Lita Paulalu Walkatjuṟa Iyantja Wati Ini Paalimantakutu
Philemon
Nyangatja Ngaṉmanytju Nyakula Wangkanytjaku
Wati panya Paalimannga Paulaku maḻpa mulapa nyinangi. Ka Paulalu lita nyangatja palumpa walkatjunu ngura panya Rome-ala nyinara munu palulakutu iyaṉu ngura ini Kalatjilakutu. Munu paluṟu tjakultjunangi lita nyangangka wati panya Anitjimanya-tjara, panya ngaṉmanytju Paalimantu wati nyanga palunya maningka payamilaṉu palumpa waṟkarinytjaku. Ka paluṟu tjukutjuku rawa nguwanpa waṟkarira kumpiṟa wirtjapakaṉu ngura kutjupakutu parari mulapa, munu wirkanu ngura panya Rome-ala. Ka Paulanya ngura nyara palula nyinangi munu paluṟu wati panya Anitjimala tjakultjunangi tjukurpa Jesunyatjara, ka paluṟu kuliṟa Jesuku mulamularingkula palumpa walytjaringu. Ka lita nyangangka Paulalu Anitjimaku anga-wangkangi wati panya Paalimannga palumpa kalyparingkunytjaku munu wirkankunyangka nyakula paṯaṟa pukuḻṯu mantjintjaku munu kanyintjaku palumpa ngurangka.
Tjukurpa nyanganpa ngaṟanyi:
1-3 Paulalu ngaṉmanytju wangkanytja
4-7 Paulalu Godala tjapintja Paalimanku
8-21 Paulalu wati Anitjimaku anga-wangkanytja
22-25 Paulalu tjukurpa maḻatja wangkanytja
1
Paulalu Ngaṉmanytju Wangkanytja
Walytja wiṟu! Ngayulu Paulalu kuwari nyuntumpa lita walkatjunanyi, panya nyuntu nganaṉa uwankara Jesuku waṟkaripai tjuṯa nyinanyi. Kaṉa ngayulu kuwari tjailangka unngu nyinanyi panya Jesuku tjukurpa para-wangkanyangkaṉiya witiṟa tjarpatjunu. Ka Timitjinya kuḻu ngayula tjungu nyinanyi kuwari, munuli nyanga paluṟu ngali tjunguringkula lita nyangatja nyuntulakutu walkatjuṟa ma-iyaṉi. Nyanga paluṟu panya nyuntumpa ngalimpa walytja nyinanyi Jesulanguṟu. Uwa, munu lita nyanga palunya nyuntumpa kuri Apiyala kuḻu nintila, panya nyara paluṟu kuḻu nganampa kangkuṟu nyinanyi Jesulanguṟu. Munu piṟuku nintila wati ini Akipala kuḻu paluṟu kuḻu nyakula wangkanytjaku, panya wati nyara paluṟu kuḻu Jesunya tungun-tunguntu waṉalpai nganaṉa puṟunytju. Munu aṉangu kutjupa tjuṯangka kuḻu nintila panya nyuntumpa ngurangkaya tjunguringkula Godanya waḻkulpai nyinanyi, nyara palula tjanala kuḻu lita nyangatja nyakula wangka tjana kuḻu kulintjaku.
Ka Mama Godalu Mayatja Jesulu Christalu kuḻu nyuranya pukuḻtju puḻkangku kanyinma munu nyuranya kurunpa rapaṟa pukuḻmanama.
Paulalu Godala Tjapintja Paalimanku
4-5 Ka ngayulu Godala tjapiṟa nyuntunya kuḻu rawangku kulilpai munuṉa nyuntulanguṟu Godanya tiṯutjarangku waḻkulpai, panya ngayulu kulinu nyuntu Godaku walytja tjuṯaku puḻkaṟa mukuringkunyangka, munu Mayatja Jesuku puḻkaṟa mulamularingkunyangka. Panya nyuntu kuwari tjanala Jesuku walytja tjuṯangka tjunguringkula wangkara kulilpai nyinanyi. Kaṉa palulanguṟu Godala nyuntumpa tjapini, nyuntu tjanala tjunguringkula wiṟu tjuṯaku nintiringkunytjaku, panya nganaṉa kutjupa kutjupa wiṟu tjuṯa palyantjaku ngaṟanyi Christanya pukuḻmankunytjikitjangku. Uwa mulapa nyuntu mukulyangku tjananya pukuḻmanangi Godaku walytja tjuṯa, kaṉa nyangatja kuliṟa kurunpa raparingu munuṉa puḻkaṟa pukuḻaringu.
