26
Job Ansa Bildad
1 Job ansa:
2 “Si how yu don help pipol wey nor get pawa.
Yu don save pipol wey nor get strent at-all!
3 Yu dey give dem good advise kon share wetin yu know with fools,
like mi!
4 Who yu feel sey go hear all wetin yu dey tok?
Na wish spirit make yu dey tok like dis?
God Great
5 “Dead body dey shake with fear for dia grave.
Evritin wey dey inside wota dey shake too.
6 Where dead body dey stay just dey open before God;
nor-tin fit kover am from en eye.
7 God spread di sky for nort
kon hang di eart for empty space.
8 Na God put wota for di kloud
and E nor dey let rain fall from di kloud with force.
9 Na-im use di kloud
take kover di moon.
10 E kreate di sky wen E separate di wota
and divide lite from darkness.
11 As God tok, di pila wey hold di sky
kon dey shake with fear.
12 Na en pawa E use take silent di sea.
Na en wisdom E take distroy Rahab wey bi di wota juju.
13 Wen E breath, di sky dey klear.
Na en hand E take distroy di big snake.
14 But all dis na small tin kompare to di pawa wey E get.
Na small wi don hear.
Who go fit really undastand how God strong and great rish?”