24
የሱሳ Ꮉይቆፓ ደንድዳ
(ማቶ. 28:1-10፤ ማር. 16:1-8፤ ዋሐ. 20:1-10)
1 ሳምንታፓ ቲኖ ቃማ፥ ዎጋ ዎደ ዎንታ ጎዳ፥ ማቹንꬅ ፋ ጊግዝደ ሽቶ ኤኪ ቦዛ Ꮉንግዳ። 2 ኡን እዘ የልዘ ዎደ ቦዛ ዶንተ የዘ ሹችታ ጎልእ Ꮉልእዳኖ ደንግዳ። 3 ኡን ቦዛ ጋꬅ ገልዳ፥ የዝን ላꬄ የሱሳ አህቶ ደንግካያ። 4 ኡን እዘ ኤቂ አኮ Ꮉንዶ ጋእ ቆፖደራ አካክካይዝን ጋማ ፎእዘ አፉላ ማእደ ላምእ አሱንꬅ ኡን ካለ ኤቅዳ። 5 ማቹንꬅ ዣሽቲ ፋ ኦምቶ ሳአ ዝቂ ዪዚ የሳደራ፥ አሱንꬅ ኡንታጎ፥ «ፋጻ የዛያ Ꮉይቁንꬅ ግዳ አኮስ ኮየተ? 6-7 ኤ Ꮉነ ባያ፤ Ꮉይቆፓ ደንድዳ፥ ‹አስ ናአይ ናጋራንቹንꬅ ኩሽተ አꬊ እንግንቶዳ፤ ኡንትን ኤዛ ሱጾዳ። ማቶ. 16:21፤ 17:22-23፤ 20:18-19፤ ማር. 8:31፤ 9:31፤ 10:33-34፤ ሉቃ. 9:22፤ 18:31-33 ኤ Ꮉይꬓንꬆ ቃምተ Ꮉይቆፓ ደንዶዳ› ያጋእ፥ ኤ ይንታራ ጋልላ የዝተ ይንትስ ኦህደ ቃልቶ ቆፖተ» ያጋይዳ።
8 ማቹንꬅ የ ዎደ ኤ ቃልቶ ቲርዳ።
9 ማቹንꬅ ቦዛፓ ማቂ Ꮉንደ ባዝቶ ኡባ ታጶ ፈቱንꬅስን መሉንꬅስን ኦህዳ። 10 የንꬅ ሐዋሩንꬅስ ኦህደ ማግደላ ማይራሞ፥ ዮሐና፥ ያይቆባ እንታ ማይራሞን ኡንታራ የዘ መለ ማቹንꬃና። 11 የዝን ኡንትስ ማቹንꬅ ኦህዳና አቡኮ ጋራ ይእን አማንካያ። 12 የዝን ጴጥሮሳ ደንዲ ዎጺ ቦዛ ቅትዳ። የ በስቶ የሊ ዙጊ ግዳ በእዘ ዎደ ሞግደ አፉላ ጻላላ ብእዳ። Ꮉንዳነ ጋማ ቆፒ ፋ ካራ ማቅዳ።
ኤማሁሰ ኦገላ አፋ
(ማር. 16:12-13)
13 የ ዎደ ካልዘ ታማሩንꬃፓ ላምኡንꬅ የሩሳላመፓ ታጶ ፈቲ ክሎ ምትረ Ꮉክዘ ኤማሁሰ ካራ ጋንጨ Ꮉንጋነ። 14 ኡን ዎላ Ꮉንደ ባዝቶ ኡባ ኦህንታነ። 15 ኡን ይና Ꮉንዳን ባዝ ቲርተራን ኦህንትተራ የꬍዘ ዎደ የሱሳ ፋ ኦምትስ ሺቂ ኡንታራ Ꮉንጋነ። 16 የዝን፥ ኡን ኤዛ ኤራመ ፋና ኡን ኣፍታ አይክንትዳ።