Paulalu Wati Anitjimaku Anga-wangkanytja
8-9 Palu kulila wanyu! Tjukurpa kutjuṉa nyuntula wangkanytjikitjangku kuliningi, panya nyuntu Jesuku walytja tjuṯaku mukuringkupai. Kaṉa nyuntula purkaṟangku tjapini tjukurpa kutjupa kulintjaku munu palyantjaku.
Tjinguṟuṉa nyuntunya tjukaṟurungku wangkama, panya ngayulu Christaku walytja, ka nyuntu kuḻu palumpa walytja nyinanyi munu palula wangaṉarangku kulilpai palumpa tjukurpa kuḻu. Palu ngayulu nyuntunya purkaṟangku tjapini ka nyuntu walytjangku kulila. Panya ngayulu kuwari wati tjiḻpiringu, munuṉa puṟitjina nyinanyi tjaila unngu panya tjanaṉiya tjailangka tjarpatjunu Jesunya waṉannyangka. Kaṉa nyuntula purkaṟangku tjapintjikitjangku kuliningi. 10 Kan yaaltji kulini? Wati panyakuṉa tjapini panya nyuntumpa ngaṉmanypa waṟkaringi, wati panya Anitjimaku. Nyanga palunyaṉa tjailangka nyanga unngu nyinara nyangu, munuṉa alpamilaṉu palunya, ka paluṟu Jesuku mulamularingu, ka ngayulu kuwari palunya katjanmananyi paluṟu Jesuku walytjaringkunyangka. Wati nyanga palumpaṉa nyuntula tjapini nyanga palunya kulintjaku. 11 Ngaṉmanypa panya nyanga paluṟu nyuntula kulilpai wiya nyinangi, palu kuwari nyanga paluṟu kampa kutjuparingu munu wangaṉararingu. Munu paluṟu kuwari ngayula kulilpai nyinanyi munu nyuntula kuḻu kulilku wangaṉarangku.
12-14 Kaṉa kuliningi wati nyanga palunya kanyintjikitjangku nyangangka. Panya ngayulu puḻkaṟa mukuringanyi wati nyanga palumpa. Tjinguṟu paluṟu ngayula tjungu nyinara ngayunya alpamilanma nyuntumpa aṟangka nyinara, panya nyuntu kuwari ngura parari nyinanyi. Palu kuwariṉa palunya nyuntulakutu maḻakungku ma-iyaṉi. Panya ngayulu nyuntula-waraṟangku tjapintjikitjangku kuliningi, panya wati nyanga paluṟu nyuntumpa alatjiṯu kuwari nyinanyi ngayuku wiya. Ka paluṟu nyuntula maḻaku wirkankunyangkampa nyuntu mukuringkula palula wangkama munu walytjangku ngurkantankula palunya maḻakungku iyala ngayulakutu paluṟu nyuntumpa aṟangka nyinakatinytjaku nyangangka munu ngayunya alpamilantjaku. Uwa, ngayulu nyuntula anga-angaṟa pauntjingaṟa mayatja-mayatjangku wangkanytja wiya. Palu tjukurpa kutju nyanga palunyaṉa nyuntula tjunanyi, ka nyuntu walytjangku kulila munu ngurkantara.
15-16 Paluṟu panya nyuntunya wantikatingu munu nyuntulanguṟu anu. Palu palya, panya nyangangka wirkaṟa paluṟu kulinu tjukurpa Jesunyatjara munu kuliṟa palumpa mulamularingu. Nyanga paluṟu nyuntumpa waṟkaripai panya nyinangi munu nyuntunya wantikatingu, palu kuwari paluṟu Jesuku walytjaringu munu nyuntulakutu maḻaku wirkankuku nyuntumpa waṟkaripai kutju wiya palu Jesuku walytjaringkula paluṟu nyuntumpa kuḻu walytjaringu. Panya paluṟu kampangkaṯu kumpiṟa wirtjapakaṉu munu nyuntulanguṟu paṯu nyinanyi, palu kuwari paluṟu maḻaku nyuntulakutu ma-pitjanyi munu tiṯutjara nyuntula tjungu nyinaku mantangka munu ngula ngura ilkaṟitjangka kuḻu. Wati nyanga palumpaṉa kuwari puḻkaṟa pukuḻarinyi, ka nyuntu kuḻu palumpa puḻkaṟa mulapa pukuḻariku panya paluṟu kuwari nyuntumpa walytja mulararingu Jesulanguṟu.
