Lita Iipuṟu Tjuṯakutu Iyantja
Hebrews
Nyangatja Ngaṉmanytju Nyakula Wangkanytjaku
Puṯula kulini nganalu walkatjunu tjukurpa nyangatja, panya ini kuranyu ngaṟanytja wiya Paulaku lita tjuṯa puṟunypa. Palu nintipuka tjuṯangku kulilpai tjinguṟu Paanapatjalu walkatjunu, munta tjinguṟu Apalatjalu, munta tjinguṟu Tjaalatjalu walkatjunu.
Panya Jesunya maḻaku ilkaṟikutu ankunyangka palumpa nintintja tjuṯangku Tjukurpa Palya Jesuku para-tjakultjunangi aṉangu Israelkunu Jew tjuṯangka. Kaya tjara mulamularingu Jesuku munuya palumpa walytjaringu. Kaya palunya tjananya wangkapai alatji, Jesuku walytja Iipuṟu tjuṯa, panya tjanampa wangka Iipuṟu. Kaya Jew kutjupa tjuṯangku mulamularingkunytja wiyangku wantingi panya paluṟu tjana Moseku tjukurpa kutju puḻkaṟa kulilpai Jesunya wantira.
Munuya paluṟu tjana Jesuku walytja Iipuṟu tjuṯa puḻkaṟa kuraningi Jesunya waṉannyangka, munuya puḻkaṟa mukumukuningi tjananya maḻaku pitjanytjaku tjanalakutu. Kaya Iipuṟu kutjupa tjuṯangku tjinguṟu kuliningi tjanala munuya nguwanpa maḻaku anangi aṟa panya ngaṉmanyitjangka piṟuku nyinanytjikitja.
Ka pala palulanguṟu tjukurpa nyangatja wati kutjupangku kuliṟa walkatjunu tjanampa tjananya kuṉpuntjikitjangku Jesunya wantinytja wiyangku tungun-tunguntu waṉantjaku. Paluṟu alatji tjanala wangkangi lita nyangangka,
“Aṟa ngaṉmanyitja panya Godalu Mosenya ungkunytja, nyara paluṟu unytju ngaṟangi munu puṯu aṉangu tjuṯa palyaningi tjana Godala miṟangka tjukaṟuru ngaṟanytjaku. Palu Jesunya pitjangu munu puṉu kaṯakutjarangka ilura palumpa milkaḻi tjutira aṟa kutjupa palyaṉu kuwaritja, aṟa panya ngaṉmanyitjangka waintarinytja alatjiṯu. Ka aṟa nyanga palunya waṉannyangka kutju Godalu nganaṉanya palyalku palula miṟangka tjukaṟuru ngaṟanytjaku, nganaṉa Jesuku mulamularingkunyangka.”
Ka lita nyangangka ngaṟanyi tjukurpa nganaṉa kuḻu kulintjaku panya Jesunya puḻka mulapa uwankarangka waintarinytja, ka iwara panya paluṟu aḻantja nganaṉa Godala wirkankunytjaku wiṟu mulapa ngaṟanyi iwara kutjupa tjuṯangka waintarinytja.
Tjukurpa nyanganpa ngarinyi:
1:1—2:18 Angelpa tjuṯa palya, palu Godaku katja puḻka mulapa tjanala waintaṟa.
3:1—4:13 Mosenya palya, palu Godaku katja puḻka mulapa palula waintaṟa.
4:14—7:28 Jesunya tjukurtjara puḻka nganampa nyinanyi kutjupa tjuṯangka waintaṟa alatjiṯu.
8:1—9:22 Godalu Jesulawanungku kalkuntja puḻka mulapa ngaṟanyi Moselawanungku kalkuntja puṟunypa wiya.
9:23—10:18 Christanya nganampa ngalkilpa ilura milkaḻi tjutinyangka kutju Godalu nganaṉanya kura tjuṯa palyantjitjanguṟu kalypangku wantipai
10:19-39 Palulanguṟula uti raparingkula Godala ilaringkula palula tiṯutjara tjungu nyinama
11:1-40 Ngaṉmanyitja tjuṯangku nganaṉanya nintintja Godaku rawa mulamularingkunytjaku wantinytja wiya alatjiṯu
12:1-13 Godanya nganampa mama nyinanyi munu nganaṉanya tjukaṟurulpai.
12:14-29 Godanya kuliṟa wantinytjaku-tawara
13:1-8 Aṉangu kutjupa tjuṯa mukulyangku wiṟuṟa kanyintjaku
13:9-19 Tjukurpa kurakura tjuṯa ngunti wangkara nintinnyangka kuliṟa wantinytjaku
13:20-25 Tjukurpa maḻatja
1
Godalu Nganaṉala Wangkangu Palumpa Katjawanungku
Uwa, ngaṉmanytju Godalu wangkatjara tjuṯawanungku wangkangi tjamula tjanala. Paluṟu tjuṯa-aṟangku wangkangi wangkatjara kutjupa kutjupangka, tjukurpa kutjupa kutjupa tjuṯa. Palu kuwari nyanga tjiṉṯu maḻatja ilaringkunyangka Godalu nganaṉala wangkangu palumpa katjawanungku. Panya palumpa katja kuwaripatjara mulapa nyinangi palula tjungu munu pula tjungungku uwankara paluṉu ilkaṟi, manta kuḻu. Ka katja palunya Godalu wangkara tjunu uwankara mulapa mayatjangku kanyintjaku. Godanya panya wiṟu mulapa nyinanyi pitalytji puḻkanya, ka paluṟu pitalytji nyanga palunya nganaṉala nintini panya paluṟu Mama puṟunypa alatjiṯu nyinanyi, wiṟu mulapa. Munu paluṟu manta ilkaṟi uwankara tjukaṟurungku kanyini witulya puḻkangku. Munu paluṟu nganampa ngalkilpa ilungu Godalu nganaṉanya kura tjuṯa palyantjitjanguṟu kalypangku pungkuwiyangku wantinytjaku. Munu panya palula maḻangka paluṟu ilkaṟikutu ankula Godala witulya puḻkangka tjunguringkula mayatja puḻkaṯu nyinanyi.
