6
እንገ ባዝ
1 «አስ ቦኦ ጋእ ይን ሎኦ ኦችቶ አስ ቲኖ ኦቻመ ፋና ናግንቶተ። ይኒ ጋር ይአንጽኮ ሳሎ የዘ ይን አዳይፓ አንጆ ደንጋማ።
2 «ይን ዳሁንꬅስ እንግዘ ዎደ አስ ቲኖ ቦንችንቶደስ ጋእ ጩቡንꬅ ኦገ ጋጻን አይሁደ ዎሳ ኬꬃን ኦችዛን ፋና አስ ቦኦ ጋእ ኦችፐተ። ታ ይንትስ ቱሮ ኦህነ ኡን ፋ ኩሙꬅ አንጅቶ ኤክዳ ማቶ. 23:5 3 የዝን ይን ዳሁንꬅስ እንግዘ ዎደ ይን ምዛቅ ኩሸ ኦችዛኖ ይን ዎርክታ ኩሸ ኤርፐ፤ 4 ይን እሞታ ጌማ ማቀ። ጌማ በሳ ኦችዛኖ በእዘ ይን አዳይ ይንትስ አንጅቶ ቆንጨ እንጎዳ።
ዎሳ ባዝ
(ሉቃ. 11:2-4)
5 «ዎሳ ዎስተራ ጩቡንꬅ ጋር ዪፐተ። ኡን፥ ፋና አስ ቦኦ ጋእ አይሁደ ዎሳ ኬꬃ ኦገ ዶና ኤቂ ዎስዛኖ ካꬋነ። ታ ይንትስ ቱሮ ኦህነ፤ ኡን ፋ ኩሙꬅ አንጅቶ ኤክዳ። 6 የዝን ነ ዎስዘ ዎደ ነ ቆልአ ገሎ፥ ፉርꬅቶ ጎርዲ ጌማ የዘ ነ አዳያ ዎሶ፤ ጌማ ኦችንትዳኖ በእዘ ነ አዳይ ኔስ አንጆ እንጎዳ። ሉቃ. 18:10-14 7 ይን ዎስዘ ዎደ አማኖሰ አሱንꬅ ጋራ ጨር ቃላ ጋንꬅ ዎስፐተ። ኡን ቃልቶ ማህ ማህ ዎስን ጾዚ ስእነ ጋእ ቆፓነ። 8 ይኒ ግሾ፥ ኡንትን ጋር ዪፐተ። አኮስ ጋይኮ፥ ይን አዳይ ይንትስ አኮ ኮሽዛኮ ይን ዎሶዳንፓ ቲኖ ኤራነ።
9 «ይኬ፥ ይን ያጋእ ዎሶተ፦
«ሳሎ የዘ ኑ አዳዮ፥
ነ ጌሽ ሱንꬅታ አንጅንቶ።
10 ነ ካእቱምታ ዮኦ፥
ነ ቆፍታ ሳሎ Ꮉንዳን ፋና
ሳአን Ꮉኖ።
11 Ꮉይኖ ቁምቶ ኑስ እንጎ።
12 ኑ ኑና ቆህዱንꬅስ፥ አቶ ጋዛን ፋና፥
ኑስን ኑ ቆህቶ አቶ ጋኦ።
13 ኑና ኢታፓ አሾፕ አትን
ፋታና ገልꬅፐ።
[ካእቱሞን፥ ዎልቃን ቦንቾን
መዽና ኔስ። አምንኤ።]
14 «ይን ይንታና ቆህዙንꬃና አቶ ጋይኮ፥ ሳሎ የዘ ይን አዳይ ይን ቆህቶ አቶ ጋዉዳ። 15 የዝን ይን መለ አስ ናጋራ አቶ ጋአንጽኮ ይን አዳይ ይን ናጋርቶ አቶ ጋኦስ። ማር. 11:25-26
ጾማ ባዝ
16 «ይን ጾምዘ ዎደ ጩቡንꬅ ፋና ዪፐተ። አኮስ ጋይኮ፥ ኡን ጾምዛኖ አሲ ኤሮደ ፋና ፋ ስንቶ ቦꬃነ። ታ ቱሮ ኦህነ፤ ኡን ፋ ሽልማቶ ኤክዳ።
