1 የሱሳ ፋ ታማሩንꬃጎ፥ «ፈቲ ዱረ አꬄስ ኤፓ ዬካራ ፈቲ ሹማ የነ። የ ሹምዘ ፋ ላꬄ ቆልቶ ላላነ ያጋዘ ዎረ ካርቲ አዳያ የልዳ። 2 ካርቲ አዳይ ሹምዛ ጼግዝ፥ ‹ታ ዋግዘባዝ ስእዶ? ይኬፓ ኔኒ ታ ኬꬅትስ ሹማ ማቂ ኦቾደስ ዳንዳኦሰ ግሾ ታ ቆልቶ ታና የልꬆ› ያጋይዳ።

3 «የ ሹምዘን ፋ ዎዝንተ Ꮉንጋራ ያጋእ ቆፕዳ። ‹ታ ላꬃይ ታና ሹማትꬅትፓ Ꮉሶደስ ይእነ፥ ዎት አቆደስ ዎልቃ ባያ፥ ዎሲ ማአደስ ዬልዛነ፤ ዬዝን ታ ዋያ? 4 ሹማትꬅትፓ ታ ዎꬍዘ ዎደ አሱንꬅ ታና ሞኮደ ፋና ኦቾደ ባዝ ታ ኤራነ› ያጋይዳ።

5 «ይኒ ግሾ፥ ኤ ላꬄ ጋለ የዘ አሱንꬃና ፈታ ፈታ ጼጊ ክእ ቲኖ አꬄጎ፥ ‹ኔላ አፋ ታ ላꬄ ጋለ ዋንꬅ የዘ?› ያጋእ ኦጭዳ።

6 «ኤ፥ ‹ላምእታም ባርሜለ ዛይተ ጋለ የነ› ያጋይዳ።

«ሹምዘ፥ ‹ዉለ ዋርቃተ Ꮉተ፥ ኤልሲ፥ ታጵ ባርሜለ ዛይተ ጋለ የነ ጋእ ጻፎ› ያጋይዳ።

7 «ይንፓ ካሊ ላምአንꬅዘጎ፥ ‹ኔስ ዋንꬅ የዘ?› ያጋይዳ።

«ኤ፥ ‹370 ኩንታለ ዛርጋ ጋለ የነ› ያጋይዳ።

«ሹምዘ፥ ‹ነ ዉለ ዋርቃተ Ꮉተ፥ ኤልሲ፥ 296 ኩንታለ ያጋእ ጻፎ› ያጋይዳ። 8 ካርቲ አዳይ አማንንትካይዘ ሹምዛ ኤ ጭንጫትꬅትስ ናሽዳ። Ꮉና አላምት ናኡንꬅ አስ አይፎራ ፎኦ ናኡንꬃፓ አꬍደ ዎዝናማ።

9 «ይኒ ግሾ፥ ታ ይንትስ ኦህነ፤ Ꮉና አላምት ብራ Ꮉልእዘ ዎደ መዽና ኬꬅተ ሞክንቶደ ፋና Ꮉና ሚሽትራ ይንትስ ላገ ዎንጎተ። 10 ኡባፓ ኤራꬅ ባዛ አማንንትደ ጋማ ባዛ አማንንትዳያ ማቃነ። ማህ ኡባፓ ኤራꬅ ባዛ አማንንቶሰ ጋማ ባዛ አማንንቶስ። 11 ይኬ፥ Ꮉና አላምት ብራራ ይን አማንንታንጺ እጽኮ ቱሪ ብራ ይንትስ ኦደ Ꮉዳራ እማደ? 12 ይን መለ አስ ብርተ አማንንታንጽኮ፥ ይን ቡዞ ብራ ይንትስ ኦደ እማደ?

13 «ፈቲ አርዘ ላምእ ላꬁንꬅስ አቆደስ ዳንዳኦስ። ፈታ እጽኮ Ꮉንካያ ካꬋነ ዎይ ፈተጎ ሺቅኮ Ꮉንካያ ለቃነ። ይኒ ጋራ፥ ይን ጾዝስን ብራስን አቆደስ ዳንዳኦስ።»ማቶ. 6:24

14 ብራ ካዽዘ ፋርሳዉንꬅ ይኖ ስእ የሱሳ ለቂዳ። 15 ኤ፥ «ይን ይንታና አስ ቲኖ ቤዛነ፥ የዝን ጾዚ ይን ዎዝንቶ ኤራነ። አስ ቲኖ ቦንችንትዳይ ጾዘ ቲኖ ቦሩንትዳያ።

