1 ፈቲ ዎደ የሱሳ ፈቲ በሳ ዎሳነ። ዎሳ Ꮉስደ ዎደ ኤ ታማሩንꬃፓ ፈተ፥ «ላꬆ፥ ዋሐንሳ ፋ ታማሩንꬃና ዎሳ ታማርስደ ፋና ኔንን ኑና ዎሳ ታማርሶ» ያጋይዳ።

2 የሱሳ፥ «Ꮉንጋራ ያጋእ ዎሶተ፦

5 ካሊ፥ የሱሳ ፋ ታማሩንꬃጎ ያጋይዳ፦ «አዝዘስ ይንታፓ ፈተስ ላገ የነ። ኤ ግዲ ብላሄ ፋ ዶꬅዘ ካራ Ꮉንግ፥ ‹ዶꬆ፥ Ꮉይꬕ ሶሎ ታስ እንጎያ። 6 ታስ ላገ ማቅደ ፈቲ አስ ኦገፓ ይእን፥ ኤስ ኣꬆደባዝ ꬋብዳ› ያጋዛኮ፥

7 «ኤ ላግዘ ኬꬃ ግዳ የዛራ፥ ‹አደ ታና ዋይꬅፐ፥ ፉርꬅታ ጎርድንትዳ። ታ ናኡንꬅን ታራ ዳꬃላ አፋ ዎይእዳ። ይኒ ግሾ፥ ደንዲ ነ ኮይዘባዝ እማደስ ዳንዳኦስ› ያጋነነ? 8 ታ ይንትስ ኦህነ፤ ላገትꬅት ግሾ ደንዲ እማደስ ኮያንጽ እጽኮን ዎሳራ ዋይꬅደ ግሾ ደንዲ ኮሽዘ ባዝ ሙሎ እንጋነ።

9 «ይኒ ግሾ፥ ታኒ ይንትስ ኦህነ፤ ዎሶተ ይንትስ እንግንቶዳ፤ ኮዮተ ይን ደማዳ፤ ፉርꬃ ይእ ጼጎተ ይንትስ ቡጉንቶዳ። 10 አኮስ ጋይኮ ዎስዘ ኡቡንꬅ ኤካነ፤ ኮይዘ ደንጋነ፤ ፉርꬃ ይእ ጼግዘስ ቡጉንታነ።

11 «አዱንꬆ ይን ግዳፓ ናአ ሞሎ ዎስን ሾሽ እንግዘ ኦደ? 12 ዎይ ጱጱለ ዎስን ማስማሶ እንጋነ? 13 ይን ኢቱንꬃና ማቂ ይን ናኡንꬅስ ሎኦ ባዝ እንገ ኤርኮ፥ ሳሎ የዘ ይን አዳይ ዎስዙንꬅስ ጌሽ አያና ዋይዝ አꬂ እንጎሶ?» ያጋይዳ።

14 ፈቲ ዎደ የሱሳ ዶና ሙምዝደ ቱና አያና ፈቲ አꬄፓ ከስዳ። ቱና አያንዘ ከዝደ ፋና ዶና ሙመ አꬄ ኦህንትዳ። አሱንꬅን ጋማ ቆፕዳ። 15 የዝን ፈተ ፈተ፥ «ቱና አያና Ꮉላቃ፥ ብኤልዘቡላ ዎልቃራ ቱና አያኑንꬃና ከሳነ» ያጋይዳ። ማቶ. 9:34፤ 10:25 16 መሉንꬅ ማህ ፋታኖደስ ሳሎፓ ማላ ቤዞደ ፋና ኮይዳ። ማቶ. 12:38፤ 16:1፤ ማር. 8:11

17 የዝን የሱሳ ኡን ቆፍቶ ኤሪ ኡንታጎ፥ «ዎል ግዳ ሻክንትዘ ካእቱሞ ኡባና ꬋባነ፤ ዎል ግዳ ሻክንትዘ ኬꬂ ጎልአነ። 18 ጻላሄ ካእቱሞ ዎል ግዳ ሻክንትኮ ዋይዝ ሚንግ ኤቆደ? ይን ታና፥ ‹ኤ ቱና አያኑንꬃና ብኤልዘቡላ ዎልቃራ ከሳነ› ያጋነ። 19 ይኬ፥ ታኒ ቱና አያና ብኤልዘቡላ ዎልቃራ ኬስዘባዝ ማቅኮ ካልዙንꬅ ኦደ ዎልቃራ ኬሶድ የሻ? ይኒ ግሾ፥ ኡን ይንታላ አፋ ፍርድዙንꬅና ማቃዳ። 20 የዝን ታኒ ቱና አያኑንꬃና ጾዘ ግልአራ ኬስዘባዝ ማቅኮ ይኬ ጾዘ ካእቱምታ ይንታጎ ኡክዳኖ ኤሮተ።

