ክለ ጫቆ ማቶሳ 26

የሱሳ ዎꬎደስ ዞርንትዳ

(ማር. 14:1-2፤ ሉቃ. 22:1-2፤ ዋሐ. 11:45-53)

1 የሱሳ ይና ትምርትቶ ኡባ Ꮉስደ ዎደ ፋ ታማሩንꬃጎ፥ 2 «ላምእ ቃማፓ ሱባ፥ ፋስካ ባአለ ቦንችዘ ቃማ ማቅዛኖ ይን ኤራነ። ይና ቃምተ አስ ናአይ ማስቃላላ አፋ ሱጹንቶደስ አስ ኩሸ ኣꬊ እንግንቶዳ» ያጋይዳ።

3 የ ዎደ ካህኑንꬅ Ꮉላቁንꬅን ጭሙንꬅ፥ ቃያፋ ጋዘ ካህኑንꬅ Ꮉላቅዘ ኬꬃ ሺቂ፥ 4 አስ ኤርካይዝን የሱሳ አይኪ፥ ዎꬎደስ ዞርንትዳ። 5 የዝን ኡን፥ «አሱንꬅ ግዳ ካች ደንዳመ ፋና ጋእ፥ ፋስካ ቦንችዘ ቃማ ማቅፐ» ያጋይዳ።

ፈቲ ማችታ የሱሳ ሽቶ ትዥዳ

(ማር. 14:3-9፤ ዋሐ. 12:1-8)

6 የሱሳ ብታንያ ካታማ ቁርሱማ Ꮉርግደ ስሞና ካራ የነ። 7 የሱሳ ሌማተላ የዝን ፈቲ ማችታ አልባስጥሮሰ ብልቃጠ ኩሙꬅ ጋማ አልኦ ሽቶ ኤኪ ይእ የሱሳ ኦምተ ጉስዳ። 8 የዝን የሱሳ ታማሩንꬅ ይኖ ብእ ዥልꬊ፥ «Ꮉና ሽትታ Ꮉሪ ኢትዛና አኮሶ? 9 Ꮉና ሽትታ አልኦ ዋጋስ ባይዝንቲ፥ ብርታ ዳሁንꬅስ እንግንቶደስ ዳንዳእንታነ» ያጋይዳ።

10 የሱሳ ኡን ጋዛኖ ኤሪ፥ ኡንታጎ፥ «Ꮉና ማችቶ አኮስ ዋይተ? እዛ ታስ ሎኦ ባዝ ኦችዳ። 11 ዳሁንꬅ ኡባ ዎደ ይንታራ የሳዳ። የዝን ታኒ ይንታራ ኡባ ዎደ የዞስ። 12 እዛ Ꮉና ሽትቶ ታላ አፋ ጉስዳና ታና ሞጎደስ ጊግሳደስ። 13 ታኒ ይንትስ ቱሮ ኦህነ፤ ሳአ ኡባ Ꮉይ ዎንገልዘ ሳባክንትዘ በሳ አባን፥ አሱንꬅ እዞ ኦሆደ ጋር እዛ ኦችዳና ኦህንቶዳ» ያጋይዳ።

ይሁዳ የሱሳ አꬂ እንጎደስ ጊግንትዳ

(ማር. 14:10-11፤ ሉቃ. 22:3-6)

14 የ ዎደ ታጶ ላምእ የሱሳ ታማሩንꬃፓ ፈታይ፥ የስቆሮቱ ሳአ ይሁዳ ጋእንትዘ ካህኑንꬅ Ꮉላቁንꬃጎ፥ 15 Ꮉንግ፥ «ታኒ ይንትስ የሱሳ አꬂ እንግኮ፥ ይን ታስ አኮ እንጎደ?» ያጋእ ኡንታና ኦጭዳ። ኡን ዞርንት Ꮉስታም ሹች ብራ ሳንትመ *† እንግዳ። 16 ይንፓ ሱባ፥ ይሁዳ የሱሳ አꬂ እንጎደስ ዎትዘ ዎደ ኮያነ።

የሱሳ ፋስካ ካዉቶ ፋ ሐዋሩንꬃራ ሙይዳ

(ሉቃ. 22:7-14፥ 21-23)

