1 የ ዎደ ጋማ ሙኩላር ፋይድንትዘ አሱንꬅ ዎላል አፋ የꬍንቶደ ዎንꬅስ አስ አሳላ አፋ ሺቂ የሳደራ፥ የሱሳ ፋ ታማሩንꬃጎ፥ «ፋርሳዉንꬅ እርሽትፓ ናግንቶተ። ይናን ኡን ጩቦትꬅቶ።ማቶ. 16:6፤ ማር. 8:15 2 ቆንጭካይዛር አችንት፥ ኤርንቶሰ ገንጊ አትዘባዝ አኮን ባያ። ማር. 4:22፤ ሉቃ. 8:17 3 ይኬ፥ ይን ꬉማ ኦህደባዝ ኡባ ፎኦ ስንቶዳ፥ ቆልአ ግዳ ካልካሽደ ባዝ ቆንጨ በሳ ኦህንቶዳ።

4 «ታ ባጉንꬆ፥ ታ ኦህዛኖ ስኦተ፤ አሾ ዎꬋነ ፋትን መለ አኮን ኦቾደስ ዳንዳኦሱንꬃና ዣሽትፐተ። 5 ዪኮን፥ ይን ዣሽቶደስ ቤዝዛ ታ ይንትስ ቆንጭሳዳ። ይናን ዎꬍዳንፓ ሱባ ጋናመ ኦሎደስ ዎልቃ የዘስ ኤስ ዣሽቶተ። ዬ፥ ቱሮ ጋነ፤ ኤስ ዣሽቶተ። 6 እችን ቡቡንꬅ ፈቲ ሳንትመስ ባይዝንቶሳነ? ይኦፕ አትን ኡንታፓ ፈተን ጾዘ ቲንተ ቦትንቶስ። 7 መለ አቶ የዝን፥ ይን ኦማ እስንꬅታን ፋይድንቲ የነ። ይኬ፥ ዣሽትፐተ፤ ጋማ ቡቡንꬃፓ ይን አꬋነ።

8 «ታ ኦህዛኖ ስኦተ፤ አስ ቲኖ ታስ ማርክꬍዘ ኡቡንꬅስ አስ ናአይ ጾዘ ኪታንቹንꬅ ቲንተ ማርክꬎዳ። 9 አስ ቲኖ ታና ካድዘስ ጾዘ ኪታንቹንꬅ ቲንተ ታ ኤዛ ካዶዳ። 10 አስ ናአላ አፋ ለቆ ቃላ ኦህዘ ኡቡንꬅ ማሮትꬅ ደማዳ፥ የዝን ጌሽ አያናላ አፋ ለቆ ቃላ ኦህዘስ ማርንቶስ። ማቶ. 12:32፤ ማር. 3:29

11 «አስ ይንታና አይኪ አይሁደ ዎሳ ኬꬃ፥ ዳይኑንꬅ ቲንተን ካቱንꬅ ቲንተን ጎሽችዘ ዎደ አኮ ኦሆድየዛኮን ዋጊ ማሆድ የዛኮ ይርግፐተ። ማቶ. 10:19-20፤ ማር. 13:11፤ ሉቃ. 21:14-15 12 የ ዎደ ይን ኦሆደባዝ ጌሽ አያና ይንታና ታማርሶዳ» ያጋይዳ።

13 አስ ግዳፓ ፈቲ አስ የሱሳጎ ይእ፥ «ታ እሸ ታስ ኑ አዳይ ላታፓ ሻጎደ ፋና ኤስ ኦሆ» ያጋይዳ።

14 የሱሳ ማህ፥ «ናተ አꬃዮ፥ ይንታላ አፋ ታና ዳይናን ላታ ሻክዘ ጭማ ማህደ ኦደ?» ያጋይዳ። 15 ማህካ የሱሳ፥ «አስ የስ ቆሎ ጋማትꬃራ ማቆሰ ግሾ ኢራ አሺ ምንꬂ ይንታና ናግንቶተ» ያጋይዳ።

16 ካሊ አዝዘራ፥ «ጋደ ጋማ ካꬃ እንግዘ ፈቲ ዱረ አꬄ የነ። 17 የ አꬄ፥ ‹ታ ካꬅቶ ታ ሺሾደስ በሲ ኤርደ ግሾ አኮ ኦቾ?› ያጋእ ፋ ዎዝንተ ቆፕዳ። 18 ይኬፓ የይሳዳ፤ ቲኖ የዘ ፋችቶ ላሊ መለ ዳልጊ ፋቻ ኬጾዳ። ካꬅቶን ታስ የዘ ባዝ ሙሎ እዘ ሺሾዳ። 19 ፋ ሸምፕትጎ፥ ‹ታ ሸምፕተ፥ ጋማ በረስ ኔስ ማቃደ ቆሎ ሺሽዳ። ይኬ፥ ሸምፒ ሞኦ፥ ኡዦ፥ ኡፋይቶ› ያጋኦዳ።

