1 ፈቲ ዎደ ቃራጠ ጋችዙንꬅን ናጋራንቹንꬅ የሱሳ ትምርትቶ ስኦደስ ኤ ካለ ሺቅዳ። ሉቃ. 5:29-30 2 የዝን ፋርሳዉንꬅን ህገ አስታማሩንꬅ፥ «Ꮉይ አꬄ ናጋራንቹንꬃና ሺሺ ኤካነ፥ ኡንታራ ፈትላ ሙነ» ያጋእ ዙዝንግዳ።

3 የሱሳ ያጋእ Ꮉና አዝዝቶ ኡንትስ ኦህዳ፦ 4 «ይን ግዳፓ ፈተስ ጼት ዱሩንꬅ የዘ ባዝ ማቅኮ ኡንታፓ ፈታይ ꬋብኮ ኡዱፉን ታም ኡዱፉኑንꬃና የንግዘ በሳ አሺ ꬋብዳያ ደማደ ዎንꬅስ ኮዮሰ ኦደ? 5 ደንግደ ዎደ ኡፋይት ፋ ጋንተ ቶኪ፥ 6 ፋ ካራ ማቃነ። ፋ ላጉንꬃናን ዶꬁንꬃና ፈትላ ጼጊ፥ ‹ꬋብደ ታ ዱርዛ ደንግዳ፥ ታራ ፈትላ ኡፋይቶተ› ያጋነ። 7 ይኒ ጋራ፥ ማሮትꬅ ኮሾሰ ኡዱፉን ታም ኡዱፉን ጽሉንꬃፓ አꬂ ማሮትꬅ ገልዘ ፈቲ ናጋራንችዘ ግሾ ሳሎ ዳማ ኡፋይስ ማቃነ።

8 «ዎይ ታጵ ሹች ብራ የዘ ፈቲ ማችታ ታጵትፓ ፈቲ ሹች ብርዘ ꬋብኮ ደንጎደ ዎንꬅስ ጾምፐ አይꬂ ኬꬂ ፍጺ ምንꬂ ኮዮሳና ኦደ? 9 ደንግደ ዎደ ፋ ላጉንꬃናን ፋ ዶꬁንꬃና ጼጊ ‹ꬋብደ ታ ፈቲ ብርዛ ደንግደ ግሾ ታራ ኡፋይቶተ› ያጋነ። 10 ስኦተ፥ ይኒ ፋና ፈቲ ማሮትꬅ ገልዘ ናጋራንችዘ ግሾ ጾዘ ኪታንቹንꬅ ቲኖ ኡፋይስ ማቃነ» ያጋይዳ።

11 ማህ የሱሳ፥ «ፈቲ አꬄስ ላምእ ናኡንꬅ የነ። 12 ኡንታፓ ጌዝ ናአይ ፋ አደጎ፥ ‹ታ አዳዮ፥ ነ ቆልትፓ ታ ግሽቶ ታስ እንጎ› ያጋይዳ። አዳይ ፋ ቆልቶ ፋ ናኡንꬅስ ግሽዳ። 13 ኤራꬅ ቃማፓ ሱባ ጌዝ ናአይ ፋ ግሽቶ ሙሎ አጪ ኤኪ Ꮉኮ ሳአ ቅትዳ። የይጋ ካሳራ ቆልቶ ላሊ Ꮉስዳ። 14 ኤ ፋስ የዘባዝቶ ሙሎ Ꮉስዳንፓ ሱባ ይና ሳእተ ኡባነ ምንꬂ ናየ ከዝን ማꬍꬍዳ። 15 ይኒ ግሾ፥ ይና ሳእተ አሱንꬃፓ ፈተ ካራ የሳደስ ገልዳ። አꬃይ ኤዛ ጉዳይለ የማደ ጋር የንግዘ በሳ ዳክዳ። 16 ጉዳይሉንꬅ ሙእዘ Ꮉርቆፓ ማአደስ አሙꬍዳ፥ የዝን እዞን ኤስ እንግዘ አስ በንትካያ። 17 ዎዝና ማቅን፥ ‹ዋንꬅ ታ አዳይ አሩንꬅስ ካꬃ አላ አትን ታ Ꮉነ ናየራ Ꮉይቆደስ የልዶ?› 18 ደንዲ ታ አደጎ Ꮉንግ፥ ‹ታ አዳዮ፥ ጾዝን፥ ነናን ቆህዳ። 19 ይኬፓ ነ ናአ ጋእንት ጼግንቶደስ ታስ ቤዞሰ ግሾ ነ ካራ የዘ አሩንꬃፓ ፈታይ ፋና ታና ፋይዶ› ያጋኦዳ» ያጋይዳ። 20 ይኒ ግሾ፥ ደንዲ ፋ አደጎ ቅትዳ።

