3
ሰርዴሰ ዎሳ ኬꬅትስ ኪትንትደ ኪታ
1 «ሳርዴሰ ዎሳ ኬꬃ ኪታንቾስ Ꮉንጋራ ያጋእ ጻፎ።
ላፑን ጾዘ አያኑንꬃናን ላፑን ጾልንቱንꬃናን አይክዳይ Ꮉንጋራ ያጋነ፦ ታ ነ ኦችቶ ኤራነ፤ ሱንꬅስ ፋጻ፤ የዝን ነ Ꮉይቂዳ። 2 ባርኮ! ኤራꬅ አትደባዝን Ꮉይቆደስ ኡክደባዝ ሚንꬆ። ነ ኦችታ ጾዘ ቲኖ ፎሎ ማቅካይዛኖ ደንግዳ። 3 ይኬ፥ ነ ኤክደ ባዝቶን ስእደባዝቶን ቆፒ፤ ናጎ፤ ነ ናጋርትፓ ማቆ። ነ ባርካንጽኮ ታ ካይዞ ጋር ዮኦዳ፤ ታ አይደ የኦድየዛኮ ነ ኤሮስ። ማቶ. 24:43
4 የዝን ፋ ማእቶ ቅትዝካይዘ ኤራꬅ አሱንꬅ ሳርዴሰ ግዳ የነ። ኡንትስ ኮሽዘ ባዝ ማቅደ ግሾ ቦꬅ ማኦ ማእ ታራ የꬋዳ። 5 ጋምደ ኦደን ኡንትንጋራ ቦꬅ ማኦ ማኦዳ። ታ ኤ ሱንꬅቶ ደኦ ማጻፈፓ ኡጮስ። ታኒ ታ አዳይ ቲኖን ኤ ኪታንቹንꬅ ቲኖን ታ ኤ ባዝ ማርክꬋዳ።ከዘ 32:32 6 ጌሽ አያና ዎሳ ኬꬁንꬂስ ጋዘባዝ ስእዘ Ꮉየ የዘ ኦደን ስኦ።
ፍላደልፍያ ዎሳ ኬꬅትስ ኪትንትደ ኪታ
7 «ፍላደልፍያ ዎሳ ኬꬃ ኪታንቾስ Ꮉንጋራ ጋእ ጻፎ።
ጌሽን ቱሮ ማቅዳይ፥ ዳዉተ ቁልፈ ፋ ኩሽተ አይክዳይ፥ Ꮉንጋራ ጋነ፦ ኤ ጎርድን ኦደን ቡጎደስ ዳንዳኦስ፤ ማህ ኤ ቡግን ኦደን ጎርዶደስ ዳንዳኦስ። ኢሳ. 22:22፤ ኢዮ. 12:14 8 «ታ ነ ኦችቶ ኤርዳ፤ ይኬ ታ ነ ቲኖ ኦደን ጎርዶደስ ዳንዳኦሰ ቡጉንትደ ፉርꬅ ጋድዳ። ነ ዎልቅታ ኤራꬅ ማቅኮን፥ ታ ቃልቶ ናግዳ፤ ታና ካድካያ። 9 አይሁደ ማቅካይዛራ ፋና አይሁደ ጋዘ ዎርዱንꬃናን ጻላሄ ባጉንꬃና ኔጎ ኮኦዳ ነ ቲኖ ጉልባትሳዳ። ማህ ታ ነና ካꬍዛኖ ኡን ኤሮደ ፋና ዪሳዳ። ኢሳ. 49:23፤ 60:14፤ ኢሳ. 43:4 10 ኔኒ፥ ‹ዳንዳአ አስ ማቆ› ጋእ ታ ኪትደ ኪቶ ናግደ ግሾ ኩሙꬅ አላምቶ ፋታኖደስ የእዘ ማꬋ ዎድትፓ ታኒ ነና ናጎዳ።
11 ታ ኤልሲ ዮኦዳ፤ ኦደን ነ ዎርቃ ዛዉድቶ ኤካመ ጋር ኔስ የዛኖ ምንꬂ አይኮ። 12 ጋምዳያ ታ ጾዘ ኬꬅተ ቱስ ማሆዳ፤ ኤ እዘ መꬍናስ የሳዳ። ታኒ ታ ጾዘ ሱንꬅቶን ታ ጾዘ ካታምቲ ሱንꬅቶ ኤላ አፋ ጻፎዳ፤ እዛን ታ ጾዘ ካለፓ ዎꬍዘ ክለ የሩሳላመ። ማህ ታ ታ ክለ ሱንꬅቶን ኤላ አፋ ጻፎዳ። ቆን. 21:2፤ ኢሳ. 62:2፤ 65:15 13 ጌሽ አያና ዎሳ ኬꬁንꬂስ ጋዘባዝ ስእዘ Ꮉየ የዘ ኦደን ስኦ»።
ሎዶቅያ ዎሳ ኬꬅትስ ኪትንትደ ኪታ
14 «ሎዶቅያ ዎሳ ኬꬃ ኪታንቾስ Ꮉንጋራ ጋእ ጻፎ።
‹አምንኤ› ማቅደ አማንንትደ ቱሮ ማርካ ማቅዳይ፥ ጾዚ መትꬅ ኡባስ በንተ ማቅዳይ Ꮉንጋራ ጋነ:አዝዜ 8:22 15 ታኒ ነ ኦችቶ ኡባ ኤራነ፤ ኔኒ ቶያ ዎይ ምሻ ባያ፤ ኔኒ ላምኡንꬃፓ ፈታ ማቅዛኮ ሎኦ! 16 ኔኒ ቶያ ዎይ ምሻ ማቅካይዝን ቦልአ ማቅደ ግሾ ታ ነና ታ ዶንትፓ ጩቶደስ ይእነ። 17 ይኬ፥ ኔኒ፥ ‹ታኒ ዱረ፥ ቆሎራ የነ፥ ታስ አኮን ፋጭካያ› ጋነ። የዝን ኔኒ ዋይንታነ፥ ዳሃ፥ ቆቀን ካልꬍደ አስ ማቅዛኖ ነና ኤሮስ። 18 ይኒ ግሾ፥ ነ ዱርꬎደስ ታማራ ጌዥደ ዎርቃ፥ ነና ዬልዘ ካልቶ አቾደስ ቦꬅ ማኦን ሎይꬂ በአደስ ማድዘ ኣፈ ጋላ ታፓ ዎንግ ትሻደ ፋና ነና ዞራነ።
19 ታ ካꬍዙንꬃና ሴራነን ፍርጫነ፤ ይኬ ምንጎ፤ ነ ናጋርትፓ ማቆ። አዝዜ 3:12፤ እብ. 12:6 20 ይኬ፥ ታ ባለ ኤቂ ነና ጼጎዳ። ኦደን ታ ጼግዛኖ ስእ፥ ፉርꬅቶ ቡግኮ፥ ኤጎ ገሎዳ፤ ኤራ ዎላ ካዎ ሞኦዳ፤ ኤዝን ታራ ዎላ ሞኦዳ።
21 ታ ጋሚ ደንዲ ታ አደራ ኤ አራታላ በትዳንፋና ጋምደ ታራ ታ አራታላ በቶደ ጋር አደትꬅ ዎልቃ እንጎዳ። 22 ጌሽ አያና ዎሳ ኬꬁንꬂስ ጋዘባዝ ስእዘ Ꮉየ የዘ ኦደን ስኦ» ጋይዳ።