክꬍዘ መለ የነ፤ ኤ ታ ባዝ ማርክꬍዛና ቱሮ ማቅዛኖ ታ ኤራነ።

33 «ይን ዋሐንሳጎ አስ ኪትን ኤ ቱርስ ማርክꬍዳ።ዋሐ. 1:19-27፤ 3:27-30 34 ታ ይኖ ይንትስ ኦህዛና፥ ይን አቶደ ጋር ጋይዳፕ አትን አስ ማርካትꬅ ታስ ኮሽን ባያ። 35 ዋሐንሳ ጎጋ ጋር ኤጽዘ ፎኦ። ይን ኤራꬅ ዎደ ኤ ፎእተ ኡፋይቶደስ ኮይዳ።

36 «የዝን ታስ ዋሐንሳፓ አꬍዘ ማርካ የነ። ታ ኦቾደ ጋር ታ አዳይ ታስ እንግደ ኦችታ ታ ባዝ ማርክꬋነ፤ አዳይ ታና ኪተዛኖ ቤዛነ።

37 «ማህን ታና ኪትደ አደን ፋ ኦምተ ታ ባዝ ማርክꬋነ። ይን ኤ ቃልቶ ሙሎ ስእካያ ዎይ ኤ ብሽቶ ብእካያ። ማቶ. 3:17፤ ማር. 1:11፤ ሉቃ. 3:22 38 ኤ ኪተዛኖ ይን አማኖሰ ግሾ ኤ ቃልታ ይን ዎዝንተ ባያ።

39 «ጌሽ ማጻፉንꬃፓ መዽና ደኦ ደንጎደባዝ ይንትስ አዝን ኡን ቁርቻነ፤ ቃልታን ታ ባዝ ማርክꬋነ። 40 የዝን ይን ደኦ ደንጎደስ ታጎ ዮኦደስ ኮዮስ።

41 «አሳፓ ታኒ ቦንቾ ኮዮስ። 42 የዝን ታኒ ይን ዎዝንተ ጾዘ ሲቆ ባይዛኖ ኤራነ። 43 ታኒ ታ አዳይ ሱንꬅተ ይእዳ፥ የዝን ታና ሞክካያ። Ꮉንካይ ፋ ሱንꬅተ የእዛ ሞካነ። 44 ይን ፈተ ፈተፓ ቦንቾ ኮይዙንꬅ፥ ፈቲ ጾዘፓ የእዘ ቦንቾ ኤኮደስ ኮዮሱንꬅ፥ ዋይዝ ታና አማኖደስ ዳንዳኦደ?

45 «ታኒ ታ አዳይ ቲኖ ይንታና ሞትዘባዝ ይንትስ አዝፐ። ይንታና ሞቶደ ይን ኡፋይት ካፍዘ ሙሴ። 46 ይን ሙሴ አማነዛኮ ኤ ታ ባዝ ጻፍደ ግሾ ታናን አማኖድየሻ። 47 የዝኮን ይን ኤ ጻፍዳኖ አማናንጽኮ ታ ቃልቶ ዋይዝ አማኖደ?» ያጋይዳ።