1 ዱርዘ ጽዮነ ደርዘላ አፋ ኤቀዝን ብእዳ። ኤራ ኤ ሱንꬅታን ኤ አዳይ ሱንꬅታ ኡን ስንተ ጻፍንትደ፥ 144,000 አሱንꬅ የነ። ሕዝ. 9:4፤ ቆን. 7:3 2 ሳሎፓ ዳማ Ꮉꬅ ጉመን ዳዳ ꬎገ ኦꬅ አዝዛ ስእዳ። ማህ ታ ስእደ ይና ኦꬅታን ዲꬅ ዲጾደራ ስንትዘ ግርስ ፋና። 3 አትደ 144,000 አሱንꬅ አራትዘ ቲኖ፥ ኦይዲ መቱንꬅ ቲኖን ጭሙንꬅ ቲኖ ኤቅደ ኡንታፓ መለ ኦደን ታማሮደስ ዳንዳኦሰ ክለ ማዝሙረ የጽዳ። 4 የንስ ማችራ ፋና ቱንዝካይዛራ ናግደ ጌሹንꬃና። ኡን ዱርዘ Ꮉንግዘ በሳ ኡባ ካላነ። ኡን ጾዘስን ዱርዘስ አንግስ ማቂ፥ ሺቆደስ ሳአ አስ ግዳፓ ዎዝንትዳ። 5 ኡንታላ ዎርዶን ቦረ ባያ። ሶፎ. 3:13

6 ይንፓ ሱባ፥ መዽና ዎንገለ ሳአላ አፋ የዘ ካእቱሞ ኡባስ፥ ኮች ኡባስ፥ ዱማ ዱማ ዶና ኡባስን ዱማ ዱማ ባጋ ኡባስ ማርክꬋደስ ሳሎራ ፍርዘ መለ ኪታንቾ ብእዳ። 7 የ ኪታንችዘ ፋ ቃልቶ ꬎቅ ዪዚ፥ «ጾዚ አላመ ፍርድዘ ሳታ የልደ ግሾ ጾዝስ ዣሽቶተ፤ ኤዛ ቦንቾተ። ሳሎ፥ ሳአ፥ አባን Ꮉꬅ ኣፈ መꬍደ ጾዛ ጎይኖተ» ጋይዳ።

8 ቲኖያ ካሊ መለ ላምእንꬃ ኪታንችዘ፥ «ዎርዣ ኡባ ቱናራ ማꬅዘ ዎይነ ኡሽደ፥ ዳማ ባብሎነ ጎልእዳ! ጎልእዳ!» ያጋእ ኡክዳ። ኢሳ. 21:9፤ ኤር. 51:8፤ ቆን. 18:2

9 Ꮉይꬕንꬃ ኪታንችዘ ኡንታና ካሊ፥ ፋ ቃልቶ ꬎቅ ዪዚ፥ «ጾꬅዛን ኤ ምስልቶ ጎይንዘ ማህ ኤ ማልቶ ፋ ስንተ ዎይ ፋ ኩሽተ ጋድደ ኦደን የዝኮ፥ 10 ኤ Ꮉንቆ ጹአ ኩምደ ጾዘ Ꮉንቆ ዎይነ ኡሻዳ። ኡን ጌሽ ኪታንቹንꬅ ቲኖን ዱርዘ ቲኖ ኤጽዘ ዲነ ታማ ዋይንቶዳ። ኢሳ. 51:17፤ መꬎ 19:24፤ ሕዝ. 38:22 11 ኡን ዋይንትዘ ታምት ጩግታ መꬊ መꬍናስ ጩግተራ የሳዳ። ጾꬅዛን ኤ ምስልቶ ጎይንዘን ማህ የ ጾꬅዘ ሱንꬅት ማላ የዘ ኦደን ቃማን አዋራ ሸምፖ ባይꬅ ካእንቶዳ» ያጋይዳ። ኢሳ. 34:10

12 ጾዘ ኪታ ናግዙንꬅን የሱሳ አማኒ ገንጭዙንꬅ ጌሹንꬅ ዳንዳእታ ይነ።

13 ይንፓ ሱባ፥ «ይኬፓ ላꬃራ Ꮉይቅዙንꬅ አንጅንትዱንꬃና» ያጋዘ ቃላ ሳሎፓ ስእዳ፤ Ꮉኖ ጻፎ።

አያና፥ «ዬ ቱሮ፥ ኡን ኦችታ ኡንታና ካልደ ግሾ ኡን ፋ ዋይትፓ ሸምፖዳ» ያጋነ።

14 ይንፓ ሱባ፥ ቦꬅ ꬎነላ አፋ በትደ አስ ናአ አዝዛያ ብእዳ። ኤ ፋ ኦምተ ዎርቃ ዛዉደ ጋድዳ፤ ማህ ፋ ኩሽተ ኦጮ ባጫ አይክዳ። ዳነ. 7:13-14 15 መለ ኪታንቾ ጾዘ ኬꬃፓ ከዚ፥ ꬎነላ አፋ በተዘጎ ፋ ቃልቶ ꬎቅ ዪዚ፥ «ባሀ ሺሽዘ ዎደ የልደ ግሾ ነ ባጫ ኤኪ ባህቶ ማንኦ፤ ጋድተ የዘ ባህታ ቦትዳ» ጋይዳ። ኢዩ. 3:13 16 ꬎነላ አፋ በትደ ፋ ባጫ ጋደ ዳኪ፥ ጋደ የዘ ባህቶ ማንእዳ።

17 ማህን ሳሎ የዘ ጾዘ ኬꬃፓ መለ ኪታንቾ ከዝዳ፤ ኤስን ኦጮ ባጫ የነ።

18 ታማላ አፋ አደትꬅ ዎልቃ የዘ መለ ኪታንቾ ዣርሾ በሳፓ ከዝዳ። ኤ ፋ ቃልቶ ꬎቅ ዪዚ ኦጮ ባጫ አይክደ ኪታንችዘጎ፥ «ዎይነ ኣፍታ ዲልደ ግሾ ነ ኦጮ ባጭዛ ኤኪ፥ ጋደ የዘ ዎይንትፓ ዣንግቶ ጋቾ» ያጋይዳ። 19 የ ኪታንችዘ ፋ ባጭዛ ኤኪ፥ ጋደ የዘ ዎይንትፓ ጋቺ፥ ጾዘ ዳማ Ꮉንቆ ጭጭዘ በስተ ኦልዳ። 20 ይና ዎይነ ኣፈ ጭጭዘ በስታ ካታማፓ ጋጻ የꬍንትዳ። ሱꬅ ዎይነ ጭጭዘ በሳፓ ከዚ Ꮉይꬕ ጼት ክሎ ምትረ ፋና Ꮉኪ፥ ፋራ ብጻለ የሎደ ፋና ኤሊ ꬎቅ ጋይዳ። ኢሳ. 63:3፤ ካዮ 1:15፤ ቆን. 19:15