Tjukurpa Nampa 1 Samueltu Walkatjunkunytja
1 Samuel
Nyangatja Ngaṉmanytju Nyakula Wangkanytja
Nyangatja Godaku tjukurtu tjakultjunanyi wangkatjara ini Samuelnga, munu wati panya Saulanya aṉangu panya Israelkunu tjuṯaku mayatja ngaṉmanyitja, munu mayatja panya Davidanya kuḻu. Tjukurpa nyangangku nganaṉanya nintini panya nganaṉa Godala kulintja wiyangku wantirampa kuraringkupai. Palu nganaṉa palula wangaṉarangku kuliṟa palya alatjiṯu pukuḻpa nyinapai. Panya Godanya kutju aṉangu uwankaraku mayatja nyinanyi. Ka panya wangkatjara tjuṯangku munu mayatja tjuṯangku kuḻu palula kuliṟa aṉangu tjuṯa wiṟuṟa tjukaṟurungku aṯunymanangi. Palu tjana mayatja Saulalu puṟunytju walytjangku kuliṟa palyaṟa puṯu aṉangu tjuṯa wiṟuṟa aṯunymanangi, ka kura tjuṯa tjanala utiringangi.
[Nyiri nyangangka chapter 1-nguṟu munu 15-kutu mutumutuntja ngaṟanyi, uwankara wiya. Palu chapter 16-nguṟu munu 31-kutu kuḻu uwankara ngaṟanyi. Kaya kuwari (2019-ta) chapter 1-nguṟu munu 15-kutu kuḻu tjukurpa winki palyaṉi.]
Tjukurpa nyanganpa ngarinyi
1:1—7:17 SAMUELNGA -Godaku wangkatjara
8:1—12:25 SAULANYA -Israelkunu tjuṯaya kingaku mukuringu tjanampa mayatja puḻka nyinanytjaku, ka Godalu wati Saulanya tjanampa kinga tjunu
13:1—15:35 Mayatja Saulanya Godala tungunpungu
16:1— 31:13 DAVIDANYA -Saulanya tungunpungkunyangka Godalu wati kutjupa ngurkantanu, Davidanya, Israelkunu tjuṯaku kinga nyinanytjaku
1
Godalu Minyma Aananya Tjitji Ungkunytja Ini Samuelnga
1-17 Kaya Israelkunu tjuṯa yiya tjuṯa mulapa nyinangi ngura panya kalkuntjitjangka ini Kainanta. Ka wati kutjupa nyinangi kuri kutjaratjara. Kuri ngaṉmanyitja ini Aananya munu paluṟu tjitji wiya nyinangi. Ka kuri maḻatja tjitji tjuṯatjara munu kutjupa-aṟa paluṟu Aananya kuralpai munu tjituṟu-tjituṟu puḻka palyalpai paluṟu kutju tjitji tjuṯatjara nyinara.
Ka yiya kutjupa yiya kutjupa Aananya tjana ankupai ngura ini Tjayululakutu tiinta panya miḻmiḻṯa tjunguringkula Godanya waḻkuntjikitja. Munuya nyara palula aṟa paluṟu tjana mai ngalkuningi uṟilta. Ka Aananya pakaṟa anu tiinta panya miḻmiḻpakutu Godala tjapintjikitja. Palu paluṟu wati panya tjukurtjara nyakunytja wiya tuwangka itingka nyinanyangka. Munu minyma panya paluṟu watarku ngaṟala Godala tjapiningi tjaalytju. Ka winpinpi kutju uri-uringi, palu tjukurpa utiringkunytja wiya paluṟu wangkanyangka. Ka wati panya tjukurtjarangku Iilailu nyakula kulinu, “Nyaaku nyangatja taṟangka pitjangu. Paluṟu Godanya kuraṉi alatji pitjala?” Munu palula wangkangu, “Nyaakun taṟangka pitjangu? Utin taṟangka wiya pitjama.”
Ka minymangku wangkangu, “Wiya, ngayulu taṟangka wiya. Ngayulu tjituṟu-tjituṟurira ulara ulara pitjangu Godala tjapintjikitja ngayunya alpamilantjaku.”
Ka wati tjukurtjarangku kuliṟa wangkangu, “Palya, pukuḻpa ara, panya Godalunta tjapinnyangka kulinu mununta ungkuku.”
18-28 Ka minyma panya paluṟu pukuḻarira ma-pakaṉu munu ngurangka wirkaṟa pukuḻpa alatjiṯu nyinangi piṟuku tjituṟu-tjituṟurinytja wiya. Munu pula kuriṟara tjunguringkula pukuḻpa tiṯutjara nyinangi.
Ka panya Godalu palunya kulinu tjapinnyangka munu tjitji katja ungu. Ka palulanguṟu tjitji paluṟu puḻkaringkunyangka ngunytjungku katira ungu Iilainya, munu wangkangu, “Panya Godanyaṉa tjapiningi tjitji nyanga palumpa, kaṉi mulapaṯu ungu, kaṉa ininu Samuelnga. Munuṉa kuwari nyuntulakutu katingu, panya ngaṉmanytjuṉa tjitji nyanga palunya kalkuṉu puḻkaringkunyangka Godanya ungkunytjikitjangku nyuntula tjungungku tiinta nyanga miḻmiḻṯa waṟkarira tiṯutjarangku Godanya waḻkuntjaku.”