1 Samuel
1
Avong provet Samuel avasi
1 Samuel 1:1-28; 2:11,19-21,26
En avong tai, en taon ten out Ramah koa mul en vatihou keil koa vi en atan ten out Efrem, meatin tai ro en out enek, isen Elkanah. Kei vi natin Seroham, koa vi natin Elihu, koa vi natin Tohu, koa vi natin Sup, koa ka en mari vatiamal onen Efrem. Elkanah retalihe ral min ahin elu, Hanah keilu Peninah. Peninah kur titiali keil ka Hanah sakras, vi lumalum.
En sua vasi keil, Elkanah ral min onen keil alokovein taon ten out Ramah ka avina en taon ten out Saeloh keke Elkanah vaha netan min ‘Iahova Sabaot’ koa aneite ten isen vi ‘Iahova, Asuv Houlu ten out nesa’ ka vasan sanien keil en usite ten onen keil mini. En out enek, pris elu lumul ien, isealu Hopni keilu Pinias koa luvi natin pris Ilae. En avong keil vasi koa Elkanah san sanien onen, musil sakien teni, hatte sani min Iahova, hatte koa sani min pris keil, ka hatte koa mun vi an. Evus, koa an, kuri ka riti vasi min koakeil aro en teim sen. Min Peninah ka natnali ka natnahin keil, kei riti mal en keil vasi. Ka koa sani min Hanah vi houlu mok, veni envatien onen mul ien mulin tateisav keil, avaseini keke Iahova ring koe keke herkurtei titiali. Peninah vit kei tahos imok muli Hanah, sakini, mules selus katiati ka mumon karien mini veni Iahova mumoni vi lumalum. Peninah mumoni mukok mini en sua vasi keil. Ka avong koa uva en Eim Tavolin onen Ahi, Peninah sakin Hanah longe tisa va vio … mis ka vit herkaniantei. Ka avong koa meatin onen, Elkanah, lesi mukok, visi vit, “?Hanah, mukave? ?Komis vensa? ?Vensa kovit kirkaniantei? Kilonge hetahos e lahruaien oralu veni koanek tahos imok mulin munak ehon keil oralu avi houlu.”
En avong tai, uva Saeloh ka asan sanien one en Eim Tavolin onen Iahova. Ka avong koa akanian evus, Hanah mea ka va en Eim Tavolin keke vahis. En avong enek, pris Ilae mul rondan en out tatondanien onen vesesal ven voiteh ka lesi. 10 Hanah longe tisa houlu, ka navong mul vis min Ahi, simeten merahrah. 11 Hanah mumon hatkatien takeih tai keih ral min Ahi vit, “!O Iahova, Asuv Houlu ten Out Nesa, kilele ka kiles inau li koa navi ahin toumien onom! Kilele ka kiles mahien keil onak eli ka em hemahis inau li. !Em navobongentei nau li! Navat kati minuk keke munak kisan titiali tai koa hehi meahos minau, inau nisan risi minuk hehi meatin votut tai onom en moulien vasi onen. Ka nitie lati hehi anatin heka en usite koa mihersouitei hilen en moulien vasi onen ka hermuntei varei oai takeih keil.”* Nam 6:1-5 viteni keke sakien koanek rie lati keke amumon hatkatien takeih keke kei hehi onen Ahi en moulien vasi onen.
12-13 Hanah mul vis mukok tuetin ka selus raeng enges. Hiliongon mum ka selusien rokistaltei eni. Sakini, pris Ilae koa mul lei mamah kati mundemi keke Hanah munmun. 14 Sakini viteni mini vit, “?Kumon sakien ten munmunien enek heha vio hetokol nengeis? !Hevus kosa! !Kiseh en munmunien onom!”
15 Ka Hanah vit risi mini vit, “O hetamen, vuo, inau narmuntei uaen vuo oai takeih. Namul nalonge tisa, ka namul navis navit lat longtisaen keil onak min Iahova. 16 Konandemtei konahit inau navi ahin tisa tai. Namul navis mukok veni tinok mah ka nalonge tisa houlu.”
17 Sakini Ilae viteni mini vit, “Kiha hetal min tomat, ka namundesini keke Ahi ten out Isrel hesan asa koa keik kovisi veni.”
18 Hanah vit risi mini vit, “Namasmasuk. Ka kindemi hetahos minau li.” Navong lokoveini va, veinan viles, longe tahos, ka kanian esuk.
19 Out mulan visokon, Elkanah ral min onen keil amea ka uva en Eim Tavolin onen Ahi. Ka avong koa uva netan min Iahova evus, uva ris teim se en taon ten out Ramah. Avong vahis muli va, Elkanah va les Hanah, ka Iahova san ui hisien onen mini. 20 Sakini en avong mal teni, kei meas ka kuri vi meahos. Evus, ling isen vi ‘Samuel’ koa aneite teni vi ‘navis Ahi veni,’ veni viteni vit, “Inau navis Iahova veni.”
21 Evus, en avong koa mal teni, Elkanah ka onen keil asak mesein keil keke iha ris en taon ten out Saeloh avasan sanien one keil koa amumoni avong tai en sua vasi. Ka Elkanah vit vasan sanien tai mun koa vat kati min Iahova. 22 Ka en avong enek, Hanah rovatei ka viteni min meatin onen vit, “En avong koa ehon enek helokovein susu omon, inau nikuri suk ka nisani min Iahova hehi Meatin Votut tai onen, ka hetos en Eim Tavolin onen Iahova. Hermaitei mun teim.”
23 Elkanah vit risi mini vit, “Tahosis. Kumoni hesuval koa komundemi. Kitos en teim heha hetokol avong koa titiali onom helokovein susu omon. Navis keke Iahova hekataunuk kovoumon asa koa kovat kat mini.” Sakini Hanah ro nges teim, ka rounat en ehon onen.
24 Sua vahis muli, ka ehon koanek ling susu omon. Sakini, mama onen kuri luva Saeloh ral min buluk tai koa meahos koa sua onen etel, bak pulaoa tai, ka veiuaen tai koa marite. Hanah kuri va en Eim Tavolin onen Iahova en out Saeloh, avaseini keke kei vi titi ehon enges. 25 Elkanah ral min Hanah lumuas buluk koanek ka lusani min Iahova. Evus, lukur titi ehon onealu ka lusa lati min pris Ilae. 26 Ka Hanah viteni mini vit, “?Keik kolei kilea nau? Anatin eli, inau etin koles nau namulomal ekok ka namul navis. 27 Navis Iahova ven ehon koanek, ka kei san ui hisien onak. 28 Sakini, kosa namul nasan risi mini, ka hel houm min Iahova en moulien vasi onen.” Evus, keitel telva netan min Iahova en out enek.

*1:11: Nam 6:1-5 viteni keke sakien koanek rie lati keke amumon hatkatien takeih keke kei hehi onen Ahi en moulien vasi onen.