6
Kristin keil ikataun mesav keil
Tuak ka ahinkuli keil, munak mivotini keke tai en tuomi keil mot en tisaen, kami, koa mimusil Ninin Votut keih, miheha mihetalimal eni en sise koa hemerau enges. Ka navong mimumoni, mihelekati keke kami emun minamottei en tisaen. Mat 18:15; Tiem 5:19 Navong Kristin sav keil avotini keih en moulien one, hetahos keke mihekataun keil. Heka en sakien enek, mihoum vasin asa koa Kristo meng kat ir keke rovoumoni. Rom 15:1 Ka munak meatin tai mundemi keke kei vi hetetamen imok mulin mesav keil, kei mul luvos kei sasen ka sakras voumon etai tounah koa tahos. Hemal keke tetai en meatin keil ilei rahit sasen en sakien keil onen keke heilea munak tahos vuo tisa. Hesakini, kei kilea valonge vatahos ven sakien keil onen, ka herlei rahittei sakien onen mesav keil. 1Kor 11:28; 2Kor 13:5 Veni mal keke tetai en kami houm vasin asa koa mul en hen keke voumoni. Rom 14:12 Ka mal emun keke koakeil akur kataunien ka en hihiseien onen tiser tai isa ris kataunien heha mini. 1Kor 9:11,14
Minaluvostei kami eris, Ahi hermaentei kami minandem seseintei hiasuvien onen. Veni vi anatin keke kei helei rahit usite onen meatin vasi ka hesakin keil ian ris heite ten asa koa aluhi en moulien one. Veni meatin koa luh tisaen musil asa aven en vati, kei hean heite teni koa hehi matien. Ka meatin koa luh tahosien musil asa Ninin Votut en vati, Ninin Votut hesakini hean heite teni koa hehi moulien ten lisenges. Sion 3:6; 6:63; Rom 8:13 Sakini, avemi namahtei keke mivoumon sakien tetahos keil. Veni, munak reherlokoveintei more umen orer, reheles heite teni hekistal en avong kati teni. 2Tes 3:13 10 Sakini, en avong vasi koa ir roles ahho tai teni, ir rehoumon asa koa tahos vakataun meatin vasi keil, ka hemarite mok min koakeil koa avi tuer keil en demkatien.
Selusien ekor
11  Inau, Pol varei, namul namutis selusien ekor ekek ral min hek koa leta keil teni amariso mok mukok.
12 Kristin keil keisom koa avi Siu amul asak visi avakeih kat kami keke mivaha en vekahoi keke Siu sav keil isi keil ven umen one. Ka amul amumoni mukonek veni amundemi avit irkurtei mun sakvisien keil en hen Siu sav keil veni amul amusil Iesu koa emat en aiveave. Kal 5:11 13 Siu keil koa uva en vekahoi tuai, keil emun armusil revitei mengkatien vasi keil onen Siu keil. Ka keil e vat kami mivaha en vekahoi veni e vati avahasi keil veni min Siu sav keil. 14 Ka en usite onak, inau nihasi nau enges housil matien onen Iesu Kristo, Asuv orer. Matien onen sakin inau emun numat en usite ten tounah keil ten out netan veni usite onak tovuol ien. Ka tounah keil ten out netan irmumontei mun tounah enau, veni usite teni tovuol enau. 1Kor 1:31; 2:2 15 Ka en meten Ahi, rovitei tounah munak meatin tai va en vekahoi, vuo rovatei. Ka asa koa hetetamen imok munak meatin tai kur moulien hau vuo rokurtei. 1Kor 7:19; Kal 5:6; 2Kor 5:17 16 Koakeil amusil rendemien ekek, keil varei avi meatin keil anatin onen Ahi, ka kei hetie tomat ka more envatien min keil. Sam 125:5; 128:6
17 Ka inau nasel kat kami keke minamaentei mesav keil anaselus natisa naha kat usite onak. Veni vi inau koa nakur voneite keil ten mahien en avek ven umen onak min Iesu. 2Kor 4:10
18 Tuak ka ahinkuli keil, nasentulai min kami ral min hisien koanik: more envatien onen Ahi heto en tinomi ven asa koa Iesu Kristo, Asuv orer, mumoni en usite onami. Anatin.

6:1: Mat 18:15; Tiem 5:19

6:2: Rom 15:1

6:4: 1Kor 11:28; 2Kor 13:5

6:5: Rom 14:12

6:6: 1Kor 9:11,14

6:8: Sion 3:6; 6:63; Rom 8:13

6:9: 2Tes 3:13

6:12: Kal 5:11

6:14: 1Kor 1:31; 2:2

6:15: 1Kor 7:19; Kal 5:6; 2Kor 5:17

6:16: Sam 125:5; 128:6

6:17: 2Kor 4:10