1 የ ዎደ የሱሳጎ አሱንꬅ ይእ ጵላጦሳ ዎꬊ ኡን ሱꬅትራ ኡን ዣርሽቶ ዎርቂደ ጋልላ አሱንꬅባዝ ኦህደ አሱንꬅ ይና በስተ የነ። 2 ኤ Ꮉንጋራ ያጋእ ማህዳ፤ «ዬዝን የንꬅ ጋልላ አሱንꬅ ይና ኢታ Ꮉይቅቶ Ꮉይቂደ ግሾ ጋልላ ግዳ የዘ አስ ኡባንፓ አꬍደ ናጋራንቾ አዛነ? 3 ባያ! ማቆ የዝን፥ ይንትን ማሮትꬃር ማቃንጽ እጽኮ፥ ኡባና ይኒ ጋራ ꬋቦዳ። 4 ዎይ ማህ ሳልሆመ ጋዘ በስተ ግምበ ዎዲ ዎꬍደ ታጶ ኦስፉን አሱንꬅ የሩሳላመ የዘ አስ ኡባንፓ አꬍዘ ናጋራንቾ አዛነየሻ? 5 ባያ! የዝን ይንትን ማሮትꬃር ማቃንጽ እጽኮ ኡባና ይኒ ጋራ ꬋቦዳ።»

6 ማህን የሱሳ Ꮉንጋራ ጋእ አዝዘ ኦህዳ፦ «ፈቲ አꬄስ ዎይነ ጋደ ቱክንትደ በለሰ ምንጻ የነ። ኤ ኢፓ ኣፈ ኮይ ይእ አኮን ደንግካያ። 7 ጋድቲ አዳይ ዎይነ ኦችዘጎ፥ ‹ኣፈ ደንጎደስ ኮይ Ꮉይꬕ በረ ይእ ብእን አኮን ደንግካያ። ይኒ ግሾ፥ ጋቺ Ꮉሶ፤ አኮስ ሳእቶ መልዘ?› ያጋይዳ።

8 «የዝን ኦችዛይ፥ ‹ላꬆ፥ እ ካንቶ ኦቺ ኦዣ ኦሎደ ዎንꬅስ Ꮉይ በርዘስ አሾያ። 9 ዎንꬅ በረ ኣፍኮ ሎኦ፥ እጽኮ ጋቺ አሾ› » ያጋእ ማህዳ።

10 የሱሳ ሳምባታ ቃማ አይሁደ ዎሳ ኬꬃ ታማርሳነ። 11 ይና በስተ ታጶ ኦስፉን በረ ቱና አያና ባንቶ ኩንዝደ ፈቲ ማችታ የነ። እዛ ኩንዳንፓ ደንዲ ሉለ ኤቆደስ ዳንዳኦስ። 12 የሱሳ እዞ ብእደ ዎደ ጼጊ፥ «Ꮉና ማችተ፥ ነ Ꮉርግትፓ ፋጽዳ» ያጋይዳ። 13 ፋ ኩሽቶ ኢላ አፋ ጋድን፥ እዛ ኢራ ሉለ ኤቅዳ። ጾዝ ማና ጋላትዳ።

14 የዝን አይሁደ ዎሳ ኬꬃ Ꮉላቅዘ ዥልꬊ አስትጎ፥ «ኦቻ ኦችዘ እዝፑን ቃምታ የነ። ይኒ ግሾ፥ ይና ቃምተ ይእ ፋጾተ ፋትን ሳምባታ ቃማ ኮሾስ» ያጋይዳ። ከዘ 20:9-10፤ ማሄ 5:13-14

15 ላꬂ፥ «ጩቡንꬆ፥ ይን ግዳፓ ቦራ ዎይ Ꮉሪ ሳምባታ ቃማ ዛዳሎፓ ብሊ Ꮉꬅ ኡሾደስ ካንጎሰ ኦደ? 16 ዬዝን፥ Ꮉና ማችታ አብራሃማ ናአ ማቅተራ ጻላሄራ አጭንቲ ታጶ ኦስፉን በረ ኩሙꬅ የዝዳንስ ሳምባታ ቃማ ብልንቶደስ ቤዞሳነ?» ያጋእ ኦጭዳ።

17 ኤ ይኖ ኦህደ ዎደ እጽዙንꬅ ኡባ ዬሊꬍዳ። የዝን አሱንꬅ ኡባ ኤ ኦችደ ጋማ ቆፍዘ ኦቻ ኡባነ ኡፋይትዳ።

18 ይንፓ ሱባ፥ የሱሳ Ꮉንጋራ ያጋይዳ፥ «ጾዘ ካእቱምቶ አኮ አዘ? እዞ አኮራ አዝሳደ? 19 ጾዘ ካእቱሞ ፈቲ አስ ፋ ጋድተ ቱክደ ዋላ ኣፈ ፋና። ኤ ድጪ ምንጻ ማቅዳ። ላንዳ ኤ ኮሽትላ አፋ ሸምፕዳ።»