«ዪኮን፥ ኤ Ꮉጋ Ꮉኮራ የዝን አዳይ ይቅስንቲ፥ ኤጎ ዎጺ Ꮉንግ እርንግ ዬሪዳ። 21 ናዘን፥ ‹ታ አዳዮ ጾዝን፥ ነናን ታ ቆህዳ። ይኬፓ ነ ናአ ጋእንት ጼግንቶደስ ቤዞስ› ያጋይዳ።

22 «ኤ አዳይ አሩንꬃና ጼጊ፥ ‹ኤልሲ ኡቡንꬃፓ ሎኦ ማቅደ ማኦ ክእ ኤዛ ማይዞተ፤ ኤ ግልእተ ምግዶ፥ ኤ ቶህተ ጫማ ኣꬆተ። 23 ሞꬎ ዎፋኖ ክእ ሹኮተ፥ ማአዳ፥ ኡፋይቶዳ። 24 ታ ናአይ Ꮉይኒ Ꮉይቂዳ፥ የዝን Ꮉተ ፋጽዳ፤ ꬋብዳ፥ የዝን በንትዳ› ያጋይዳ። ይንፓ ሱባ፥ ኡፋይተ አይክዳ።

25 «የ ዎደ አንግስ ናአይ ኦቻ ጋደ የነ። የይጋፓ ይእተራ ካራ ኡኮደራ የꬂን ዶለ ኦꬅ ስእዳ። 26 ኤ፥ አሩንꬃፓ ፈታ ጼጊ Ꮉንደ ባዝታ አኮ የዛኮን ኤሮደስ ኦጭዳ። 27 አርዘን፥ ‹ነ እሸ ሳሮ ይእደ ግሾ ነ አዳይ ሞꬎ ዎፋኖ ኤስ ሹክዳ› ያጋይዳ።

28 «አንግስ እሸ ዥልꬊ ኬꬃ ገሎደስን ኮይካያ። አዳይ ባለ ኬዚ ኬꬃ ገሎደ ፋና ኤዛ ዎስዳ። 29 የዝን ኤ ፋ አደጎ፥ ‹ይኬ፥ Ꮉኒ ጋር በረ ታ ኔስ አርꬊ ነ ኪትፓ ፈቶን ፋጭዝካይዛራ ኔስ ኪትንትን ታ ታ ላጉንꬃራ ኡፋይቶደ ፋና መለ አቶ የዝን ፈቲ ጋሸ ዴሽ እንግካያ። 30 የዝን፥ Ꮉይኒ ነ ናአይ ነ ቆልቶ ኦላሉንꬃራ ላሊ ይእን ሞꬎ ዎፋኖ ሹክዳ› » ያጋይዳ።

31 «አደን፥ ‹ታ ናአዮ፥ ኔኒ ኡባ ዎደ ታራ የነ፥ ታ ባዝ ኡባና ኔስ። 32 Ꮉይኒ ነ እሸ Ꮉይቂዳ፥ የዝን ፋጽዳ፤ ꬋብዳ፥ የዝን በንትዳ። ይኒ ግሾ፥ ጋማ ኡፋይቶደስ ቤዛነ› ያጋኦዳ» ያጋይዳ።