Phexiroosa Xaafide
Lam7intsa Kiita
Gele
Hawaare Phexiroosa xaafide lam7intsa kiita xaafinttide, dumma dumma bessa yeze zaga ammanze asuntsis. Hyay kiitize aafe qoftta, worddo asttamaarunts iita oochiton un timirttiti baggara medhinttide yeellize oochito ixxode fana. Yinna medhinttide madhito kayodes oge maaqqode, Yesuusa fa aafte bi7ide asuntsin E tamaarssize wode fa hyayte si7ide asuntsi tamaarsside timirttiti baggara Xoozze bazin Laatstse Yesuus Kiristtooabaz ammanitsize era ekkode fana. Xaafize mintsii ohide, «Kiristtoosa lam7intsa yo7oda» yagaaze worddo timirttebaz. Yinna qoftto mintsii ohitera, «Kiristtoosa maaqqii yi7ikaayzara gam77idanna, asuntsi ubba fa nagarappa maaqqode fana fattin ooden dhabode fana koyoose gishos» yagayda.
Aafe Qofuntsi
Saritse 1:1-2
Ammanze asunts xeegintte 1:3-21
Worddo asttamaaruntsana 2:1-22
Kiristtoosa lam7intsa ye7e 3:1-18
1
1 Yesuus Kiristtoosa hawaaren E aro, taanii, Simoon Phexiroosa, nu Xoozzen nuna ashshize Yesuus Kiristtoosa xillotitsiti baggara nu gaar al77o ammano ekkiduntsis hyay kiitiza xaafida.
2 Xoozzan nu Laatstsa Yesuusa erera aadho keehatitsin saro yinttis kumo.
Xoozze xeegen dooren
3 Fa bonchchiten lo77otitsite nuunii shaakkinttode fana xeegide eza eridanne xoozzetits wolqqa nuunii Xoozza aazii yessades koshshize baz ubba nuus inggida. 4 Yin iita amo baggara medhinttize hyanna alamite yeze dhabsseppa kessii ekkode fanan Xoozze xoozzetitsito shaakkinttode fana, hyanna imotitsiti baggara gaama al77on damma ufayssi nuus inggida. 5 Yinnii gisho, miinggi, yin ammanttilla afa lo77otitsi, lo77otitsalla afa eratitsi, 6 eratitsalla afa fana naage, fana naagella afa gencce, genccella afa Xoozza ufayssi yessi yeze, 7 Xoozza ufayssi yessalla afa ishitimo kadhe, ishitimo kadhella afa as ubba siiqe gujjote. 8 Hyantses yinttis gaanggi yeziko, Laatstsi Yesuus Kiristtoosa erera maaddize asin aafera yeze asi maaqqoda. 9 Yezin hyantses baayze oonin ukke yeze baz xalaala be7ize qooqe. E fa tiino nagarttippa geezhidanno botida.
10 Yinnii gisho, ta ishuntso, yin xeegintton yin doorintto mintsodes kasennippa aatsii minggote. Yin hyantsesana oochchizebaz maaqqiko, dhubunttaama. 11 Yinne nu Laatstsan nuna ashshide Yesuus Kiristtoosa medhina ka7itumo gelize kumutsi wolqqa yinttis ingginttoda.
12 Yinnii gisho, yin hyantsesana erize bazin yinna aykkide turite miinggi yeze baz maaqqiko, taanii hyantsesana ubba wode yinttana qofize ashshoos. 13 Taanii shemppora yeze wode ubba yinttana qofizanna koshshize baz ga7i qoppane. 14 Nu Laatstse Yesuus Kiristtoosa taas qonccizidanni fana taanii hyanna hyayqqize galtto gaarii olii qitodanno erane. 15 Taanii yinttappa shaakkinttikon yin hyantsesana ubba wode qoppode fana taas dandda7inttize baz ubba oochchoda.
16 Nuunii Laatstse Kiristtoosa wolqqan E ye7ito yinttis ohize, E damma bonchchito nu aafte bi7ida fattin medhdhii kesside tosse baaya. 17 Damma wolqqaama bonchchoppa, «Tana ufayssize, ta kadhize na7ay hyaya» gaaze qaala ootsi yi7ide wode Xoozze adeppa bonchchon galata ekkida. 18 Nuunii geeshi derella afa eera yeze wode yinna qaala ootsi saloppa ye7izin si7ida.Maato. 17:1-5; Mar. 9:2-7; Luqa. 9:28-35
19 Nuus hyannippa aadhize ammaninttide tinbbite qaala yene. Sa7a wonttode wontsisin goolixe yin wozintte dolode wontsis, dhuma bessa yeze foo7oos asi naaginttize fana, yin hyanna qaaltto naagiko lo77o oochchane. 20 Ubbappa tiino hyanno erote. Geeshi Maxaafite xaafinttide tinbbite qaala ooden fa koyde fana billodes dandda7oos. 21 Tinbbite ubba, Xoozze kiittide asuntsi Geeshi Ayyaana kaalitsin, ohida fattin as qofara ohikaaya.