17 ቦራ ባአለ ቦንችዘ ቲኖ ቃማ፥ የሱሳ ታማሩንꬅ ኤጎ ይእ፥ «ፋስካ ቦንችዘ ቃማ ነ ማአደ ካꬃ ኑ አባ ጊግሳደ?» ያጋይዳ።

18 የሱሳ ኡንታጎ፥ «ካታማ የዘ አꬄጎ Ꮉንግ፥ ‹አስታማርዘ፥ ታስ ዎደ የልደ ግሾ ታ ታማሩንꬃራ ፋስካ ቦንችዘ ቃማ ነ ካራ ኣꬆዳ ጋይዳ› ያጋኦተ» ጋይዳ።

19 ኤ ታማሩንꬅ የሱሳ ፋና ኪትዳን ፋና ኦቺ፥ ፋስካ ባአለ ቃማ ማአደ ካꬃ ጊግዝዳ።

20 ሳእታ ኡጉርዘ ዎደ የሱሳ ታጶ ላምእ ሐዋሩንꬃራ ካꬃ ማአደስ በትዳ። 21 ኡን ሙዝን፥ የሱሳ ኡንታጎ፥ «ታኒ ይንትስ ቱሮ ኦህነ፤ ይንታፓ ፈቲ አꬄ ታና አꬂ እንጎዳ» ያጋይዳ።

22 ኡን ጋማ ታኒ፥ ፈተ ፈተ፥ «ላꬆ፥ ቱሮ ታና የሳነ?» ጋእ ኤዛ ኦጭዳ።

23 የሱሳ ማህ፥ «ፋ ኩሽቶ ታራ ዎላ ጋባተ ዳክዛይ ኤ ታና አꬂ እንጎዳ። 24 አስ ናአ፥ ጾዘ ቃልተ ኤስ ጻፍንትዳን ጋር Ꮉይቆዳ። የዝን አስ ናአ አꬂ እንግዘ አꬃ ባደ፤ የ አꬄ የልንትካይዛራ አተዛኮ ኤስ ሎኦ የሻ» ያጋይዳ።

25 ኤዛ አꬂ እንጎደስ የዘ ይሁዳ ማህ፥ «አስታማርዛዮ፥ ነ ጋዘ ታናነ?» ያጋይዳ።

የሱሳ ማህ፥ «ነ ጋይደ ፋና» ያጋይዳ።

ላꬄ ካዎ

(ማር. 14:22-26፤ ሉቃ. 22:15-20፤ 1 ቆሮ. 11:23-25)

26 ኡን ሙዝን፥ የሱሳ ዳቦ ቦራ ኤኪ ጾዝ ጋላትዳ። የ ቦርዛ ባጺ ፋ ታማሩንꬅስ እንግ፥ «Ꮉተ፥ ሞኦተ፥ Ꮉና ታ አሽቶ» ያጋይዳ።

27 ኡሽቶን ኤኪ፥ ጾዝ ጋላትዳ። ኡንትስ እንግ፥ «ኡቡንꬅ Ꮉንፓ ኡዦተ። 28 Ꮉና ጋማ አሱንꬅ ናጋርታ አቶ ጋእንቶደ ፋና ላንትዘ ታ ሱꬅቶ። Ꮉና ሱꬅታ ጾዚ ይንታራ ገልዘ ክለ ጫቅቶ። 29 የዝን ታኒ ይንትስ ኦህነ፤ ታኒ ታ አዳይ ካእቱሞ ክለ ዎይነ ኡሽ ይንታራ ኡሻደ ቃማ የሎደስ ማህ Ꮉኖ ዎይነ ኡሽቶ ኡዦስ» ያጋይዳ።

30 ጋላታ ማዝሙረ የጽደፓ ሱባ ሻማሄ ደረ Ꮉንግዳ።

የሱሳ ጴጥሮሳ ካዶዳኖ ቲኖ ኦህዳ

(ማር. 14:27-31፤ ሉቃ. 22:31-34፤ ዋሐ. 13:36-38)

31 የ ዎደ የሱሳ ኡንታጎ፥

«‹ጾዚ የንግዛያ ጉዶዳ

ዱርንꬅን ላልንቶዳ›

ጋእንት ጾዘ ቃልተ ጻፍንትዳን ጋር Ꮉይኖ ቃማ ይን ኡቡንꬅ ታና አሺ ላልንቶዳ። 32 የዝን ታኒ Ꮉይቆፓ ደንድዳንፓ ሱባ ይንታፓ ቲኒ ጋልላ ቅቶዳ» ያጋይዳ።

