ጳዉሎሳ ፍልሞናስ
ጻፍደ ኪታ
ገለ
ፍልሞና ኤርንትደ አማንዘ አስ። ኤ ቆላስያሳ ዎሳ ኬꬃ አስ ማቅካይዛራ አቶስ። ፍልሞናስ አናስሞሳ ጋዘ አሮ የነ። የ አርዘ ፋ ላꬄፓ በቲ ቅትደ ዎደ አች ኬꬃ የዘ ጳዉሎሳራ የልንትዳ። አናስሞሳ የሱሳ አማኖደ ጋር ኦችደ ጳዉሎሳ። ጳዉሎሳ ፍልሞናስ ጻፍደ ኪትዛ፥ ፍልሞና ሱብ ማቂ ኤጎ Ꮉንግዘ ፋ አርዘራ ጊጎደ ፋና ቆፕዛነ። ጉጂ Ꮉተ አናስሞሳ አማንዘ አስ ማቅደ ግሾ ይኬፓ ሱባ አማንዘ እሸ ፋና ኤዛ ሞኪ ኤኮደ ጋር ፋትን አሮ ፋና ኤዛ ፋይዳመ ፋና ኤስ ኦህዳ።
ኣፈ ቆፉንꬅ
ሳር 1-3
ጋላታን ዎሳ 4-7
ጳዉሎሳ አናስሞሳ ግሾ ፍልሞና ዎስዳ 8-21
ጻꬅ ቆፋ 22-25
1
1 ታኒ ጳዉሎሳ፥ የሱስ ክርስቶሳ ግሾ አቻ የዛይን ኑ እሸ ጢሞትዮሳ፥ ኑራ ኦችዘ ኑኒ ካዽዘ ፍልሞናስ፥ 2 ይኒ ፋና ነ ካራ ሺቅዘ አማንዙንꬅስ፥ ኑ ምሽታ አፍብያሳስን ኑራ ዎላ የዘ ዎታዳረ አርክጳሳስ ጻፍደ ኪታ። ቆላ. 4:17
3 ጾዘ ኑ አደፓን ኑ ላꬄ የሱስ ክርስቶሳፓ አꬎ ኬሃትꬅን ሳሮትꬅ ይንትስ ማቀ።
ፍልሞና ሲቆን አማኖን
4-5 ኔኒ ጌሹንꬃና ካꬍዛኖን ላꬄ የሱሳ አማንዛኖ ታኒ ስእደ ግሾ ጾዛ ዎስተራ ነና ቆፕዘ ዎደ ኡባ ታ ጾዝ ጋላታነ። 6 ኔኒ ነ አማንቶ መሉንꬅስ ሻክዛና ኑስ ክርስቶስ የሱሳ ባጋራ የእዘ ሎኦ ባዝ ኡባ ኤሮደ ፋና ታኒ ጾዝ ዎሳነ። 7 አማንዙንꬅ ዎዝንታ ነ ኦችተ ሸምፕደ ግሾ ታ እሻዮ፥ ታኒ ነ ሲቅተ ጋማ ኡፋይስን ምንꬅትሞ ደንግዳ።
ጳዉሎሳ አናስሞሳስ ዎስደ ዎሳ
8 ይኒ ግሾ፥ ኔኒ ኦቾደስ ቤዘባዝ ኦቾደ ፋና ነና ኪቶደስ ክርስቶሳ ባጋራ ታስ ምንꬂ ቆፋ የነ። 9 ታኒ፥ ጭምዘ ጳዉሎሳ፥ ክርስቶስ የሱሳስ Ꮉተን አች ኬꬃ የዛይ፥ ሲቆራ ነና ዎሳነ። 10 ታኒ አች ኬꬃ የዝተራ ክርስቶሳራ ታስ ናአ ማቅደ አናስሞሳ ግሾ ነና ዎሳነ። ቆላ. 4:9 11 ኤ ዛጋ ነና ማዶስ፥ የዝን Ꮉተ ነናን ታናን ቱርፓ ማዶደ አስ።
12-13 ታኒ ዎዝናፓ ካዽዘ አናስሞሳ ኔጎ ዳክዳ። ታኒ ዎንገለ ግሾ አጭንቲ የዝን፥ ነ ግሾ ማህ ታና ማዶደ ፋና ታ ካለ ኤዛ አሾደስ ኮይዳ። 14 የዝን ነ ቆፋ ጋር ኦቾደስ ኮይዳፕ አትን ኔራ ዞርንትካይዛራ ዎልቃራ አኮን ኦቾደስ ኮዮስ።
15 አናስሞሳ ኤራꬅ ዎደ ኔፓ ሻክንትደ፥ ኦደ ኤሮደ ማቂ ኡባ ዎደ ኔራ የዝካይዛራ አታማ። 16 ይኬ፥ Ꮉንፓ ሱባ አናስሞሳ አሮ ባይዝን አሮፓ ኤ ጋማ አꬋነ። ኤ ታስ አኮ ጋር ሲቆ እሸ! ማህ ኤ ኔስ አሾ ባጋራን ላꬄ ባጋራ አꬍደ እሸ።
17 ይኬ፥ ኔኒ ታና ኔስ ላገ ጋዘባዝ ማቅኮ ታና ሞክዛንፋና ኤዛ ሞኮ። 18 ኤ ነና ቆህደ ባዝ ዎይ ኤስ ጋለ የዝኮ ታፓ ኤኮ። 19 ይና አጭቶ ታ ጭጋዳ ጋእ ታኒ፥ ጳዉሎሳ፥ ታ ኩሽተ ጻፋነ። ኔኒ ታስ ነ ሸምፕቶ ጋልꬊ በትዳያ ታኒ ነና ቲርሳደስ ኮሾስ።
20 ታ እሻዮ፥ ላꬄ ባጋራ ኔፓ ማደ ደንጎደስ ኮይዳ። ክርስቶሳ ባጋራ ታና ምንꬅꬆ። 21 ታኒ ጋይዳንፋ ጋማ ነ ኦቾዳኖ ኤሪ ማህ ነ ታስ ኪትንቶዳኖ አማኒ Ꮉኖ ጻፋነ።
22 ጾዚ ይን ዎስቶ ስእ ታና ይንታጎ ሱብ ማሆዳ ጋእ ቆፕዘ ግሾ ታስ አቅዘ ኬꬅ ጊግዞ።
ዉርሱꬅ ሳር
23 ክርስቶስ የሱሳ ግሾ ታራ አቻ የዘ ኤጳፍራ ነና ሳሮ ሳሮ ጋነ። ቆላ. 1:7፤ 4:12 24 ማህ ታራ ዎላ ኦችዘ ማርቆሳ፥ አርስጥሮኮሳ፥ ዴማሳን ሉቃሳ ነና ሳሮ ሳሮ ጋነ። ሐዋ. 12:12፥ 25፤ 13:13፤ 15:37-39፤ 19:29፤ 27:2፤ ቆላ. 4:10፥ 14፤ 2 ጢሞ. 4:10-11
25 ላꬄ የሱስ ክርስቶሳ አꬎ ከሃትꬅታ ይንታራ ማቀ።