Uwa, paluṟu angelpa tjuṯa puṟunypa wiya. Panya Godalu palunya angelpa tjuṯangka waintaṟa tjunu puḻka mulapa. Munu angelpa tjuṯa puḻkanmankunytja wiyangku palunya kutju katjanmankula tjunu mayatja puḻka. Panya nyiringka iriti walkatjunkunytja ngaṟanyi Godalu wangkanytja nyanga alatji,
“Nyuntun ngayuku katja, kaṉa nyanganguṟu nyuntunya tiṯutjarangku katjanmankuku.” * Psalm 2:7
Ka nyangatja wanyu Godalu angelta wangkangu? Wiya, Godalu angelta nyanga alatji wangkanytja wiya. Palu paluṟunku palumpa katja kutju tjakultjunangi Jesunya. Godalu Davidala iriti wangkangi nyanga alatji,
“Palatja ngayuku katja, ka ngayulu palumpa Mama.” * 2 Samuelku 7:14
Ka nyangatja wanyu Godalu angelpa tjakultjunangi Davidala? Wiya, paluṟu angelpa wangkanytja wiya, paluṟunku palumpa katja wangkangi.
Panya palumpa katja kutjukuṟutja mantakutu iyantjikitjangku kuliṟa Godalu wangkangu alatji,
“Angelpa uwankarangkuya kulinma munuya nyanga palunya waḻkunma.” * Psalm 97:7
Palu nyaa wanyu Godalu angelpa tjuṯa wangkangi? Wiya, iriti panya paluṟu wangkanytja nyiringka ngaṟanyi tjukurpa nyanga angelpatjara alatji,
“Panya Godalu angelpa tjuṯa witulpai kutjupa kutjuparira palumpa waṟkarinytjaku,
panya waḻpa puṟunyarira munu waṟu tili puṟunyarira.” * Psalm 104:4
Palu tjukurpa kutjupa ngaṟanyi Godalu palumpa katja wangkanytja nyanga alatji,
“Nyuntun mayatja puḻka mulapa munun nyuntumpa aṉangu tjuṯa tiṯutjarangku kanyilku wiyaringkunytja wiyangku.
Nyuntu tjananya tjukaṟurungku kanyilku kuraṟa kanyintja wiyangku.
Munu tjana tjukaṟurungku palyannyangka kutju nyuntu pukuḻaripai palu kura palyannyangka nyuntu puṯu pukuḻaripai.
Ka panya nyara palulanguṟu nyuntu tjukaṟurungku kulinnyangka Godalu nyuntunya ngaṉmanytju mayatja puḻka mulapa tjunu panya nyuntumpa maḻpa tjuṯangka waintarinytjaku,
kan puḻkaṟa pukuḻarinyi.” * Psalm 45:6-7
10 Ka tjukurpa kutjupa ngaṟanyiṯu nyanga alatji Godalu wangkanytja,
“Mayatja, nyuntun kuwaripatjara mulapa uwankara wiyangka manta ilkaṟi paluṉu,
11-12 Ka panya ngula manta ilkaṟi wiyaringkuku, palu nyuntu wiyaringkunytja wiya tiṯutjara alatjiṯu nyinaku.
Wanyu kulila panya mantara aṉangitja aṉangungku rawangku kanyinnyangka kaṯakatipai ka araltjaṟa waṉipai munu kuwaritjangka tjarpapai.
Palu puṟunypa manta ilkaṟi ngula wiyaringkunyangka nyuntu ilkaṟi kuwaritja manta kuwaritja tjunkuku.
Palu nyuntu kampa kutjuparinytja wiya panya paluṟuṯu alatjiṯu rawa nyinaku wiyaringkunytja wiya.” * Psalm 102:25-27
Alatji nyiringka iriti walkatjunkunytja ngaṟanyi Godalu tjukurpa Jesunyatjara wangkanytja. 13-14 Uwa, mulapa Godalu angelta wangkanytja wiya mayatjarinytjaku, palu palumpa katjangka kutju wangkangu nyanga alatji,
“Pitja munu ngayula tjunguringkula mayatjari,
kaṉa nyuntumpa mirpaṉtju tjuṯa tjaṟulku,
ka nyuntu tjanala waintarira mayatja puḻka mulapa nyinaku.” * Psalm 110:1
Uwa, nyangatja Godalu palumpa katjangka wangkangu. Ka angelpa tjuṯa wanyu nyaa? Wiya, tjana kurunpa tjuṯa nyinanyi munuya Godanya kuliṟa waḻkulpai, ka panya tjananya Godalu wituṟa iyalpai aṉangu palumpa walytja tjuṯa aṯunymankunytjaku. Panya aṉangu palunya tjananya Godalu ngula wankaṟunkuku.

*1:5 Psalm 2:7

*1:5 2 Samuelku 7:14

*1:6 Psalm 97:7

*1:7 Psalm 104:4

*1:9 Psalm 45:6-7

*1:11-12 Psalm 102:25-27

*1:13-14 Psalm 110:1