33 ጴጥሮሳ ማህ፥ «ኡን ኡባና ነና አሺ ካድኮን፥ ታኒ ነና ካዶስ» ያጋይዳ።

34 የሱሳ ጴጥሮሳጎ፥ «ታኒ ኔስ ቱሮ ኦህነ፤ Ꮉይኖ ቃማ ሉኩለ ኦሎዳንፓ ቲኖ ነ ታና Ꮉይꬕ ቶሄ ካዶዳ» ያጋይዳ።

35 ጴጥሮሳ ማህ፥ «ታኒ ኔራ ዎላ Ꮉይቀፕ አትን ነና ሙሎን ካዶስ» ያጋይዳ።

Ꮉንኮ ኤ ታማሩንꬅ ኡባ ይኒ ፋና ያጋይዳ።

የሱሳ ጌተሰማነ ዎስዳ

(ማር. 14:32-42፤ ሉቃ. 22:39-46)

36 የ ዎደ፥ የሱሳ ፋ ታማሩንꬃራ ጌተሰማነ ጋዘ በስተ Ꮉንግ፥ ኡንታጎ፥ «ታኒ ጎደ Ꮉንግ ጾዝ ዎሶዳ፥ ይን Ꮉነ በቶተ» ያጋይዳ። 37 ጴጥሮሳን ዛብድዮሳ ናኡንꬃና ላምኡንꬃና ፋራ ኤኪ Ꮉንግ ጋማ አዛኖራ ኡንእንተ አይክዳ። 38 ማህ ኡንታጎ፥ «ታኒ Ꮉይቆስ የልꬅዘ ኡንአ ኡንእንትዳ። Ꮉነ ጋምኦተ ታራ ሚንግ ናጎተ» ያጋይዳ።

39 ኤራꬅ ቲኖ Ꮉንግ ሳአ ቡንቁንቲ፥ «ታ አዳዮ፥ ዳንዳእንትዘ ባዝ ማቅኮ Ꮉና ዋየ ጹኡቶ ታፓ Ꮉሶ። የዝን ነ ቆፍታ Ꮉኖፕ አትን ታ ቆፍታ Ꮉንፐ» ያጋእ ጾዝ ዎስዳ።

40 የሱሳ ፋ ታማሩንꬃጎ ማቂ ይእ ኡን ገንተዝን ደንግዳ። ጴጥሮሳጎ፥ «ይን ፈቲ ሳተ የዛኮን ታራ ሚንግ ናጎደስ ዳንዳኦሳ? 41 ፋታና ይን ገላመ ጋር ባርክ ናጎተን ጾዝ ዎሶተ። አያና ጊግንትዳ፥ የዝን አሾ ላቢꬅ» ያጋይዳ።

42 የሱሳ ማህ ላምእንꬃ Ꮉንግ፥ «ታ አዳዮ፥ ታኒ Ꮉና ዋየ ጹኡዘፓ ኡዥካይዛራ አꬎደስ ዳንዳእንቶሳ ማቅኮ ነ ቆፍታ Ꮉኖ» ያጋእ ጾዝ ዎስዳ። 43 ማህን ማቂ ይእዘ ዎደ ኤ ታማሩንꬅ ኣፍቶ ገንቶ ጎዝን፥ ዎይኤዝን ደንግዳ።

44 ማህ ኡንታና አሺ Ꮉንግ፥ ቲኖ ቃልቶ ማህ Ꮉይꬕንꬃ ዎስዳ። 45 ይንፓ ሱባ፥ ፋ ታማሩንꬃጎ ይእ፥ «Ꮉኖ የሎደስ ገንቲ ሸምፒ የነ? ይኬ፥ አስ ናአ፥ ናጋራንቹንꬅ ኩሸ ኣꬊ እንግንትዘ ሳተ የልዳ። 46 ደንዲ የꬎተ፥ ታና አꬂ እንግዘ Ꮉይንሸ የልዳ» ያጋይዳ።

የሱሳ ፋ ሞርኩንꬃራ አይክንትዳ

(ማር. 14:43-50፤ ሉቃ. 22:47-53፤ ዋሐ. 18:3-12)

47 የሱሳ Ꮉጋ ኦህዝን፥ ታጶ ላምእ ታማሩንꬃፓ ፈታይ፥ ይሁዳ የልዳ። ካህኑንꬅ Ꮉላቁንꬅን ጋደ ጭሙንꬅ ኪትደ ጋማ አሱንꬅ ማሻን ጉፈ አይኪ ኤራ ዎላ ይእዳ። 48 የሱሳ አꬂ እንግደ ይሁዳ የ ጋማ አሱንꬃጎ፥ «ታኒ ዬርዛይ ይን ኮይዘ ኤዛ፥ ኤዛ አይኮተ» ያጋእ ማላ እንግ ጋድዳ።

