Es 2. Gabiddel.
Da Berg Fumm Hah
1 Dess is es vatt es da Jesoiya em Amoz sei boo ksenna hott veyyich Juda un Jerusalem:
2 Es zayld zu kumma in di letshta dawwa,
es da berg vo da tempel fumm Hah druff shtayt,
da feddahsht sei zayld unnich awl di berga;
eah zayld uf kohva sei ovvich awl di hivla,
un awl di heida zayla datt anna lawfa.
3 Feel leit zayla kumma un sawwa,
“Kummet, vella nuff uf da berg fumm Hah gay,
an's haus fumm Gott fumm Jakob.
Eah zayld uns sei vayya lanna,
so es miah in sei pawda lawfa kenna.”
Es ksetz zayld naus gay funn Zion,
un em Hah sei vatt funn Jerusalem.
4 Eah zayld richta unnich di heida,
un zayld feel leit iahra shtreit unnich nannah recht setza fa si.
Si zayla iahra shvadda in blooks-peinda macha
un iahra shpiahra in sichla.
Kenn folk zayld's shvatt uf nemma geyyich en annah folk,
un si zayla nee nimmi lanna fa greek macha.
5 Kummet nau, diah haus fumm Jakob,
vella lawfa im licht fumm Hah.
Da Dawk Fumm Hah
6 Du hosht dei leit,
nohch-kummashaft fumm Jakob falossa.
Si sinn foll mitt hexahrei funn di east,
si dreiva zaubahrei vi di Philishtah,
un si macha sich gans aynich mitt fremdi iahra vayya.
7 Iahra land is kfild mitt silvah un gold,
un's is kenn end zu iahra keshtlich sach.
Iahra land is foll mitt geil,
un's is kenn end zu iahra greeks-veyya.
8 Iahra land is kfild mitt abgott-gleichnisa;
si gneeya nunnah zu sach es iahra hend gmacht henn,
sell es iahra fingah kshaft henn.
9 So da mensh zayld niddah gebohwa sei,
un da hohch-gacht mann gedaymeedicht,
avvah du si nett fagevva.
10 Gaynd in di felsa-lechah,
fashteklet eich im grund
aus angsht fumm Hah,
un funn sei macht un hallichkeit.
11 Di hohcha awwa fumm mann vadda gedaymeedicht,
un di shtolsa mennah vadda niddah gebrocht;
Da Hah laynich zayld hohch ufkohva sei in sellah dawk.
12 Da Awlmechtich Hah zayld en dawk havva,
vo eah geyyich awl di hohcha un shtolsa is,
geyyich alli-ebbah es sich ufblohst.
Si zayla niddah gebrocht vadda.
13 Eah zayld geyyich di hohcha cedar-baym in Lebanon sei,
geyyich awl di aycha-baym in Basan,
14 geyyich awl di hohcha berga,
un awl di hivla es sich uf hayva,
15 geyyich alli hohchah tavvah,
un geyyich alli fashteikti mavvah,
16 geyyich awl di shiffah im say
un awl di shayna boats.
17 Da hohchmoot fumm mensh vatt niddah gebrocht,
un di shtolsheit funn mennah vatt gedaymeedicht.
Da Hah laynich zayld hohch ufkohva sei in sellah dawk,
18 un di abgettah vadda nimmi ksenna.
19 Mensha zayla in di felsa-lechah gay,
un zayla sich fashtekla in lechah im grund
aus angsht fumm Hah,
un di furcht funn sei macht un hallichkeit,
vann eah moll uf shtayt un di eaht shiddeld.
20 Im sellem dawk zayla mennah iahra
silvahrichi un goldichi abgettah vekk shmeisa
zu di mohls un fleddah-meis,
dee sacha es si gmacht henn fa ohbayda.
21 Si zayla in di felsa-lechah shpringa,
un in di rissa an di shtay vanda nohch
aus angsht fumm Hah,
un di furcht funn sei macht un hallichkeit,
vann eah moll uf shtayt un di eaht shiddeld.
22 So heahret uf eiyah fadrauwa in da mensh du,
deah es yusht en ohften in di naws is.
Vass is eah veaht?