9
ዎቦ አꬄ ፋጽቶ
(ማር. 2:1-12፤ ሉቃ. 5:17-26)
1 ይንፓ ሱባ፥ የሱሳ ጎንግተ ገሊ፥ አባ ፊንግ ፋ ካታማ ቅትዳ። 2 እዘ ኤራꬅ አሱንꬅ ፈቲ ዎቦ አꬃ አልጋራ ቶኪ የሱሳጎ ክእዳ። የሱሳ ኡን አማንቶ ብእ፥ ዎቦ አꬃ፥ «ታ ናአዮ፥ ዣሽትፐ! ነ ናጋርታ አቶ ጋእንትዳ» ያጋይዳ።
3 ይና ሳተ፥ አይሁደ ህገ አስታማሩንꬃፓ ፈተ ፈተ፥ «Ꮉና ጾዝ ጫዠ ባነ» ያጋእ ፋ ዎዝንተ ቆፕዳ።
4 የሱሳ ኡን ቆፍቶ ኤሪ፥ «ኢታ ባዝ ይን ዎዝንተ አኮስ ቆፐተ? 5 የዝን፥ ‹ነ ናጋርታ አቶ ጋእንትዳ› ጋዛንፓን ‹ደንዲ ኤቂ ቅቶ› ጋዛንፓ አየ ፎለ? 6 የዝን ሳአላ አፋ ናጋራ አቶ ጋዉደስ አስ ናአስ አደትታ ዎልቃ የዛኖ ታ ይንታና ኤርሶዳ» ያጋእ፥ ዎቦ አꬄጎ፥ «ደንዲ፥ ነ አልግዛ ቶኪ፥ ካራ ቅቶ» ያጋይዳ።
7 ዎቦ አꬄ ደንዲ ፋ ካራ ቅትዳ። 8 ዎርዥታ ይኖ ብእ ጋማ ቆፕዳ። ይኒ ፋና አደትꬅ ዎልቃ አስስ እንግደ ጾዛ ጋላትዳ።
ማቶሳ ጼግንተ
(ማር. 2:13-17፤ ሉቃ. 5:27-32)
9 የሱሳ የይጋፓ ደንዲ Ꮉንግተራ ማቶሳ ጋዘ ቃራጠ ጋችዘ በሳ በቲ የዝን ብእ፥ «ታና ካሎ» ያጋይዳ።
ኤዝን ደንዲ ካልዳ።
10 የሱሳ ማቶሳ ካራ ለማተላ በቲ የዝን፥ ቃራጠ ጋችዘ ጋማ አሱንꬅን ናጋራንቹንꬅ ይእ ኤራን ኤ ታማሩንꬃራ ዎላ ሞኦደስ በትዳ። 11 ፈቲ ፈቲ ፋርሳዉንꬅ ይኖ ብእ፥ የሱሳ ታማሩንꬃራ፥ «ይን አስታማርዘ ቃራጠ ጋችዙንꬃራን ናጋራንቹንꬃራ አኮስ መኤ?» ያጋይዳ። ሉቃ. 15:1-2
12 የሱሳ ይኖ ስእ፥ «ጋላ ኮሽዘ Ꮉርግንትዙንꬅስ ፋትን ፋጹንꬅስ ባያ። 13 የዝን ይን Ꮉንግ፥ ‹ታኒ ይን ዣርሽቶ ባይዝን ይን መሉንꬃና ማሮደ ፋና ኮያነ› ጋእንት ጻፍንትዳና ዋግዛኮ ኤሮተ። አኮስ ጋይኮ፥ ታኒ ናጋራንቹንꬃና ጼጎደስ ይእዳፕ አትን ጽሉንꬃና ጼጎደስ ይእካያ» ያጋይዳ። ማቶ. 12:7፤ ሆሴ. 6:6
የሱሳ ጾማ ባዝ ኦጭንትዳ
(ማር. 2:18-22፤ ሉቃ. 5:33-39)
14 የ ዎደ ዋሐንሳ ታማሩንꬅ የሱሳጎ ሺቅን፥ «ኑንን ፋርሳዉንꬅን ጾማነ፥ የዝን ነ ታማሩንꬅ አኮስ ጾሞሶ?» ያጋእ ኦጭዳ።
15 የሱሳ ማህ ኡንታጎ፥ «ሙሹራ ኡንታራ የዝን ጼግንት ይእደ አሱንꬅ አዛኖደስ ዳንዳአነ? ሙሹራ ኡን ካለፓ ኤክንቶደ ዎደ ዮኦዳ፥ ኡን የ ዎደ ጾሞዳ።
16 «ክሌ ማኦፓ ፌꬍ ጋልአ ማኦላ ስክዘ ኦደን ባያ። ይኒ ፋና የይዝኮ ክልዘ ጋልእዛ ፌꬋነ። ፌዽꬅታን ዎዚ ዳልጋነ። 17 ክሌ ዎይነ ጋልአ ስልጰ ጉጅዘ ኦደን ባያ። ይኒ ፋና የይዝኮ ክሌ ዎይንዘ ጋልአ ስልጵዛ ꬉሳነ ዎይንዘን ላንታነ፤ ስልጵዘን ላምእንꬃ ማዶሰ ባዝ ማቃነ። የዝን ክለ ዎይነ ክሌ ስልጰ ጉጆደስ ቤዛነ። ይኒ ፋና የይዝኮ ላምኡንꬅን ኢትካይዛራ ናግንታነ» ያጋይዳ።