49 ኢራ የሱሳጎ ሺቂ፥ «አስታማርዛዮ፥ ሳሮ ኔስ ማቀ» ያጋእ ኤዛ ዬሪዳ።

50 የሱሳ ኤጎ፥ «ታ ላግዛዮ፥ ነ Ꮉነ አኮስ ይእዶ?»‡ ያጋይዳ።

ይንፓ ሱባ፥ ሺቂ፥ የሱሳ ኩሸራ አይክዳ። 51 የሱሳራ የዙንꬃፓ ፈታይ ፋ ማሽቶ ሾዲ ካህኑንꬅ Ꮉላቅዘ አርዛ ጉዲ፥ ኤ Ꮉይቶ ጋቺ ኦልዳ። 52 የዝን የሱሳ፥ «ነ ማሽቶ ሱባ ሾክተ ማሆ። አኮስ ጋይኮ፥ ማሻ ሾድዘ ኡባ ማሻራ Ꮉይቆዳ። 53 ታ፥ ታ አዳያ ዎስዛኮ ታጶ ላምእ ሙኩላፓ ኣꬍዘ ኪታንቹንꬃና§ ዳኮደስ ዳንዳኦሳ ኔስ አዛነ? 54 ዬዝን፥ ጾዘ ቃልተ ይኒ ጋር Ꮉኖደስ ቤዛነ ጋይንትዳና ዋይዝ ፎልንቶደ?» ያጋይዳ።

55 ይና ሳተ፥ የሱሳ የንꬅ ሺቅደ ጋማ አሱንꬃጎ፥ «ታና ፋኖ ማህ አይኮደስ ማሻን ጉፈ አይኪ ይእዳተ? ታኒ ጾዘ ኬꬃ ቃማን አዋራ ታማርስተራ ይንታራ የዘ ዎደ ታና አይክካያ። 56 የዝን Ꮉና ኡባ Ꮉንዳና ናቡንꬅ ጾዘ ቃልተ ጻፍዳና ፎልንቶደ ፋና» ያጋይዳ።

የ ዎደ ኤ ታማሩንꬅ ኡባ ኤዛ አሺ ላልንትዳ።

የሱሳ ፍርዳ ሻንጎ ቲኖ ሺቅዳ

(ማር. 14:53-65፤ ሉቃ. 22:54-55፤ ዋሐ. 18:13-14፥ 19-24)

57 የሱሳ አይክዱንꬅ ካህኑንꬅ Ꮉላቃ ቃያፋጎ ኤዛ ካንግዳ። እዘ ህገ አስታማሩንꬅን ጋደ ጭሙንꬅ ሺቂ የነ። 58 የዝን ጴጥሮሳ ካህኑንꬅ Ꮉላቅዘ ዎፋ የሎደስ Ꮉኮራ ኤዛ ካላነ። ኤ ፎልቶ በአደ ዎንꬅስ ግዳ ገሊ ናግዙንꬃራ በትዳ።

59 ካህኑንꬅ Ꮉላቁንꬅን ሺቅደ አሱንꬅ ኡባ የሱሳ ዎꬎደስ ኤላ አፋ ዎርዶ ማርካ ኮይዳ። 60 ጋሙንꬅ ይእ ኤላ አፋ ዎርዶ ማርካ ማርክꬍዳ፥ የዝን አኮን ደንግካያ። ሱባፓ ላምእ አሱንꬅ ይእ፥ 61 «Ꮉይ አꬄ፥ ‹ታኒ ጾዘ ኬꬅቶ ላሊ Ꮉይꬕ ቃማራ ማህ ኬጾደስ ታ ዳንዳአነ› ጋይዳ» ያጋእ ኡን ኦህዳ።

62 ካህኑንꬅ Ꮉላቅዘ ደንዲ ኤቂ የሱሳጎ፥ «Ꮉንስ ነና ሞትዘ ሞትስ ነ ማህዘባዝ ባ?» ያጋይዳ። 63 የዝን የሱሳ ስእ ጋይዳ። ማህ ካህኑንꬅ Ꮉላቅዘ፥ «ታኒ ነና ደኦ ጾዘ ሱንꬅተ አይካነ፤ ኔኒ ጾዘ ናአ ክርስቶሳ ማቅኮ ኑስ ኦሆ» ያጋይዳ።

