Katau en avong enek, keil uva ris keke avavae vatal min me-Filistia keil. Ka navong me-Isrel keil ales keil, ametau houlu veni me-Filistia keil avi houlu ramat. Sol rosin provet Samuel vamai voumon sanien votut vahina min Iahova, hevus, uva suk en vaeen. Ka Samuel rokalahtei vamai. Sakini, Sol, kei enges, mum sasen en sanien votut koanek. Sakien koanek sakin Iahova vuroh kat Sol.

13 Navong Samuel kistal ka lesi keke Sol mumon sanien votut tuai, kei selus keih mini vit, “!Ei, komumon tounah hit kovi varu! Keik kormusiltei mengkatien keil onen Iahova koa vi Ahi onom. Munak kovousil mengkatien keil onen, kei vamaenuk ka natmali keil koa ikistal ika enuk keke mivalosil kat me-Isrel keil heha vio … keite teni hetovuol. 14 Ka kosa, losilkatien onom mai rokol keite teni veni kormusiltei selusien onen. Sakini, Iahova ling kati keke hehotin meatin etai koa rendemien ka envatien keil onen housil kat rendemien ka envatien onen.✡Umen 13:22 Vati meatin enek, Iahova helingi helosil kat meatin keil onen.” 15 Evus, Samuel lokovein Sol en out Kilkal ka musil sise va.