20 «የዝን ጾዚ፥ ‹ናተ፥ ኤያ Ꮉይ አꬃዮ፥ Ꮉይኖ ቃማ ነ ሸምፕታ ኔፓ ኤክንታነ። ይኬ፥ ነ ሺሽደ ባዝታ ኦደስ ማቃደ?› ያጋይዳ።

21 «ይኒ ግሾ፥ ፋስ ዱረትꬅ ሳአ ሺሽዘ አስስ፥ ጾዘ ካለ ዱረ ማቆሰ አስስ ፎልታ Ꮉይ አꬄስቲ ፋና» ያጋይዳ።

22 ይንፓ ሱባ፥ የሱሳ ፋ ታማሩንꬃጎ፥ «ይኬ፥ ታ ኦህዛኖ ስኦተ፥ ይን ሸምፕትስ አኮ ሞኦ ይን ጋልትስ አኮ ማኦ ያጋእ ኡንእንትፐተ። 23 ሸምፖ ካꬃፓ ጋላ አፉላፓ አꬋነ። 24 ላንዱንꬃና ቦኦተ ቡዶስ፥ ማጾስ፥ ኤለን ፋቻን ባያ። የዝን ጾዚ ኡንታና ሙዛነ። ይን ላንዱንꬃፓ ጋማ አꬋነ። 25 ዬዝን፥ ይንታፓ ኡንእንት ፋ በርትላ አፋ ፈቲ ቃማ ጉጆደስ ዳንዳእዘ ኦደ? 26 ይኬ፥ Ꮉና ኤራꬅ ባዝቶ ኦቾደስ ዳንዳኦሰ ይን መለባዝስ አኮስ ኡንእንተ? 27 አነ ፉ ዋይዝ ድጭዛኮ ቦኦተ። ዋዮስ ሱቆስ። መለ አቶ የዝን፥ ሶሎሞናን ፋ የዘ ቦንችተ ኡባነ ኡንታፓ ፈተ ጋርዛን ማእካያ። 1 ካት 10:4-7፤ 2 ዜና 9:3-6 28 ይን፥ አማኖ ፋጨዙንꬆ፥ ይኬ፥ ጾዚ Ꮉይኖ በንቲ ዎንታ ታማ ኦልንቶደ ፉዽቶ Ꮉንጋራ ማእስኮ፥ ይንታና ዋይዝ አꬂ ማእሶሶ? 29 ይኒ ግሾ፥ አኮ ሞኦ ዎይ አኮ ኡዦ ጋእ ኡን ዎዝንቶ እዝላ አፋ ማህፐ። 30 ይኖ ኡባ ጾዝ አማኖሰ አሱንꬅ ፋ ዎዝንቶ እዝላ ማሀነ። የዝን ይን አዳይ ጾዛይ ይና ኡባና ይንትስ ኮሽዛኖ ኤራነ። 31 ኡባንፓ አꬂ ጾዘ ካእቱሞ ኮዮተ ይና ኡባና ይንትስ ጉጂ እንግንቶዳ።

32 «ይን፥ ኤራꬅ ዎርዡንꬆ፥ ዣሽትፐተ፤ ይን አዳይ ጾዘ ካእቱምቶ ይንትስ እማደስ ኡፋይታነ። 33 ይንትስ የዘ ባዝ ባይዝ ዳሁንꬅስ እንጎተ። ካይዞ ኤኮሳነ፥ ብላ ሞኦሳነ፥ ጭንጎሰ ካርጥተ፥ Ꮉልኦሰ ቆልቶ ሳሎ ሺሾተ። 34 ይን ዎዝንታ ይን ቆልታ የዘ በስተ ማቃዳ።

35 «ዳንጭንቲ ጊግንቶተ፤ ይን ጾምፕታ ፎእዛኖ ማቀ። ማቶ. 25:1-13 36 ፋ ላꬄ ዣጋናፓ ማቃደ ዎንꬅስ ባርክ ናግዙንꬅ ፋና፥ ላꬂ ይእ ጼግዘ ዎደ ኤልሲ ቡጎደስ ጊግደ አሱንꬅ ፋና ይኦተ። ማር. 13:34-36 37 ፋ ላꬄ ማቅዘ ዎደ ገንትካይዛራ ናግዙንꬅ አንጅንትዱንꬃና። ቱሮ ጋነ፤ ላꬂ ዳንጪ ሌማተ ካለ በትꬂ ሞካነ። 38 ላꬂ ግዲ ብላሄ ማቅን ዎይ ዎንት ማ ማቅን ይእ፥ ይኒ ፋና ገንትካይዛራ ናግዝን ደንግደ የንꬅ አሩንꬅ አንጅንትዱንꬃና። 39 የዝን Ꮉኖ ኤሮተ፤ ካይዞ አይደ የኦድ የዛኮ ካርቲ አዳይ ኤርዛኮ ኬꬅቶ ቦክንትዘ ዎደ ስእ ጋእ ቦኦስ። ማቶ. 24:23-44 40 ይንትን ጊጊ ናጎተ፤ አስ ናአይ ይን ቆፕካይዘ ዎደ የኦዳ» ያጋይዳ።

