8
Israelkunu Tjuṯangku Mayatja Puḻkaku Godala Tjapintja
1-22 Ka ngula Samuelnga tjiḻpiringu ngura pala palula. Munu paluṟu katja kutjara kanyiningi. Ka katja nyanga paluṟu pula mayatjaringu mamaku aṟangka. Palu paluṟu pula palyanyku waṟkarinytja wiya munu kutjupangku pulanya mani ungkunyangka pula palumpa kura utintja wiyangku wantipai, munu pula alatji rawangku palyaṟa ngura kuraningi alatjiṯu.
Kaya Israelkunu tjuṯaku wati kuranyitja tjuṯa ngura kutju-kutjunguṟu tjunguringkula pitjangu Samuelta wangkanytjikitja, munuya wangkangu, “Nyuntu tjiḻpiringu, ka nyuntumpa katja kutjara wiṟuṟa nyinanytja wiya nyuntu puṟunypa. Palu nganaṉa mukuringanyi nyuntu nganampa mayatja puḻka tjunkunytjaku nganaṉanya mayatjarira kanyintjaku. Panya aṉangu ngura kutjupitja tjuṯaku mayatja puḻka tjuṯa nyinanyi. Ka nganaṉa nyara palu puṟunyku mukuringanyi.” Ka tjana alatji wangkanyangka Samuelnga kuliṟa pukuḻarinytja wiya, tjituṟu-tjituṟuringu.
Munu paluṟu Mama Godala tjapiningi. Ka Godalu ngapartji Samuelta wangkangu, “Palya nyuntu aṉangu tjuṯangku wangkanyangka wangaṉarangku kulila, panya tjana ngayula tungunpunganyi nyuntula wiyangku. Paluṟu tjana ngayunya wantira god ngalypa-ngalypa tjuṯa palyaṉu tjananya waḻkuntjikitjangku. Palu tjapila tjanala munu nguḻutjura alatji wangkara, ‘Nyaa nyurampa mayatja panya paluṟu palyalku?’ ”
Ka palulanguṟu Samueltu wangkangu tjanala Israelkunu tjuṯangka, “Mulapa nyura mayatjaku mukuringanyi? Ka mayatja nyara paluṟu tjinguṟu palya wiya nyurampa. Kulilaya! Wati kutjupangku nyurampa mayatja puḻka nyinara nyanga alatji palyalku — paluṟu nyurampa katja tjuṯa katiku warmaḻarira pikangku pungkunytjaku ngura kutjupitja tjuṯa. Ka nyurampa katja kutjupa tjuṯangku palumpa tjanampa tjuḻa waṟa tjuṯa palyalku munu kuḻaṯa tjuṯa kuḻu. Ka nyurampa katja kutjupatjara mayatja nyara palumpa kaana tjuṯangka puḻkaṟa waṟkariku. Ka nyurampa uṉṯalpa tjuṯangku palumpa mai kuka kuḻu tiṯutjarangku paulku pakuwiyangku. Ka paluṟu kaana mai wiṟutjara tjulyalku nyuralanguṟu munu palumpa maḻpa tjuṯa ungkuku, munu paluṟu nyurampa kaananguṟu mai wiṟu tjuṯa tjaraṟa mantjilku munu palumpa maḻpa tjuṯa tjara ungkukuṯu. Munu paluṟu mantjilku nyurampa waṟkaripai tjuṯa, munu nyurampa kuka wiṟu tjuṯa kuḻu paluṟu mantjilku palumparinytjaku. Ka palulanguṟu nyura uwankara puḻkaṟa tjituṟu-tjituṟuriku munu nyura wangkara Godala ngatjilku nyuranya alpamilantjaku. Palu Godalu kulilwiyangku wantiku. Kulini nyura? Nyangatjaṉa nyuranya nguḻutjunanyi kulintjaku.” Alatji Samueltu aṉangu tjuṯangka wangkangu.
Kaya aṉangu Israelkunu tjuṯangku wangkangu, “Wiya nganaṉa mukuringanyi mayatja puḻkaku nganaṉanya mayatjarira kanyintjaku, panya aṉangu kutjupa tjuṯa mayatja puḻkatjara nyinanyi, kala nganaṉa tjana puṟunypa nyinanytjikitja mukuringanyi.”
Ka paluṟu tjanampa tjukurpa uwankara Mama Godala ma-tjakultjunu.
Ka Godalu ngapartji wangkangu, “Nyuntu tjanala wangaṉarangku kulila munu tjanampa mayatja mantjila.”
Ka Samueltu aṉangu Israelkunu tjuṯangka wangkangu, “Palya uwankaraya ara maḻaku ngura walytjakutu walytjakutu.”