1 Jesus komot for dat place go Judea and Jordan River aria. Plenty pipol still gada kom meet am. E kon bigin tish dem as e dey do evritime.

2 Den, some Farisee pipol wey won test am kon ask am, “E bad make man drive en wife at-all?”

3 Jesus ask dem, “Wetin Moses kommand una?”

4 Dem ansa, “Moses sey make man rite leta to divorce en wife.”

5 But Jesus tell dem, “E tell una to do so, bikos una heart strong well-well. 6 But from di time God kreate di world, na man and woman naim E make. 7 Na dis make man dey leave en papa and mama go join en wife 8 and di two of dem go bi one. So dem nor go bi two again, but dem go bi one body. 9 So, wetin God don join togeda, make nobody separate am.”

10 Wen dem enter di house again, en disciples kon ask am about di matter. 11 Jesus ansa dem, “Anybody wey drive en wife, den e go marry anoda woman, don kommit adultery. 12 And any woman wey leave en husband, den e go marry anoda man, don kommit adultery too.”

13 Pipol kon dey bring shidren kom meet Jesus make e tosh dem, but en disciples dey shaut for di pipol wey bring dem kom. 14 But wen Jesus si wetin dey happen, e vex kon tell en disciples, “Make una allow small-small shidren kom meet mi, nor stop dem, bikos na pipol like dem, go enter God Kingdom. 15 I tell una true word, anybody wey nor receive God Kingdom like small shidren, nor go ever enter inside.” 16 Afta, Jesus draw di shidren near body kon bless dem.

17 As Jesus dey waka for road, one man run kom meet am sey, “Good Tisha, wetin I go do make I for get life wey nor dey end?”

18 Jesus ansa am, “Why yu dey koll mi good? Nobody good espect God. 19 Yu know di kommandment; nor kill pesin, nor sleep with pesin wey yu nor marry, nor tif, nor lie for pesin head, nor shit pesin, respet yor papa and mama.”

20 Di man kon tell Jesus, “Tisha, I dey obey all dis law with all my heart since I bi small pikin.”

21 As Jesus look am, e kon feel for am, den e tell am, “E get one tin wey yu neva do. Go sell all wetin yu get, give poor pipol di money and yu go get plenty propaty for heaven. Den make yu kom follow mi.”

22 Wen di man hear dis word, e vex komot der, bikos e get plenty money.

23 Den Jesus look round kon tell en disciples, “E go hard well-well for pipol wey get money well-well to enter God Kingdom!”

24 Di disciple sopraiz for wetin Jesus tok. But Jesus tell dem again, “My shidren, e go hard well-well to enter God Kingdom o-o! 25 E go dey eazy for kamel to pass nidol whole, dan for pipol wey get money well-well to enter God Kingdom.”

26 Dem sopraiz more-more kon dey ask each oda, “Den, who God go save?”

27 Jesus look dem kon ansa, “Dis tins hard well-well for human being, but nor bi for God, bikos evritin dey possibol for God.”

28 Pita kon tell am, “Si! Wot of wi wey don leave evritin wey wi get kon follow yu?”

29 Jesus ansa, “I tell una true word, e nor get anybody wey leave en house, brodas, sistas, papa, mama, shidren or land bikos of di gospel, 30 wey nor go receive hundred times more dan di house, brodas, sistas, papa, mama, shidren and land wey e leave for dis world. Aldo e nor go eazy for dem, but di life wey nor go end for di world wey dey kom, go bi dia own. 31 But many pipol wey bi first naw, go bi last and pipol wey bi last naw, go bi first.”

32 Jesus and en disciples kon dey go Jerusalem. As Jesus dey waka for dia front, di disciples konfuse and doz wey dey follow dem kon dey fear, bikos dem nor know wetin go happen for der. Jesus koll en twelf disciples go korna again kon bigin tell dem wetin go happen to am. 33 “Si, wi dey go Jerusalem and dem go sell Man Pikin give di priest oga dem and di law tishas. Dem go kondemn am and dem go gi-am to di Gentile pipol. 34 Dem go laf am, spit for en body, flog am well-well kon kill-am, but afta three days, e go wake-up.”

35 Zebedee shidren, James and John, kom meet Jesus sey, “Tisha, wi wont make yu do wetin wi won beg yu.”

36 Jesus kon ask dem, “Wetin una wont make I do for una?”

37 Dem ansa, “Make yu allow us sidan with yu for yor kingdom, one for yor rite and di oda for yor left hand.”

38 Jesus ask dem, “Una know wetin una dey ask for so? Una go fit drink from di cup wey I go drink from? Abi una go fit bear di baptizim wey dem go baptize mi?”

39 Dem ansa, “Wi go fit.” Den Jesus tell dem, “Una go really drink from di cup wey I go drink from and una go fit bear di baptizim wey dem go baptize mi, 40 but nor bi mi go tok who go sidan for my left or rite side, bikos e get di pipol wey God prepare am for.”

41 Wen di oda ten disciples hear wetin Zebedee shidren tell Jesus, dem kon dey vex for dem. 42 Jesus koll and tell dem, “Una know sey pipol wey dey rule di Gentile pipol dey do oga for dem and pipol wey dey high place dey use dia pozishon dey opress pipol. 43 But nor bi so e suppose bi among una. Anybody wey won bi oga among una, must bi una savant 44 and anybody wey won bi first among una, must bi evribody savant. 45 Bikos even Man Pikin nor kom make dem serve am, but e kom to serve pipol and to give en life make many pipol for dey save.”

46 Dem kon go Jeriko. As Jesus and en disciples with plenty pipol dey komot for der, Bartimaeus wey bi Timaeus pikin, one beggar wey blind, sidan for road dey beg. 47 Wen e hear sey na Jesus wey kom from Nazaret dey pass, e kon bigin shaut, “Jesus Christ, David pikin, make yu sorry for mi o-o!”

48 Many pipol kon dey shaut for am make e kwayet, but e kon dey shaut more-more sey, “David pikin, sorry for mi o-o!”

49 Jesus stop kon sey, “Make una koll am kom.” So, dem tell di blind man, “Make yu happy! Get up bikos Jesus dey koll yu.” 50 Bartimaeus trowey di klot wey e take kover body kon jump up go meet Jesus.

51 Den Jesus ask am, “Wetin yu wont make I do for yu?”

Di blind man ansa, “Tisha, make my eye open, make I for fit si again.”

52 So, Jesus tell am, “Go, yor faith don heal yu.” At wons, di man kon dey si and e kon follow Jesus.