ጳዉሎሳ ፍልጵስዩሳ አሱንꬅስ
ጻፍደ ኪታ
ገለ
ጳዉሎሳ ፍልጵስዩሳ አሱንꬅስ ጻፍደ ኪታ ጻፍንትደ፥ ሮመ ሳአ መቀዶንያ አዉራጃ፥ ፍልጵስዩሳ ሳአ የዘ ዎሳ ኬꬅትስ። ይና ዎሳ ኬꬅታ ጳዉሎሳ አዉሮፓ ሳአ ቲኖ ኤስደ ዎሳ ኬꬂ። ይና ኪታ ጻፍንትደ፥ ጳዉሎሳ አች ኬꬃ የዘ ዎደ መለ አማንዘ ኦቻንቹንꬅ ኤዛ እጽደ ዎደን ፍልጵስዩሳ ዎሳ ኬꬃ ደንድደ ዎርዶ ትምርትት ግሾ ኤ ዎዝንታ ጋማ አዛንደ ዎደ። ማቆ የዝን፥ ጳዉሎሳ የሱስ ክርስቶሳ ምንꬂ አማንዘ ግሾ Ꮉና ኪተ ቆንጪ በንትዘ፥ ኡፋይስን ኩሙꬅ አማንንተ። ፍልጵስዩሳ የዘ ጋማ አሱንꬅ ሮመፓ ድእንቲ ይእደ አስ። ኡን ሮመ ሳአስ ይቅስንታነን ሎይꬂ ካፋነ። ኡንታፓ ፈታይ ፈታይ አማኒ ፋ ጋደ አሱንꬃራ ባይእንትዳ። ይና ባይእታ ኡንታላ አፋ ማꬋን ዳህቱሞ ክእዳ (ሐ። ኦ። 16:20-21)።
ጳዉሎሳ Ꮉና ኪቶ ጻፍደ ቲኖ ምክናትታ ኤዛ ማꬍዘ ዎደ ማዶደስ ፍልጵስዩሳ አማንዘ አሱንꬅ እሞ ኤስ ዳክደ ግሾ ኡንታና ጋላቶደስ። ኤላን ኡንታላ አፋ ዱማ ዱማ ማꬋ የልደባዝ ማቅኮን ኡን ምንጎደ ፋናን ኩሙꬅ አማንንቲ የሳደ ጋር Ꮉና በንትደ ቃምተ ኡንታና ምንꬅꬃነ። ጬቆን ኡቱራ አሺ፥ የሱስ ክርስቶሳ ዳልጋትꬅተ ኡን ኩሞደ ፋና ምንꬂ ኡንታና ቆፍዝዳ። የሱስ ክርስቶሳራ ፈትላ ማቂ ኡን ደንግደ ደኦ ጾዘ አꬎ ኬሃትꬃፋ ኬዝዳኖን አማኖራ ኡን ኤክዳ ፋትን አይሁዱንꬅ ዎጋ ፎለራ በንትደባዝ ባይዛኖ ኡንታና ቆፍዛነ። የሱስ ክርስቶሳራ ፈትላ የዘ ኡቡንꬅስ ጾዚ እንግዘ ሳሮን ኡፋይስ ኡንትስ ጻፍዳ።
Ꮉና ኪታ ኤርንትደ ኡፋይስ፥ አማንንተ፥ ፈተትꬅን አማኖራ ሚንግ ደኦ ቆንጭዝ ቤዛነ። ይንላ አፋ ጉጂ፥ ጳዉሎሳ ፍልጵስዩሳ ዎሳ ኬꬅቶ ሲቅደ ዳማ ሲቅቶ ቆንጭዛነ።
ኣፈ ቆፉንꬅ
ገለ ቆፋ 1:1-11
ጳዉሎሳ Ꮉኒ የዘ የስ 1:12-26
አማኖን አዝዘ የስ 1:27—2:18
ጢሞትዮሳስን ኤጳፍራድቱስ የዘ ቆፋ 2:19-30
ሞርኩንꬃፓን ኢቱንꬃፓ ናግንተ 3:1—4:9
ጳዉሎሳን ፍልጵስዩሳ አማንዘ አሱንꬅን 4:10-20
ሳሮትꬅን አንጆ 4:21-23
1