21 «ምንꬂ አስ ዳንጭንቲ ፋ ኬꬅቶ ናግዘባዝ ማቅኮ፥ ኤ ቆልታ ቦችንቶስ። 22 ዪኮን፥ ኤፓ አꬊ ምንꬂ ማቅደ አስ ይእ፥ ኤዛ ዎልቂꬊ ጋምኮ አማንንቲ ዳንጭደ ዳንጭቶ ብልዚ፥ ኤ ቆልቶ ቦንቂ መሌ አስስ ሻካነ።

23 «ታራ ማቅካይዛይ ታና እጻነ፤ ታራ ሺሾሳይ ላላነ። ማር. 9:40

24 «ቱና አያና አሳፓ ከዝደ ዎደ ሸምፕዘ በሲ ኮይ Ꮉꬅ ባይዘ በሳራ ዉታነ። ሸምፕዘ በሲ ꬋብደ ዎደ ‹ታ ከዝደ በስተ ማቃዳ› ያጋነ። 25 ኤ ማቅዘ ዎደ ኬꬅታ ፍጽንቲ ሎእ የዝን ደንግዳ። 26 ይንፓ ሱባ፥ Ꮉንግ ኤፓ አꬊ ኢትደ መለ ላፑን ቱና አያኑንꬃና ኤኪ የእነ። ኤ ግዳ ገሊ የስ አይካነ። የ አꬄስ ቲኖስትፓ ሱባና አꬊ ኢታ ማቃነ» ያጋይዳ።

27 የሱሳ ይና ኦህትላ አፋ የሳደራ ፈቲ ማችታ አስ ግዳፓ ደንዲ፥ ፋ ቃልቶ ꬎቅ ዪዚ፥ «ነና ቶክደ ሳዝታን ነ ꬋንግደ ꬋንꬅታ አንጅንትዳ» ያጋይዳ።

28 የዝን ኤ፥ «አንጅንትዱንꬅ ጾዘ ቃልቶ ስእ ኪትንትዙንꬃና» ያጋይዳ።

29 ጋማ አሱንꬅ ሺቅደ ዎደ የሱሳ፥ «Ꮉና የለቱንꬅ ኢታ፤ ክለ ማላ ኮያነ። የዝን ዮናሳ ማላትፕ መለ ኡንትስ እንግንቶስ። ማቶ. 16:4፤ ማር. 8:12 30 ዮናሳ ነነዌ አሱንꬅስ ማላ ማቅደ ፋና አስ ናአይን Ꮉና የለቱንꬅስ ማላ ማቃዳ። ዋሐ. 3:4 31 ሳባ ካትታ ፍርዳ ዎደ Ꮉንꬅ የለቱንꬃራ ደንዲ ፍርዶዳ። አኮስ ጋይኮ፥ እዛ ሶሎሞና ጭንጫትꬅቶ ስኦደስ ሳአ ጋጻፓ ደንዲ ይእዳ። ይኬ ሶሎሞናፓ ኣꬍዛይ Ꮉነ የነ 1 ካት 10:1-10፤ 2 ዜና 9:1-12 32 ነነዌ አሱንꬅ ፍርዳ ዎደ Ꮉንꬅ የለቱንꬃራ ደንዲ ኡንታላ አፋ ፍርዶዳ። አኮስ ጋይኮ ዮናሳ ስብከተር ማሮትꬅ ገልዳ። ይኬ፥ ዮናሳፓ አꬍዘ Ꮉነ የነ» ያጋይዳ። ዋሐ. 3:5

33 «ጾምፐ ጾምፒ አችቻ በሳ ዎይ ኦታ ግዳ ጋድዘ አስ ባያ። አስ ፎእቶ በአደ ፋና ꬎቃ በሳ ጋዳነ። ማቶ. 5:15፤ ማር. 4:21፤ ሉቃ. 8:16 34 ነ ጋልትስ ፎኦ ነ ኣፍቶ። ነ ኣፍታ ሎኦ ማቅኮ፥ ነ ኩሙꬅ ጋልታ ፎአነ። ነና ኣፈ Ꮉርግኮ ነ ጋልታ ኡባና ꬉማነ። 35 ይኒ ግሾ፥ ነ ግዳ የዘ ፎእዘ ꬉማመ ጋር ናግንቶ። 36 ይኬ፥ ነ ኩንꬅ ጋልታ ፎኦ ማቅኮ፥ ነ ጋልተን መለ ꬉማ በሲ ꬋብኮ፥ ነ ጋልታ ኩሙꬅታ ፎኦ ፋና ማቃነ» ያጋይዳ።