64 የሱሳ ማህ፥ «ኔኒ ነ ኦምተ ጋይዳ። የዝን ታኒ ይንትስ ኦህነ፤ ይኬፓ ሱባ፥ አስ ናአ ዎልቃማ ጾዘ ምዛቅ ባጋራ በቴዝን፥ ማህ ሳሎ ꬎነራ የእዝን ይን በአዳ» ያጋይዳ።

65 የ ዎደ ካህኑንꬅ Ꮉላቅዘ ፋ አፉልቶ ፌꬊ፥ «Ꮉያ ቦኦተ ጾዝ ጫዥዳ! ኑና መለ ማርካ አኮስ ኮሸ? ኤ Ꮉተ ጫዥዳኖ ይን ስእዳ። 66 ይን ቆፍታ አኮ?» ያጋይዳ።

ኡንትን፥ «ኤስ Ꮉይቆ ቤዛነ» ያጋእ ማህዳ።

67 ዬዝን፥ ኡን ኤ ስንተ ጩቲ ጉድዳ። ማሉንꬅ ኤዛ ባቂ፥ 68 «ክርስቶሳ! ነና ጉድደ ኦደ? አነ ኑስ ትንቢተ ኦሆ» ያጋይዳ።

ጴጥሮሳ የሱሳ ካድዳ

(ማር. 14:66-72፤ ሉቃ. 22:56-62፤ ዋሐ. 18:15-18፥ 25-27)

69 ጴጥሮሳ ባለ በቴዝን፥ ፈቲ አርታ ኤጎ ይእ፥ «ኔንን ጋልላ የሱሳራ ዎላ የዛያ» ያጋይዳ።

70 የዝን ኤ ኡን ኡቡንꬅ ቲኖ ይና አርትጎ፥ «ነ ጋዛና አኮ የዛኮን ታ ኤሮስ» ያጋእ ካድዳ።

71 ማህ Ꮉንግ ጋሰ ፉርꬃ የሎደራ መለ አርታ ኤዛ ብእ፥ እዘ የዘ አሱንꬃጎ፥ «Ꮉይ አꬄ ናዝረተ የሱሳራ የነ» ያጋይዳ።

72 ጴጥሮሳ ላምእንꬃ ጫቂ፥ «ታኒ የ አꬃ ኤሮስ!» ያጋይዳ።

73 ኤራꬅ ጋምኦደራ፥ የይጋ ኤቅደ አሱንꬅ ጴጥሮሳጎ ይእ፥ «ኔኒ ቱሮ ኡንታራ ዎላ የዛያ፤ ነ ነ ኦህተ ኤርንታነ» ያጋይዳ።

74 ይንፓ ሱባ፥ ጴጥሮሳ፥ «ታኒ የ አꬃ ኤሮስ!» ያጋእ፥ ፋና ባደን ጫቆ አይክዳ።

የ ዎደ ኢራ ሉኩለ ኦልዳ። 75 የሱሳ ኤጎ፥ «ነ ሉኩለ ኦሎደፓ ቲኖ ታና Ꮉይꬕ ቶሄ ካዶዳ» ጋይዳኖ ጴጥሮሳ ቲሪ፥ ባለ ኬዚ ኢታ ዬፎ ዬክዳ።

26:3 ከዘ 12:1

26:8 ሉቃ. 7:37

26:12 ማሄ 15:11

26:15 ዛካ. 11:12

*26:15 ብራ ሳንትመ፦ አኮን ላምንትካይዘ ጌሽ ብራ ጋኤ።

†26:15 Ꮉስታም ብራ ሳንትመ፦ Ꮉስታም ብራ ሳንትመ እስራኤለ ሳአ አሮ ዎንግንትዘን ባይዝንትዘ ዋጋ።

26:24 ማዝ. 41:9

26:29 ከዘ 24:8፤ ኤር. 31:31

26:32 ዛካ. 13:7

26:33 ማቶ. 28:16

‡26:50 ዎይ መለ ብልꬅታ ታ ላግዛዮ፥ ነ Ꮉነ አኮ ኦቼ?

§26:53 ፈቲ ጭፍራስ እዝፑን ሙኩል ኪታንቾ የዛነ።

26:56 ሉቃ. 19:47፤ 21:37

26:62 ዋሐ. 2:19

26:65 ዳነ. 7:13

26:66 ሌዌ 24:15-16

26:68 ኢሳ. 50:6