1 ይኬ፥ ኑ አማኖራ ጽልደ ግሾ ኑ ላꬄ የሱስ ክርስቶሳ ባጋራ ጾዛራ ኑስ ሳሮትꬅ የነ። 2 ኑ ኤ ባጋራ Ꮉተ ኑ ኤቅደ አꬎ ኬሃትꬅተ አማኖራ ገልዳ። ይኒ ግሾ፥ ኑ ጾዘ ቦንቾ ኡፋይስተ ጬቅንታነ።

3 ይኖ ጻላላ ባይዝን ማꬋ ዳንዳአ ክእዛኖ ኑ ኤርዘ ግሾ ኑ ማꬍተን ጬቅንታነ። 4 ማህ ዳንዳአ ፋታና፥ ፋታናን ኡፋይስ እንግዛኖ ኑ ኤራነ። 5 ኑስ እንግደ ጌሽ አያና ባጋራ ጾዚ ፋ ሲቅቶ ኑ ዎዝንተ ጉስደ ግሾ ይና ኡፋይስታ ኑና ዬልዞስ።

6 ኑ Ꮉጋ ላቢዱንꬃና ማቂ የዝን፥ ጾዘ ዎደ የልን፥ ክርስቶሳ ናጋራንቹንꬅ ግሾ Ꮉይቂዳ። 7 ጽሎ አስ ግሾ Ꮉይቆደ አስ ደንጎዳና ዳማ ማꬋ፥ የዝን ሎኦ አስ ግሾ Ꮉይቆደ አስ ኦደ ኤርዘ በንትካይዛራ አቶስ። 8 የዝን ኑኒ Ꮉጋ ናጋራንቾ ማቂ የዝን፥ ክርስቶሳ ኑ ግሾ Ꮉይቂዳ። ይና ጾዚ ኑና አኮ ጋር ሲቅዛኮ ኤ ሲቅቶ ቤዛነ። 9 ይኬ፥ ኑኒ ክርስቶሳ ሱꬅተ ጽልደባዝ ማቅኮ፥ ኡባፓ አꬂ ኤ ባጋራ ጾዘ Ꮉንቆፓ አቶዳ። 10 ኑኒ ጾዛራ ሞርከ፥ የዝን ኤ ናአይ Ꮉይቅተ ኤራ ጊግዳ። ይንፓ አꬂ፥ Ꮉተ ኑኒ ጾዛራ ጊግደፓ ሱባ ኤ ናአይ ደኦ ምክናተራ ኑኒ አቶዳ። 11 ይኖ ጻላላ ባይዝን Ꮉተ ኑና ጾዛራ ጊግዝደ ኑ ላꬄ የሱስ ክርስቶሳ ባጋራ ኑ ጾዛላ ጬቅንታነ።

12 አዳማ ባጋራ ናጋራ Ꮉና አላምተ ገልዳ። ይና ናጋርት ባጋራ Ꮉይቆ ይእዳ። አስ ኡባ ናጋራ ኦችደ ግሾ Ꮉይቆ አስ ኮች ኡባ የልዳ። 13 ህገ እንግንቶዳንፓ ቲኖ አላመ ናጋራ የነ፥ የዝን ህገ ባይዘ ዎደ ናጋራ ናጋራ ማቂ ፋይድንቶስ። መꬎ 3:6 14 የዝን አዳማፓ ሙሴ የሎደስ Ꮉይቆ አስ ኡባ አህዳ። መለ አቶ የዝን፥ አዳማ ህገስ ኪትንታንጽደ ግሾ፥ አዳማ ፋና ናጋራ ኦችካይዙንꬃላ አፋ Ꮉይቆ ካእትዳ።

አዳማ ዮኦደስ የዘ የሱሳስ አዝዘ። 15 የዝን ጾዘ አꬎ ኬሃትꬅ አስ ናጋርት ፋና ባያ። ፈቲ አስ ናጋራ ባጋራ ጋማ አሱንꬅ Ꮉይቂዳ። የዝን የሱስ ክርስቶሳ ባጋራ ጾዘ አꬎ ኬሃትꬅ አስ ኡባስ ጋንꬅ እንግንትዳ። 16 አዳማ ናጋራ ግዳን ጾዘ እሞ ግዳ ጋማ ዱማትꬅ የነ። ፈቲ አስ ናጋራ ባጋራ ጾዚ ኤላ አፋ ፍርድዳ። የዝን አስ ጋማ ናጋራ ኦችንን ጾዘ አꬎ ከሃትꬅታ ጽሎትꬅ ክእዳ። 17 ፈቲ አስ ናጋራ ባጋራ Ꮉይቆ ካእትዳ። የዝን የሱስ ክርስቶሳ ባጋራ ጾዘ አꬎ ኬሃትꬅን ጽሎትꬅ እሞ ኤክዘ ኡቡንꬅ፥ ጋምዘ ደኦር የሳዳ።

18 ይኬ፥ ፈቲ አስ ናጋራ ኦችደ ባጋራ አስ ኡባላ ፍርዳ ይእዳን ፋና ፈቲ አስ ጽሎ ኦችደ ባጋራ፥ ጾዚ አስ ኡባ ጽልዚ ኡንትስ ደኦ እንጋነ። 19 ፈቲ አስ ኪትንታንጽ እጽደ ባጋራ፥ ጋማ አሱንꬅ ናጋራንቾ ማቅዳን ፋና ፈቲ አስ ኪትንተር ጋማ አስ ጽሎዳ።

20 አሱንꬅ ናጋራ ዎልቃ ኤሮደ ፋና ህገ ይእዳ፥ የዝን ናጋራ ዎልቃ ጋንግደ ዎደ ጾዘ አꬎ ኬሃትꬅ አꬊ ጋንግዳ። 21 ናጋራ Ꮉይቆ ዎልቃራ ካእትዳን ፋና ጾዘ አꬎ ኬሃትꬅ ጽሎትꬅ ዎልቃራ ካእት፥ ኑ ላꬄ የሱስ ክርስቶሳ ባጋራ ኑና መዽና ደኦጎ ካልꬃነ።