Ꮉይቂደ ናእቶን የሱሳ ማእቶ ቦችደ ማችቶ
(ማር. 5:21-43፤ ሉቃ. 8:40-56)
18 የሱሳ ይና ኦህትላ አፋ የዝን፥ አይሁደ Ꮉላቁንꬃፓ ፈታይ ኤጎ ይእ፥ ኤ ቲኖ ቡንቁንቲ፥ «ታ ናእታ Ꮉተ Ꮉይቂዳ፥ የዝን እዛ ፋጾደ ፋና ነ ይእ ነ ኩሽቶ ኢላ አፋ ጋዶዮ» ጋእ ዎስዳ። 19 የሱሳ ደንዲ ኤራ Ꮉንግዳ፤ ኤ ታማሩንꬅን ካልዳ።
20 ኤ Ꮉንግዝን ታጶ ላምእ በረ ኩሙꬅ ሱꬅ ጎጊ ዋይꬅዘ ፈቲ ማችታ ሱባራ ሺቂ የሱሳ ማእት ማጫርቶ ቦችዳ። 21 እዛ ፋ ዎዝንተ፥ «ታ ኤ ማእት ማጫርቶ ጻላላ ቦችዛኮ ፋጾዳ» ያጋእ ቆፕዳ።
22 የሱሳ ሱብ ማቂ እዞ ብእ፥ «ታ ናእተ፥ ዣሽትፐ! ነና ነ አማንታ ፋꬅዳ» ያጋይዳ። አስታን ኢራ ፋጺ አትዳ።
23 የሱሳ አይሁደ Ꮉላቅዘ ካራ የልደ ዎደ ዛየ ፉግዙንꬃናን ዬክዙንꬃና ብእ፥ 24 «አነ Ꮉልኦተ፤ ኤራꬅ ናእታ ገንትዳፕ አትን Ꮉይቂካያ» ያጋይዳ። የዝን አሱንꬅ ኤላ አፋ ሚጭዳ። 25 አሱንꬃና ባለ ከስዳንፓ ሱባ ኬꬃ ገሊ፥ ናእት ኩሽቶ አይክዳ፥ ናእታን ደንዲ ኤቅዳ። 26 ይና ኦህታ ይና ሳእቶ ኡባ የልዳ።
የሱሳ ላምእ ቆቁንꬃና ፋꬅዳ
27 የሱሳ የይጋፓ ደንዲ ጎደ ቲኖ Ꮉንጎደራ ላምእ ቆቁንꬅ ፋ ቃልቶ ꬎቅ ዪዚ፥ «ዳዉተ ናአዮ፥ ኑና ማሮያ» ያጋይትራ ኤዛ ካልዳ።
28 የሱሳ ኬꬃ ገልዘ ዎደ ቆቁንꬅ ኤዛ ካሊ የልዳ። የሱሳ ኡንታጎ፥ «ታኒ ይኖ ኦቾደስ ዳንዳእዛኖ ይን አማናነተ?» ያጋይዳ።
ኡንትን፥ «ዬ፥ ላꬆ» ያጋእ ማህዳ።
29 ይንፓ ሱባ፥ የሱሳ ኡን ኣፍቶ ቦቺ ኡንታጎ፥ «ይንትስ፥ ይን አማንቲ ፋና Ꮉኖ» ያጋይዳ። 30 ኡን አፍታን ቡጉንትዳ። የሱሳ ኡንታጎ፥ «Ꮉኖ ኦደስን ኦህፐተ» ያጋእ ምንꬂ ኦህዳ። 31 የዝን አሱንꬅ Ꮉንግ የሱሳ ባዝ ይና ሳእተ ኡባ ኦህዳ።
32 ኡን የይጋፓ ከዘ ዎደ አሱንꬅ ቱና አያና አይኪ ሙሙዝደ ፈቲ አስ የሱሳጎ ክእዳ። 33 ቱና አያና ኬዝደፓ ሱባ ሙመ አꬄ ኦህንትዳ። አሱንꬅን ጋማ ቆፕዳ፥ «ይኒ ፋና ክለ ባዝ እስራኤለ ሳአ Ꮉንካያ» ያጋይዳ።
34 የዝን ፋርሳዉንꬅ፥ «ቱና አያኑንꬅ Ꮉላቃራ ቱና አያኑንꬃና ከሳነ» ያጋይዳ። ማቶ. 10:25፤ 12:24፤ ማር. 3:22፤ ሉቃ. 11:15
የሱሳ አሱንꬅስ ይቅስንትዳ
35 የሱሳ አይሁደ ዎሳ ኬꬃ ታማርስተራ፥ ሳሎ ካእቱሞ ዎንገለ ሳባክተራ፥ አሱንꬃና Ꮉርገ ኡባፓ ፋꬅተራ ካታማን ካራ ጋንጨ ኡባነ ዉትዳ። 36 ጋማ ዎርዥታ፥ የንግዘ አስ ባይዘ ዱሮ ፋና ኡንታና በእዘ አስ ꬋብን ኡን የዛኖ ብእ ኡንትስ ይቅስንትዳ። 37 ፋ ታማሩንꬃጎ፥ «ሺቆደ ካꬅታ ጋማ፥ የዝን ካꬅቶ ሺሽዘ አሱንꬅ ኤራꬅ። 38 ይኒ ግሾ፥ ላꬂ ካꬃ ሺሾደ ኦቻንቹንꬃና ዳኮደ ፋና ዎሶተ» ያጋይዳ።