2
Ahi maen Temat keke vasak vis Siob hatte tamun
Siob 2:1-10
1 En avong tai, en out nesa, angelo keil umai ris avati keil en meten Iahova, ka Temat emun ro ral min keil. 2 Ka Iahova visi vit, “?Keik, koka kave?”
Temat vit kesi mini vit, “Naka ko, nuva ko, ka namules naretoun en out netan.”
3 Iahova visi vit, “?Keik koles more meatin toumien onak Siob? Meatin tovuol en out netan valong kat nau ka vatahos vasuval kei. Kei mul va netan minau ka losil kat revi kei keke romumon etai tounah vatisa. Keik kovis nau mamaenuk kovapurun heisav eni enges, ka avaseini, Siob mules musil kat sakien koa mutolas en metok.”
4 Temat vit kesi vit, “Meatin tai kilea vasa lat tounah vasi onen keke vasakini vamoul. 5 Ka munak kisasa kovapurun aven, nakilea keke kosas eke, kei hesilik varei en metom.”
6 Sakini Iahova viteni min Temat vit, “Tahos, nimaeni hel en hem, ka konouasteis namat.”
7 Evus, Temat va ran Iahova ka mumon marmari manu keil akikistal ka vasi aven Siob, vatin vita rokol tinealen keilu tanetan. 8 Sakini Siob va, ka rondan en vulimeas en out amunit tahul ien. Kur sokeai koa kan ka mukal vahas manu keil onen eni.
9 Ahin onen mai ka viteni mini vit, “?Keik komules kovuli kat mormore sakien keil onom enges veah? Tahos imok kisili Ahi ka kimat.”
10 Siob vit kesi mini vit, “!Keik komul koselus suval ahin koa vi vau! ?Mukave? ?Ir koa rokur kat tounah koa tahos en hen Ahi, reherkurtei tounah koa tisa emun?” Ka avaseini keke mahien onen Siob mariso, roviten etai tounah vatisa vaha kat Ahi.
Time etel onen Siob telmai veni keke telvasan enmahisien oneatel mini
Siob 2:11-13
11 Navong longlongien usil mahien onen Siob ka vasi out, time etel telraengoni. Iseatel vi Elivas ten out Teman, Bildat ten out Suah, ka Sofar ten out Namah. Navong telraengoni, telmai en rendemien keke telvaha telvasan enmahisien oneatel mini ka telvakatauni en selusien. 12 Navong telmul semau soutin, telles Siob ka tellei rasi. Navong esuk telmai vesesal ka tellei kilea, tellonge tisa houlu ven tueatel. Sakini telmurang keih, telrali vas eisin omeatel, ka telrivin vulimeas vina en mesaiuai ka en vatiatel. 13 Telva telro sasani avong oulu (7). Telrova rantei ka telro raeng enges veni telles mahien koa Siob mul kuri marite ramat.