17 ኤ፥ «ይን ዎላ ኦገላ የዝተ ኦህንትዛና አኮ?» ያጋይዳ።
ኡን አዛኒ ስእ ጋእ ኤቅዳ። 18 ኡንታፓ ፈተ ቀልዮጳ ጋእንትዘ፥ «Ꮉና ቃምት ግዳ የሩሳላመ Ꮉንዳኖ ኤሮሰ፥ ነ ሳእትስ ዛቆነ?» ያጋይዳ።
19 ኤ ማህ፥ «እዘ Ꮉንዳና አኮ?» ጋእ ኦጭዳ።
ኡን፥ «ጾዘ ቲኖን አስ ቲኖን ኦቻራን ኦሄራ ምንꬂ ናበ ማቅደ ናዝረተ የሱሳ ባዝ። 20 ኤዛ ካህኑንꬅ Ꮉላቁንꬅን ኑና ካልꬅዙንꬅ Ꮉይቆ ፍርዳስ አꬂ እንግ፥ ሱጽዳ። 21 ኑኒ እስራኤለ አሱንꬃና አሾዳ ጋእ ኡፋይት ናገዝን Ꮉና Ꮉንን Ꮉይኖ Ꮉይꬓንꬆ ቃማ። 22 ማህ ኑ ግዳፓ ፈቲ ፈቲ ማቹንꬅ ኑና ጋማ ቆፍዝዳ። ኡን Ꮉይኖ ዎንታ ጎዳ ቦዛ Ꮉንግዳ። 23 ኤ አህታ ꬋብደ ዎደ ማቂ ይእ፥ ‹ኤ ፋጻ የነ› ያጋዘ ኪታንቹንꬅ ቆንጭን ብእዳ ያጋእ ኦህዳ። 24 ኑ ግዳፓን ፈተ ፈተ ቦዛ Ꮉንግ ማቹንꬅ ኦህዳን ፋና Ꮉንን ብእዳ፥ የዝን ኤዛ ብእካያ» ያጋይዳ።
25 ኤ ኡንታጎ፥ «ይን፥ ቲሮሰ አሱንꬆ፥ ይን ዎዝንታ ናቡንꬅ ኦህዳኖ ኡባ አማኖደስ ጋምእዙንꬆ፥ 26 ክርስቶሳ ይና ማꬍቶ ኤኮደስን ፋ ቦንቾራ ገሎደስ ቤዞሳ?» ያጋይዳ። 27 ሙሴፓን ናቡንꬅ ኡባንፓ ደንዲ ጌሽ ማጻፍተ ኤ ባዝ ጻፍንትዳኖ ኡባ ኡንትስ ቆንጭዝዳ።
28 ኡን Ꮉንግዘ ካራ ጋንጨ ኡክደ ዎደ የሱሳ አꬊ Ꮉኮ በሳ ቅትዘ ጋራ ይእን፥ 29 ኡን፥ «ሳእታ ቃምደ ግሾ ኑራ አቆ» ያጋእ ምንꬂ ዎስዳ። ይኒ ግሾ፥ ኡንታራ አቆደስ ገልዳ።
30 ኡንታራ ዎላ ሌማተላ በቲ፥ ሶሎ ደንꬂ፥ ፌꬊ አንጂ ኡንትስ እንግዳ። 31 የ ዎደ ኡን ኤሮደ ጋር ኡን ኣፍታ ቡጉንትዳ። ኡንትን ኤርዳ። የዝን ኤ ኡንታፓ ገንግዳ። 32 ኡን፥ «ኑ ኦገላ አፋ የዝን ኤ ኑስ ጌሽ ማጻፈ ብልተራን ኑና ኦህዝተራ ኑ ዎዝንታ ኤጽካ?» ያጋይዳ። 33 የ ዎደ ደንዲ ሱባ የሩሳላመ ይእዳ። ታጶ ፈቱንꬅን መሉንꬅ ፈትላ ሺቂ የሳደራ ደንግዳ። 34 ኡን፥ «ላꬂ ቱሮ ደንድዳ፤ ስሞናስ በንትዳ» ያጋይዳ።
