1 Gubal kulu haja, ana deiru ashan nas bi amulu salawat, wodi talab, kore ma geliba kulu, wa wodi shukur benyaba ta nas kulu. 2 Seli le muluk, wa le kulu nas al fi sulta. Seli ashan nina bi ish ma salam wa haya al birah, fi sika ta Rabuna wa be ihtiram nefsa. 3 Kalam de kweis, wa gi kutu Rabuna mukalis ta nina moksut. 4 Uwo deiru kulu nas ashan bi ligo kulasa wa ashan bi fahim haja al hagiga. 5 Leanu Rabuna fii wahid wa wahid zol al jibu salam bein Rabuna wa binadam, wa zol de uwo Yesuwa al Mesiya. 6 Uwo wodi nefsa tou ashan dafa taman ta huriya ta nas kulu. De suhuda al Rabuna wodi kalas fi zaman al uwo azilu. 7 Le sabab de, Rabuna azilu ana ashan bi kun mubashir wa rasul le nas al maa Yahudin. Ana muderis taumon wa ana gi derisu umon an iman wa hagiga ta injil. Ana gi wori kalam nesiya, ana maa gi kabasu.

8 Ashan kida, ana deiru rujal fi mahal kulu kede seli ma geliba nedif, bidun masakil au munakasat. 9 Be nefsa teriga, ana deiru nuswan kede libisu ma manzar al kweis, ma ihtiram, tamam wa aklag al kweis. Keli umon maa mesitu shaar ta dala, libisu alamat min dahab, au gumashat al gaali, wa hajat tanin ta dala. 10 Lakin keli nuswan al gi kelimu gali umon gi tabi sika ta Rabuna libisu nefsa taumon ma amail al kweis.

11 Keli mara alimu kalam birah wa asuma kalam. 12 Ana maa deiru mara ashan bi derisu au shilu sulta min rajil be guwa. Lakin keli hiya geni birah. 13 Ashan kalaguu Adam awal biga mara tou Hawa*2:13 Ainu Bidaya 2:7, 2:21-23 . 14 Wa maa kabasuu Adam lakin kabasuu mara tou wa hiya ja kun zol ta katiya†2:14 Ainu Bidaya 3:1-6. 15 Lakin mara bi ligo kulasa be wasat wilada ze Hawa‡2:15 Ainu Bidaya 3:15, kan umon istemir fi iman, muhaba, wa haya ta kadasa, be hafizu nefsa.