1 ክርስቶስ የሱሳራ ፈቶ ማቅደ ግሾ ጾዘ ባዝ ማቅደ፥ ፍልጵስዩሳ ካታማ የዘ ዎሳ ኬꬂ አህዙንꬅስን ዳቆናተስን ክርስቶሳ የሱሳራ የዘ ጌሹንꬅስ ኡቡንꬅስ። የሱስ ክርስቶሳ አሮ ማቅደ፥ ጳዉሎሳፓን ጢሞትዮሳፓ ዳክንትደ ኪታ።
2 ኑ አዳይ ጾዘፓን ላꬄ የሱስ ክርስቶሳፓ አꬎ ኬሃትꬅን ሳሮትꬅ ይንትስ ማቀ። ሐዋ. 16:12
ጳዉሎሳ ጋላታ ዎሳ
3 ታኒ ይንታና ቲርዘ ዎደ ኡባ፥ ታ ጾዝ ጋላታነ። 4 ታኒ ይን ኡቡንꬅስ ጾዝ ዎስዘ ዎደ ኡፋይሳራ ዎሳነ። 5 ይን ቲኖ ቃማፓ Ꮉይኖ የሎደስ፥ ዎንገለ ማርክꬍዛነ ታራ ዎላ ማቅደ ግሾ ጾዝ ጋላታነ። 6 ይን ግዳ ሎኦ ኦቻ አይክደ ጾዘ፥ ክርስቶስ የሱሳ ላምእንꬃ ማቂ የእዘ ቃምቶ የሎደስ፥ ፎሎዳኖ ሎይꬂ ኤራነ።
7 ይን ኡባ ዎደ ታ ዎዝንተ የነ። ታኒ ኡባ ዎደ ይን ግሾ ቆፖደስ ቤዛነ። Ꮉተ ታኒ አቻ የዝተራን አጭንቶዳንፓ ቲኖ ዎንገለ ናጎራን ዎንገለ ምንꬂ ኦሄ ጾዚ ታስ እንግደ አꬎ ኬሃትꬅቶ ታራ ግዥንትዳ። 8 ታኒ ይንታና ኡባ ክርስቶስ የሱሳ ሲቅተ አኮ ፋና ይቅስንትዛኮ ጾዚ ታስ ማርካ።
9 ይን ሲቅታ ቱሪ ኤራትꬃራን አካኬራ ዎላ ጉጂ ጉጂ ድጮደ ፋና ጾዝ ዎሳነ። 10 ይነ ይን ሎኦ ባዝ ሻጊ፥ ኤሮደ ፋናን፥ ክርስቶሳ ማቂ የእዘ ቃምተ ጌሹንꬃናን ቦረ ባይዙንꬃና ማቃዳ። 11 ይን ደእታ ጾዝስ ቦንቾን ጋላታ የሱስ ክርስቶሳ ባጋራ በንትዘ ጽሎትꬅ ኣፈ ኩሚ አፎደ ፋና።
ጳዉሎሳ አጭንታ ዎንገለ ዳልጎደ ፋና ማድዳ
12 ታ እሹንꬆ፥ ታና የልደ ዎንገለ ዳልጎደ ፋና ቱሮ ማድዳኖ ይን ኤሮደ ፋና ኮያነ። 13 ታኒ ክርስቶሳ ኦችዘ ግሾ አጭንትዳኖ፥ ካት ኬꬂ ናግዙንꬅን መሉንꬅ ኡባ ኤራነ። 14 ታ አጭንቲ ምክናተር ኑ እሹንꬃፓ ጋሙንꬅ ላꬃ ሎይꬂ አማንንትዳ። ይኒ ግሾ፥ ጾዘ ቃላ ዣሽሞ ባይዝን ካሰንፓ አꬊ ሚንግ ኦሆደ ፋና ምንꬅትሞ ኡን ደንግዳ። ሐዋ. 28:30
15 ማቆ የዝን፥ ፈታይ ፈታይ ቃናተራን ላለራን ክርስቶሳ ባዝ ኦህነ፥ የዝን መሉንꬅ ሉለ ዎዝናፓ ኦህነ። 16 ሉለ ዎዝናፓ ኦህዙንꬅ፥ ጾዚ ታስ ዎንገለ ናጎ ኦቻ እንጎዳኖ ኤርዘ ግሾ ሲቆራ ኦህነ። 17 የዝን Ꮉንኩንꬅ ታ አችትላ አፋ መለ ማꬋ ኮኦደባዝ ኡንትስ አዝን ፋና ካፓ ደንዲ ክርስቶአባዝ ኦህነፕ አትን ቱሪ ዎዝናፓ ኦሆስ።
