9
Saulanya Munu Samuelnga
1-27 Ka ngura nyara palula wati kutju nyinangi ini Kitjanya, munu paluṟu katja kutju kanyiningi ini Saulanya. Wati nyara paluṟu tangkiyi tjuṯatjara. Ka kutju-aṟa tangkiyi panya paluṟu tjana kawankatingu. Ka palumpa mamangku katjangka wangkangu, “Wati waṟka kutju mantjila munu pula ankula ngurila tangkiyi panya tjuṯa.” Palu paluṟu pula pakaṟa ankula puṯu alatjiṯu nguriningi tangkiyi panya tjuṯa. Paluṟu pula ngura tjuṯangka puṯu alatjiṯu para-nyangangi.
Ka Saulalu wangkangu, “Wantir'iyaṟali maḻaku ara. Ngayuku mama tjinguṟu watarkuringu tangkiyiku munu tjinguṟu ngalinyalta puḻkaṟa kulini.”
Palu wati panya waṟkaripaingku wangkangu, “Munta wanyu kulila wati kutjupa wangkatjara nyangangka nyinanyi. Nyara palulaya aṉangu tjuṯangku kulilpai, ka paluṟu uwankara tjukaṟurungku wangkapai. Wanyuli ara palulakutu. Tjinguṟu paluṟu ngalila tjakultjunkuku yaaltjikutungku ngurintjaku.”
Ka Saulalu wati panya palula wangkangu, “Ka ngali palula wirkaṟa nyaa palunya ungkuku ngalila tjukaṟurungku tjakultjunkunytjaku? Panya ngali yakutja uḻṯutjara. Munu ngali kutjupa kutjupa kanyintja wiya palunya ungkunytjikitjangku.”
Ka wati waṟkaripaingku wangkangu Saulala, “Nyawa, nyangatjaṉa mani tjukutjuku kanyini. Kali ungkuku wati nyara palunya, ka paluṟu ngalila tjakultjunkuku tjukaṟurungku waṉantjaku tangkiyi panya tjuṯa.”
Ka Saulalu wati panya palula wangkangu, “Ai, wiṟun kulinu. Walangkuli wanyu katira uwa kalinya nintila.”
Munu pula tawunukutu anu wati panya palunya nyakunytjikitja. Panya tawunu paluṟu puḻi katu ngaṟangi. Ka pula puḻingka ma-tatiṟa nguṟurpa nyangu kungkawaṟa tjuṯa mina tjutintjikitja pitjanyangka. Munu pula tjapinu wati panya palumpa. Kaya wangkangu, “Uwa, paluṟu kuranyuringu. Walangku pula waṉaṟa nyawa, panya paluṟu kuwari kutju ngalya-pitjangu nganampa tawunukutu, panya aṉangu tjuṯangkuya kuwari mai kuka puḻka palyaṉi Godanya ungkula waḻkuntjikitjangku. Wala puḻka pula ara, munu pula mapalku nyawa ankunytja kuwaripangka panya paluṟu ananyi Godanya waḻkuntjikitja. Palu aṉangu tjuṯaya ngalkuntja wiya palumpa paṯaṟa nyinanyi paluṟu wirkaṟa inma wangkara miḻmiḻmankunytjaku. Kaya palula maḻangka aṉangu tjuṯangkulta ngalkuṉi. Ka pula warpungkula nyawa.”
Ka Saulanya pula tawunukutu anu munu pula ma-wirkaṟa nyangu wangkatjara panya. (Palu paluṟu pula ngurkantankunytja wiya wati nyara palunya). Panya ngaṉmanytju Godalu Samuelta nintinu wati panya Saulanya paluṟu pitjanytja kuwaripangka alatji wangkara, “Mungawinki ngayulu wati kutju nyuntulakutu iyalku. Paluṟu panya Pintjimanku walytjapitinguṟu. Ka nyuntu wati nyara palunya ngurkantara mayatja puḻka nyinanytjaku ngayuku aṉangu tjuṯaku tjananya mayatjarira aṯunymaṟa kanyintjaku mirpaṉtju tjuṯangka-tawara. Ngayulu nyangu ngayuku aṉangu tjuṯa tjituṟu-tjituṟurinyangka munuṉa kulinu tjana ngayula ulara tjapinnyangka.” Alatji Godalu palula ngaṉmanytju wangkangu mungartji.
Ka Saulanya ngalya-pitjanyangka Samueltu nyangu, munu kulinu Godalu palula wangkanyangka alatji, “Nyangatja wati paluṟu, panya ngayuluṉanta ngaṉmanytju wangkangu. Nyanga paluṟu mayatjarira kanyilku aṉangu ngayuku tjuṯa.”
Ka Saulanya ngalya-ilaringu Samueltakutu munu palula tjapinu, “Nyuntu ninti yaaltjingka wati wangkatjara nyinanyi?”
Ka Samueltu wangkangu, “Ngayuluṉa wati wangkatjara. Ma-kuranyuri pula aṉangu nyara tjuṯakutu. Kuwarila nyara palula nyinanyi munula maingka tjunguringkula Godanya waḻkuṟa mai maḻa ngalkuṉi. Kaṉa mungawinki nyuntula tjakultjunanyi nyuntu panya kulintja uwankara. Wanti tangkiyi panya tjuṯa kulintja wiyangku, panya palunya tjananyaya kunyu nguriṟa nyangu. Palu wanyu kulila, Israelkunu tjuṯaya nyuntumpa mukuringanyi munu nyuntumpa walytja tjuṯaku kuḻu.”
Ka Saulalu wangkangu, “Ai, nyaakuya ngayuku mukuringanyi? Ngayulu walytja tjuṯatjara wiya. Ngayuku walytja maṉkurpa kutju, tjuṯa mulapa wiya.”
Ka Samueltu Saulanya pulanya wati panya waṟkaṟara katingu ruuma puḻkakutu munu pulanya nyinatjunu taipulangka mayatjaku aṟangka. Kaya aṉangu maṉkur-maṉkurpa nyinangi nyara palula. Ka Samueltu wangkangu wati nguratjangka panya palumpa kuka paulpaingka, “Ngalya-kati kuka panya palunya panya wangkanguṉanta mauṉṯalpa paṯaṟa tjunkunytjaku.” Ka wati panya kuka paulpaingku kuka panya tjunta mantjinu munu ngalya-katira taipulangka tjunu Saulalu ngalkuntjaku. Ka Samueltu wangkangu, “Kuka nyangatja ngalkula panya nyangatja mauṉṯalpa tjunkunytja nyuntumpa alatjiṯu.”
Munuya ngalkuṉu tjungungku tjiṉṯu nyara palula. Ka pula nyanga palula maḻangka anu Samuelku ngurakutu, munu pula wangkara wiyaringkula munga kutju ngaringu.
Samueltu Saulanya Israelku Mayatja Puḻka Tjunkunytja
Munu tjiṟirpirinyangka Samueltu wangkangu, “Pakala pula kaṉa nyupalinya katira ma-iyala.” Munuya uṟilkutu ma-pakaṟa anu Samuelnga tjana. Ka Samueltu wangkangu Saulala, “Wanyu nyuntumpa pala waṟka kuranyurira paṯantjaku witula, kaṉa nyuntula kutjungka wangka tjukurpa nyanga Godalu wangkanytja.”