37 የሱሳ ፋ ኦህቶ Ꮉስደ ፋና ፈቲ ፋርሳዉዘ ፋራ ካꬃ ማአደ ፋና ጼግዳ። ኤ ኤራ ፈትላ ገሊ ሙንታላ በትዳ። 38 ፋርሳዉዘ የሱሳ ካꬃ ማአደፓ ቲኒ ኩሸ ሜጮሳኖ ብእ ጋማ ቆፕዳ።

39 ላꬂ ኤጎ፥ «ይን ፋርሳዉንꬅ ቡርጩቆስን ሻተስን ካታ ዛልቶ ሜጫነ። የዝን ይን ጋንጭታ ኡዛትꬃራን ኢታባዛራን ኩምዳ። 40 ይን፥ ኤዩንꬆ፥ ካታ ዛልቶ መꬍደ ጋንጭቶ መꬍዳይ ኤዛ ባነ? 41 የዝን ቡርጩቆን ሻተን የዛኖ ዳሁንꬅስ እንጎተ። የ ዎደ ይንትስ ኡባ ባዝታ ጌሽ ማቃዳ።

42 «ፋርሳዉንꬆ ይንታና ባደ፥ ካርꬅ ጋላፓ፥ ጻሎተፓ፥ ይኒ ፋና የዘ ባዛፓ አስራታ ከሳነ። የዝን ጽሎትꬅን ጾዝ ካꬎ ይን ግዳ ባያ። መሉንꬃና አሽካይዛራ Ꮉንሳና ኦቾደስ ቤዛነ፥ የዝን አሽዳ። ሌዌ 27:30

43 «ፋርሳዉንꬆ ይንታና ባደ፥ አይሁደ ዎሳ ኬꬅተ ቦንቾ ኦይዳ፥ ጋበ ግዳ ቦንቾ ሳሮ ካꬋነ።

44 «በስታ ꬋብን አሱንꬅ ኤርካይዛራ ካታራ የꬍዘ ቦዛ አዙንꬆ ይንታና ባደ» ያጋይዳ።

45 ህገ አስታማርዘ ማህ፥ «አስታማርዛዮ፥ ነ ይኖ ጋእተ ኑና ጫዣነ» ያጋይዳ።

46 የሱሳ፥ «ይን፥ ህገ አስታማሩንꬆ፥ ይንታና ባደ፥ አሱንꬅ ቶኮደስ ዳንዳኦሰ ዴጾ ቶፎ ቶሳነ፥ የዝን ይን ይን ኦምትስ መለ አቶ የዝን ግልአ በርꬃራን ግርሞስ።

47 «ይን አዱንꬅ ዎꬍደ ናቡንꬅ ቦዝቶ ይን ጊግዘ ግሾ ይንታና ባደ። 48 ይኬ፥ ይን አዱንꬅ ኦችቶ ምንꬆደስ ኡን ዎꬍደ ናቡንꬅ ቦዝቶ ይን ሎይꬅዘ ግሾ ኡን ኢታ ኦችትስ ይን ማርካ። 49 ይኒ ግሾ፥ ጾዚ ፋ ጭንጫትꬅተ፥ ‹ናቡንꬃናን ሐዋሩንꬃና ታ ይንትስ ኪቶዳ፥ የዝን ይን ባጉንꬃና ዎꬎዳ፤ መሉንꬃና ባይኦዳ› ያጋይዳ። 50 ይኒ ግሾ፥ Ꮉና የለቱንꬅ አላመ መꬍንትዳንፓ Ꮉኖ የሎደስ ጎግደ ናቡንꬅ ኡቡንꬅ ሱꬅትስ ኦጭንቶዳ። 51 አቤላፓ ደንꬂ ዣርሾ በስትስን ጾዘ ኬꬃፓ ግዳ ጎግደ ዛካርያሳ ሱꬅት ግሾ Ꮉንꬅ የለቱንꬅ ኦጭንቶዳ። መꬎ 4:8፤ 2 ዜና 24:20-21

52 «ህገ አስታማሩንꬆ፥ ይንታና ባደ፥ ኤራትꬅ ቁልፈ ይን ኩሸ አይክዳ፥ የዝን ይንትስን ገሎስ መሉንꬃናን ገልꬆስ» ያጋይዳ።

53 የሱሳ የይጋፓ ቅቶደስ ከዘ ዎደ ህገ አስታማሩንꬅን ፋርሳዉንꬅ ኤራ እጽንት ኦጨራ ዋይꬃነ። 54 ኤ ዶንትፓ ከዘ ቃልተ ኤዛ አይኮደስ ኮይ ይኖ ኦችዳ።