18 ይና አኮን ይኦስ። ቱሪ ዎዝናፓ ማቅን ዎይ ቱሪ ባይዘ ዎዝናፓ ማቅን ይና ኡባነ ክርስቶሳ ሳባክንታነ። ታና ይና ኡፋይሳነ።
19 ማህ መለ ታና ኡፋይስዘ ባዝ፥ ታኒ ይን ዎስተን የሱስ ክርስቶሳ አያና ማደራ ዋሎ ኬዝዳኖ ኤርዘ ግሾ ታና ኡፋይሳነ። 20 ታኒ ፎሎ ታ ኦችተ ዬልꬋማኖ ኡፋይሳራ ናጋነ። የዝን ኡባ ዎደ ኦችዛን ፋና፥ Ꮉተ ታኒ ፋጻ የዝን ዎይ Ꮉይቂን ዣሽትካይዛራ ታ ኩሙꬅ ጋልተ ክርስቶሳ ቦንችንቶዳ ጋእ ምንꬂ ኦህነ። 21 ታስ ደኦ ጋዛና ክርስቶሳስ የዘ፤ ማህ ታ Ꮉይቂኮን ታስ አꬍደ ትርፈ። 22 የዝን ታ ፋጻ የዝኮ ኣፈ የዘ ኦቻ ኦቾዳ። የዝን ፋጻ የዛንፓን Ꮉይቆፓ አያ ዶሮድ የዛኮ ታስ ኤርንቶስ። 23 ታኒ Ꮉንꬅ ላምኡንꬃፓ አያ ዶሮድ የዛኮ ኡንእንትዳ። Ꮉና ደእትፓ ሻግንት ክርስቶሳራ ዎላ የሳደስ አሙꬋነ፤ ክርስቶሳራ ዎላ የዛና ኡባፓ አꬊ ሎኦ። 24 የዝን ታኒ ፋጻ የዛና ይንትስ ጋማ ኮሽዘ ባዝ።
25 ይኖ ታኒ ጌሽ ኤራነ፤ ታኒ፥ ይን አማኖራ ድጮደ ፋናን ኡፋይቶደ ፋና ይንታራ ፋጻ የሳዳ። 26 ይኒ ግሾ፥ ታኒ ይንታጎ ማቂ የእዘ ዎደ ታ ባጋራ ክርስቶስ የሱሳላ የዘ ጬቅንታ ይንትስ ጋንጎዳ።
27 ኡባፓ አꬂ፥ ይን ክርስቶሳ ዎንገለስ ቤዝዘ ደኦ የዞተ። ታ ይንታና ብእን ዎይ በአንጽን ይን ፈቲ ቆፋራ ሚንግ ኤቂ፥ መሉንꬅ ዎንገለራ አማኖደ ፋና ፈቲ ዎዝናራ ማቂ ፈትላ ቡቱንትዛኖ ታ ስኦዳ። 28 ይን ሞርኩንꬅስ ዣሽትፐተ። ኡን ይንታራ ኤቅንትዛና ይና ኡንትስ ꬋበ ማላ ማቂ፥ ይንትስ ጾዛፓ ማቅደ አቶትꬅ ማላ። 29 ክርስቶሳስ ኦችዘ እሞትꬅ ይንትስ እንግንትዳና፥ ይን ኤዛ አማኖደ ፋና ጻላላስ ባይዝን ይን ኤ ግሾ ማꬋ ኤኮደ ፋና። 30 ይኒ ግሾ፥ Ꮉተ ይን ታራ ዋየ ግሽንትዙንꬃና ማቅዳ፤ ይና ዋይታ Ꮉንፓ ቲኖ ታና የልን ብእዳኖን Ꮉተን ታና የሊተራ የዛኖ ይን ስእተ የነ።