17 «የዝን ነ ጾምዘ ዎደ ነ ስንቶ ሜጮ፥ ነ ኦምቶ ትዦ። 18 ይኒ ጋር ነ ዪዝኮ ነ ጾምዘ ጾምታ አሳፓ ገንግዳ፥ የዝን ጌማ የዘ ነ አዳይ ኤርዘ ጾማ ማቃዳ። ጌማ ኦችንትዳኖ በእዘ ነ አዳይ ኔስ ሽልማተ እንጎዳ።
ሳሎ ቆሎ ሺሸ
19 «ብላ ሙእዘ በሳ፥ መቆ ብርዘ ሳአ፥ ካይዞ ቦኪ ኤክዘ ሳአ፥ Ꮉና ሳእተ፥ ይንትስ ቆሎ ሺሽፐተ። 20 የዝን ብላ ሞኦሰ በሳ፥ መቆ ብሮሰ በሳ፥ ካይዞ ቦኪ ኤኮሰ በሳ ሳሎ ይንትስ ቆሎ ሺሾተ። ያይ. 5:2 21 ነ ቆልታ የዘ በስተ ነ ዎዝንታ የሳዳ።
22 «ኣፈ አሳትꬅስ ጾምፐ። ይኒ ግሾ፥ ነ ኣፍታ ፋጻ ማቅኮ ነ ኩሙꬅ አሳትꬅታ ፎኦ ማቃነ። 23 ነ ኣፍታ Ꮉርግንትዛ ማቅኮ ነ ኩሙꬅ አሳትꬅታ ꬉማ ማቃነ። ይኬ፥ ነ ግዳ የዘ ፎእዘ ꬉማ ማቅኮ፥ ꬉማ አኮ ጋር ኣꬊ ꬉማ ማቃደ!
24 «ፈቲ አስ ላምእ ላꬅስ አቆደስ ዳንዳኦስ። ፈታያ ካꬍኮ Ꮉንካያ እጻነ፤ ዎይ ፈታያ ቦንችኮ Ꮉንካያ ለቃነ። ጾዝስን ሚሸስን ዎላል አቆደስ ዳንዳኦስ።
ኡንእንትፐተ
(ሉቃ. 12:22-31)
25 «ይኬ፥ ስኦተ! ይን ደኦ የሳደስ፥ ‹አኮ ማአደ? አኮ ኡሻደ? አኮ ማኦደ?› ጋእ ኡንእንትፐተ፤ ሸምፖ ካꬃፓ ዎይ ጋላ ማኦፓ አꬎሶ? 26 አፋ ላንዱንꬃና ቦኦተ፤ ኡን ቡዶስ፥ ማጾስ፥ ፋቻ ገልꬆስ፥ የዝን ይን ሳሎ አዳይ ኡንታና ሙዛነ። ይን ኡንታፓ ጋማ አꬎሶ? 27 ይን ግዳፓ ጋማ ኡንእንት ፋ ላይꬅትላ አፋ ፈቲ ቃማ ጉጆደስ ዳንዳእዘ የነ?
28 «ማህ ይን ማእዘ ባዝስ አኮስ ኡንእንተ? አነ ፉꬉንꬃና ቦኦተ፥ ኦቺ ላቦስ ዎይ ሱቆስ። 29 ስኦተ! መለ አቶ የዝን፥ ካት ሶሎሞነ ፋ ቦንቾ ኡባነ Ꮉና ፉꬍትፓ ፈታይ ጋር ማእካያ። 30 ይን፥ አማኖ ፋጨዙንꬆ፥ ጾዚ Ꮉይኖ በንቲ ዎንታ ታማ ዎꬎደስ የዘ ማታ የይዝ ማእስዘባዝ ማቅኮ፥ ይንታና ኡንታፓ አꬂ ዋይዝ ማእሶሶ?1 ካት 10:4-7፤ 2 ዜና 9:3-6 31 ይኒ ግሾ፥ ‹አኮ ሞኦደ? አኮ ኡሻደ? አኮ ማአደ?› ጋእ ኡንእንትፐተ። 32 ይኖ ኡባኖ ጾዝ አማኖሰ አሱንꬅ ጋንꬅ ደንጎደስ ኡንእንታነ። ይን ሳሎ አዳይ ይና ኡባና ይንትስ ኮሽዛኖ ኤራነ። 33 የዝን ኡባፓ ቲኖ ጾዘ ካእቱምቶን ኤ ጽሎትꬅቶ ኮዮተ፤ ይና ኡባና ይንትስ ጉጁንቶዳ። 34 ይኒ ግሾ፥ ዎንታስ ቆፕተራ ኡንእንትፐተ። ዎንታና ዎንታስ አቆ፤ ፈቲ ፈቲ ቃምዘ ፋስ ማቃደ ማꬋራ የነ።