35 የንꬅ ላምእ ታማሩንꬅ ኤማሁሰ ኦገላ የዝን Ꮉንዳኖን ሶሎ ፌꬍደ ዎደ ዋይዝ ኤዛ ኤረዛኮ ኡንትስ ኦህዳ።
የሱሳ ፋ ታማሩንꬅስ በንትዳ
(ማቶ. 28:16-20፤ ማር. 16:14-18፤ ዋሐ. 20:19-23፤ ሐዋ. 1:6-8)
36 ላምእ ታማሩንꬅ ይና ኦህትላ የዝን፥ የሱሳ ኡን ግዳ ኤቂ፥ «ሳሮ ይንትስ ማቀ» ያጋይዳ።
37 ማቅኮን፥ ኡን ታኒ፥ ሜሸ ብእደ ጋራ ይእን ዣሽትዳ።
38 ኤ ኡንታጎ፥ «አኮስ ዣሽትዶ? አኮስ ሶኤ ይን ዎዝንተ ገልዶ? 39 ታ ኩሽቶን ታ ቶህቶ ቦኦተ፤ ታ ታና። ማህ አይኪ ቦኦተ፤ ታና ይን በእዛንጋራ፥ ሜሸስ አሾን መቃꬂ ባያ» ያጋይዳ። 40 ያጋእ፥ ፋ ቶህቶን ፋ ኩሽቶን ኡንታና ቤዝዳ። 41 ኡን ኡፋይሳፓ ደንድዳንፓ አማናንጺ ጋማ ቆፒ የዝን፥ የሱሳ ኡንታጎ፥ «Ꮉነ ይንትስ ሙእዘባዝ የነ?» ያጋይዳ። 42 ኡን ፈቲ ምችንትደ ሞሎ ኤስ እንግዳ። 43 ኤ ኤኪ ኡን ቲንተ ሙእዳ።
44 ኤ፥ «ታ ይንታራ ጋምእደ ዎደ ኡባነ ሙሴ ህገ ማጻፍተ፥ ናቡንꬅ ማጻፍተን ማዝሙረ ማጻፍተ፥ ታ ግሾ ጻፍንትዳና ኡባና ፎልንቶደስ ቤዛነ ያጋእ ታ ይንትስ ኦህደ ቃልታ Ꮉኖ» ያጋይዳ።
45 የ ዎደ ጌሽ ማጻፍቶ ቲሮደ ጋር ዎዝንቶ ኡንትስ ቡግዳ። 46 ይኒ ፋና፥ «ክርስቶሳ ማꬋ ኤኮዳ፥ Ꮉይꬓንꬆ ቃምተ Ꮉይቆፓ ደንዶዳ ያጋእ ጻፍንትዳ። 47 የሩሳላመፓ ደንዲ አስ ኡባና ናጋራፓ ማሮትꬅን አቶተꬅ ኤ ሱንꬅተ ማርክꬎዳ። 48 ይን ይንስ ማርካ። 49 ይኬ፥ ታንን ታ አዳይ እንግደ ኡፋይስቶ ይንትስ ዳኮዳ። ይን ሳሎፓ ዎልቃ ኤኮደ ዎንꬅስ የሩሳላመ ካታማ ጋምኦተ» ያጋይዳ። ሐዋ. 1:4
የሱሳ ሳሎ ደንድዳ
(ማር. 16:19-20፤ ሐዋ. 1:9-11)
50 ይንፓ ሱባ፥ ብታንያ ካታማ ኡንታና ኤኪ Ꮉንግዳ። ፋ ኩሽቶ ደንꬂ አንጅዳ። ሐዋ. 1:9-11 51 ኡንታና አንጅተ ኡንታፓ ሻክንት ኡደ ሳሎ ኤክንትዳ። 52 ኡን ዙጊ ጎይኒ ጋማ ኡፋይሳራ የሩሳላመ ማቅዳ። 53 ጾዛ ኡባ ዎደ ጋላትተራ ጾዘ ኬꬃ ጋምእዳ።