16 «ሙሴ ህግታን ናቡንꬅ ኪታ ዋሐንሳ የሎደስ ይንትስ ኦችተራ ጋምእዳ። ይንፓ ሱባ፥ ጾዘ ካእቱሞ ዎንገልታ ሳባክንትተ ጋምእዳ። አስ ኡባ የይጋ ገሎደስ ዳፍንታነ። ማቶ. 11:12-13 17 የዝን፥ ህግትፓ ፈቲ ይሻ ፍዳለ አቶዳንፓ ሳሎን ሳአን አꬍዛና ላፋነ። ማቶ. 5:18

18 «ፋ ማችቶ ዳኪ መለ ኤክዘ ኡባ ኦላላነ። ፋ አዝንዘፓ አንጅንትዳኖ ኤክዛይን ኦላላነ» ጋይዳ። ማቶ. 5:32፤ 1 ቆሮ. 7:10-11

19 «አልኦን ሎኦ ቦንቾ አፉላ ማእዘ፥ ሳአ ጊግን ኡባ ዎደ ኡፋይሳራ የዘ ፈቲ ዱረ አስ የነ። 20 መለ ማህ ጋልታ ኩሙꬅ Ꮉርግꬅ ማቅደ ፈቲ አላዛረ ጋእንትዘ ዳህዘ የ ዱረ አꬄ ባለ ኦልንት አትዳይ የነ። 21 ናየፓ ደንዲ ዱረ አꬄ ሌማትፓ ዎꬍዘ ጉፋ ማአደስ አሙꬊ የነ። መለ አቶ የዝን፥ ካኑንꬅ ይእ ኤ Ꮉርግꬅ በስቶ ላአነ።

22 «የ ዳህዘ Ꮉይቂዳ፤ ኪታንቹንꬅ ኤዛ አብራሃማ ሹጵተ ኤክዳ። ማህ ዱረ አꬄን Ꮉይቂ ሞግንትዳ። 23 ስኦለ ኡንእንት የዝተራ ꬎቅ ጋእ Ꮉኮራ አብራሃማን ኤ ሹጵተ የዛ አላዛረ ብእዳ። 24 ኤ፥ ‹አቦ አብራሃማ፥ ታስ ይቅስንቶያ፤ Ꮉና ሎጽዘ ታምተ ኡንእንት የዘ ግሾ አላዛረ ፋ ግልእዛ Ꮉꬃ ዳኪ ታ እልአንꬅቶ ላክꬆደ ፋና አደ ኤዛ ዳኮያ› ያጋእ ኡክዳ።

25 «የዝን አብራሃማ ኤጎ፥ ‹ታ ናአዮ፥ ነ ሳአ የዘ ዎደ ሎኦ ባዝቶ ኤክዳኖ፥ ማህ አላዛረ ኢታ ባዝ ኤክዳኖ ቆፖ። የዝን Ꮉተ ኤ Ꮉነ ኡፋይታነ፥ ማህ ነ ዋይንት የነ› ያጋይዳ። 26 Ꮉና ኡባንፓ አꬊ፥ ‹Ꮉይጋፓ ይንታጎ፥ ሰካፓ Ꮉንካ ኑጎ አꬎደስ ኮይዙንꬅ ፍንጋመ ፋና ኑስን ይንትስ ግዳ ዳማ ጋጋ የነ› ያጋይዳ።

27 «ዱረ አꬄ፥ ‹ታ አዳዮ፥ ዬዛኮ አላዛረ ታ አዳይ ካራ ኪቶደ ፋና ታ ነና ዎሳነ። 28 ታስ እችን እሹንꬅ የነ፥ ኡንትን Ꮉና ማꬋ በስተ የአመ ፋና ኡንትስ ዎꬊ ማርክꬎ› ያጋይዳ።

29 «የዝን አብራሃማ፥ ‹ኡንትስ ሙሴን ናቡንꬅን የነ፤ ኡን ኦህዛኖ ስኦ› ያጋይዳ።

30 «ዱረ አꬄ፥ ‹አቦ አብራሃማ፥ ይኒ ፋና ባያ፤ ፈቲ አስ Ꮉይቆፓ ደንዲ ዎꬍኮ ኡን ማሮትꬅ ገሎዳ› ያጋይዳ።

31 «አብራሃማ፥ ‹ሙሴን ናቡንꬅና ስአንጽኮ፥ መለ አቶ የዝን Ꮉይቆፓ ፈቲ አስ ደንዲ ኦህኮን አማኖስ› ያጋይዳ።»