41 ጴጥሮሳን፥ «ላꬆ Ꮉና አዝዝቶ ኑ ጻላላስ ኦህነነ ዎይ አስ ኡቡንꬅስ?» ያጋይዳ።

42 ላꬂ ማህ፥ «ይኬ፥ ካꬃ ሙሳደስ ቤዘ ዎድተ እንጎደ ፋና ላꬄ ፋ አሩንꬃላ አፋ ሹምደ አማንꬅዛይን ዎዝናማ Ꮉላቅዘ ኦደ? 43 ላꬂ ማቅዘ ዎደ ይኒ ፋና ኦችተራ በንትዘ አርዘ ኤ አንጅንትዳያ 44 ታ ይንትስ ቱሮ ኦህነ፤ ፋ ላꬄስ የዘ ቆሎ ኡባንላ አፋ ኤ ሹምንቶዳ። 45 የዝን የ አርዘ፥ ‹ታ ላꬃይ ኤለ የኦስ› ያጋእ ፋ ዎዝንተ ቆፒ፥ ማች አሩንꬃናን ꬊራꬅ አሩንꬃና Ꮉꬍኮ፥ ማህ ፋስ ኮይደ ፋና ሙእተራን ኡዥተራ ማꬅኮ፥ 46 የ አርዘ ላꬄ ኤ ቆፕካይዘ ቃማን ይርጎሰ ዎደ የኦዳ። ይእ ኤዛ ጋቺ፥ ኤ እድልቶ አማኖሰ አሱንꬃራ ማሆዳ።

47 «ላꬄ ቆፋ ጋራ ጊጎሰን ኤ ላꬄ አኮ ካꬍዛኮ ኤሪተ ኦቾሰ አርዘ ጋማ ጋራፍንቶዳ። 48 የዝን ፋ ላꬄ ቆፍቶ ኤራንጺ አቲ ጋራፍንቶደስ ቤዛኖ ኦቼዘ ኤራꬅ ጋራፍንቶዳ። አኮስ ጋይኮ ጋማ እንግንትደፓ ጋማ ኮይንታነ፥ ጋማ Ꮉዳራ ኤክዱንꬃፓ ጋማ እንጎዳ ጋእ ናግንታነ።

49 «ታኒ ይእዳና ሳአላ አፋ ታማ አይꬆደስ። Ꮉተ ታማ አይክዛኮ ታና ዋይዝ ኡፋይሶድ የሻ! 50 ማቆ የዝን፥ ታ Ꮉተ ጻማቅንቶደ ጽንቃተ የነ። ኤ ፎልንቶደ ዎንꬅስ ታ ሸምፕታ ሸምፖስ። ማር. 10:38 51 ሳአላ አፋ ሳሮትꬅ ኮኦደስ ይእዳ ይንትስ አዛነ? ባያ፥ ታ ይእዳና ሻጎደስ። 52 Ꮉተፓ አይኪ ዎል ግዳ ሻክንትደ እችን ኬꬅ አሱንꬅ ፈትላ የነ። ላምኡንꬅ Ꮉይꬑንꬃላ አፋ፥ Ꮉይꬑንꬅን ላምኡንꬃላ አፋ፥ ደንዲ ሻክንታነ። 53 አዳይ ናእላ አፋ፥ ናእን አደላ አፋ፥ እንታ ናትላ አፋ፥ ናታ እንትላ አፋ፥ አዝንዘ እንታ ናዘ ማችትላ አፋ፥ ናአይ ማችታ አዝንዘ እንትላ አፋ፥ ደንዲ ሻክንቶዳ።»ሚክ. 7:6

54 ማንን አሱንꬃጎ፥ «አዋ ገሎ ዛላራ ሳሎ ꬎንꬍዘ ዎደ ብእ፥ ኤልሲ፥ ‹እራ የኦዳ› ያጋነ፥ ጋይደ ፋና Ꮉናነ። 55 ዬካ ዛላ ባቆ ባቂዘ ዎደ ‹ሳታ አዎዳ› ያጋነ፥ ጋይደ ፋና Ꮉናነ» ያጋይዳ። 56 ይን፥ ጩቡንꬆ፥ ሳሎባዝን ሳአባዝ ሻኪ ኤራነ የዝን Ꮉና ዎድቶ ሻኪ ኤረ ይንታና ዋይዝ ጋምዶ?

57 «ዬዝን፥ ይን ኦምትስ አኮስ ቱርቶ ኤሪ ፍርዶሶ? 58 ነ ሞርክዘራ ዎላ ዳይና ቲኖ ኤቆደስ Ꮉንግተራ ኦገላ አፋ ጊጎደስ ኮዮ። ነ ጊጋንጽ እጽኮ ጎሽቺ ዳይና ቲኖ ነና ካንጎዳ። ዳይንዘ ነና ፖሊሰስ አꬂ እንጎዳ። ኤ ነና ዎይነ ኦሎዳ። 59 ስኦተ፥ ፈቲ ባካና አሽካይዛራ ጭጊ Ꮉሶደ ዎንꬅስ ነ እዝፓ ከዛማኖ ኤሮ» ያጋይዳ።