20 ማህ፥ «ጾዘ ካእቱምቶ አኮራ አዝሳደ? 21 ፈቲ ማችታ ጋማ ꬊላራ ዎርቂ ሙኑቅደ ኤራꬅ እርሾ አዛነ» ያጋይዳ።

22 ይንፓ ሱባ፥ የሱሳ የሩሳላመ ቅትተራ ኤ አꬍዘ ኦግተ የዘ ካታምተን ካራ ጋንጨን ታማርስተ አꬍዳ። 23 ፈቲ አስ የሱሳጎ፥ «ላꬆ፥ አቶዱንꬅ ኤራꬅ አስ ጻላላነ?» ጋእ ኦጭዳ።

የሱሳ ኡንታጎ፥ 24 «ስኦተ፥ ጹንꬅ ፉርꬃራ ገሎደስ ምንጎተ። ጋሙንꬅ ገሎደስ ኮያነ የዝን ኡንትስ Ꮉኖስ። 25 ካርቲ አዳይ ደንዲ ፉርꬅቶ ጎርድዳንፓ ሱባ ‹ኑስ ቡጎያ› ጋእ ባለ ኤቂ ጼገ አይኮዳ። የዝን ኤ፥ ‹ይን ኦና የዛኮን አባፓ የኤዛኮን ታ ኤሮስ› ጋእ ማሆዳ። 26 የ ዎደ ይን፥ ‹ኔራ ዎላ ሙእዳ፥ ኡዥዳ፥ ኑ ቡጫላ ታማርስዳ› ያጋውዳ።

27 «ኤ ማህ፥ ‹ይን ኦና የዛኮን አባፓ የኤዛኮን ኤሮስ። ይን፥ ዎቡንꬆ ታፓ Ꮉኮተ› ያጋኦዳ። ማዝ. 6:8 28 አብራሃማ፥ ይሳቃ፥ ያይቆባን ናቡንꬅ ኡቡንꬅ ጾዘ ካእቱምተ ቦኦዳ፥ የዝን ይን ባለ ዎꬊ አትዘ ዎደ ይንትስ ዬፎን አች ጋርጭንጌ ማቃዳ። 29 አሱንꬅ አዋ ከሳፓ፥ አዋ ገሎፓ፥ ዎካ ዛላፓን ዬካ ዛላፓ ይእ ጾዘ ካእቱምተ ሙሳላ አፋ በቶዳ። ማቶ. 8:11-12፤ 22:13፤ 25:30 30 ይኒ ግሾ፥ Ꮉተ የስተ ሱብ ማቅዱንꬃፓ ቲኖ ማቃዱንꬅ፥ ቲኖ ማቅዱንꬃፓ ሱብ ማቃዱንꬅ የነ» ያጋይዳ። ማቶ. 19:30፤ 20:16፤ ማር. 10:31

31 የ ዎደ ፋርሳዉꬃፓ ፈተ ፈተ ይእ፥ «ሄሮድሳ ነና ዎꬎደስ ኮይዘ ግሾ Ꮉና በስትፓ ደንዲ ቅቶ» ጋይዳ።

32 ኤ ማህ፥ «Ꮉንግ፥ የ ዎርካንዘስ ይኬ፥ ‹Ꮉይኖን ዎንታ ቱና አያኑንꬃና ከሶዳ፥ Ꮉርግንትዙንꬃና ፋꬆዳ፥ Ꮉይꬓንꬆ ቃማ ፎሎላ አፋ የሎዳ› ያጋይዳ ጋኦተ። 33 ይኦፕ አትን፥ ናበ የሩሳላመፓ መለ በሳ Ꮉይቆደስ ቤዞስ። ይኒ ግሾ፥ Ꮉይኖን፥ ዎንታን ይንቶን ፌዢ ይና በስቶ ቅቶደስ ደንድዳ።

34 «የሩሳላመ፥ የሩሳላመ፥ ናቡንꬃና ዎꬍዛነ፥ ኔጎ ኪትንትዱንꬃና ሹቻራ ዎꬍዛነ፥ ሉኩለ ፋ ናኡንꬃና ፋ ቀፍት ጋንጨ ሺሽዛንፋና ነ ናኡንꬃና ታ ኩሽትፓ ኦሞራ ዋንꬅ ቶሄ ሺሾደስ ኮይዶ፥ የዝን ይን ኮዮስ ጋይዳ። 35 ታ ይንትስ ኦህነ፤ ይን ኬꬅታ ካይዞዳ። ላꬄ ሱንꬅተ የእዘ አንጅንትዳያ ይን ጋዉደ ዎንꬅስ ታና ደንጎስ» ያጋይዳ። ማዝ. 118:26፤ ኤር. 22:5