17 Ka nyuntu ngayunya maḻpa wiṟu mulapa kulini. Palulanguṟu nyuntu uti wati nyangatja pukuḻṯu mantjinma nyuntula wirkankunyangka munu palunya kanyinma. Ngayulu tjinguṟu nyuntula wirkankunyangkampa nyuntu ngayunya pukuḻarira mantjilku, palu puṟunytju wati nyanga palunya mantjila munu kanyinma nyuntumpa ngurangka. 18 Mulapa panya nyuntun palunya mani puḻkangka payamilaṉu, ka paluṟu panya nyuntunya wantikatira tjituṟu-tjituṟu palyaṉu. Tjinguṟu paluṟu kutjupa kutjupa kutitjuṟa katingu nyuntumpa, kan tjinguṟu palulanguṟu nyuntunya maḻakungku payamilantjaku mukuringanyi. Palu wati palula nyuntunya maḻakungku payamilantjaku wangkanytja wiyangku ngayula ngatjila, kaṉanta ngayulu nyuntunya uwankara ungkuku, ngayuku maninguṟu. 19 Nyawa, ngayuluṉa Paulalu kuwari maṟa walytjangku walkatjuṟa kalkuṉi alatji, “Mulapaṉa nyuntunya mani panya nampa palunyaṯu ungkuku.” Palu ngayulu nyuntula ngatjintja wiya panyanguṟu, panya ngayuluṉanta Jesunya nyuntula tjakultjunu, kan palulanguṟu palumpa walytjaringu. 20 Palu ngayulu nyuntunya tjapini nyuntu wati nyanga palumpa kalyparingkula palunya pukuḻṯu maḻakungku mantjintjaku, panya nyuntu Mayatja Jesunya kulilpai kuwari nyinanyi. Kaṉa palulanguṟu kuliṟa puḻkaṟa pukuḻariku nyuntu palunya maḻakungku mantjiṟa kanyinnyangka. 21 Palu ngayulu lita nyangatja walkatjuṟa kulini panya mulapa nyuntu palyalku ngayulu nyanga nyuntula tjapintjanya munun tjinguṟu piṟuku muṉkara palyalku puḻka mulapalta.
22 Wanyu kulila! Nguratju ngaṉmanytju palyaṟa wanti ngayulu nyuntumpa ngurangka ma-pitjala ngarinytjaku, panya nyura Godala tjapiningi ngayuku, kaṉa tjinguṟu kuwari nguwanpa tjailanguṟu pakalku munuṉa nyuralakutu ma-pitjaku.
Paulalu Tjukurpa Maḻatja Wangkanytja
23 Ka wati nyanga Papaṟatjanya ngali kuwari nyinanyi nyanga tjaila unngu. Wati nyanga palunya kuḻuya Jesuku tjukurpa tjakultjunkunyangka tjailangka witiṟa tjarpatjunu. Ka paluṟu ngayula wangkangu nyuntula ma-tjakultjunkunytjaku panya paluṟu nyuntunya kulini nyuntumpa pukuḻarira.
24 Ka wati nyanganpa kuḻu kuwari nyinanyi ngura nyangangka Jesuku tjukurtjara tjuṯa wati panya Markanya, Aṟi-tjakatjanya, Timatjanya, Luke-anya tjana kuḻu. Munuya nyanga paluṟu tjana palu puṟunypaṯu ngayula wangkangu nyuntula ma-tjakultjunkunytjaku panya tjana nyuntunya kulilpai.
25 Uwa alatjiṯuṉa wangkanyi. Ka Mayatja Jesulu Christalu nyuranya pukuḻtju puḻkangku kanyinma.