3
Siob run kutut min Ahi ven mahien onen
Siob 3:1-13,25-26
1 Navong aro mukonek avong oulu (7) evus, Siob selus esuk ka rin kat avong avasi eni.✡Ser 20:14-18 2 Siob vit,
3 “!Ahi li, vahit kovasesenda en vongien koa avange kat inau eni,
ka kovasesenda mun en avong koa avasi nau eni!
4 Ahi eli, avong koanek, kihiles meneai teni hemai hehi vongien.
Konandem kattei mun avong enek.
Konoumontei mun meneai natitin eni.
5 Kumoni hehi avong ten malikelik
ka mankoli teni hemai hematetel imok.
Kiov koe meteiai teni
en mahmah keil.
6 Kikulat vongien enek hemea ran sua teni,
ka konamaentei anahuli ris.
7 Kumon vongien enek hehi lumalum,
isien onen tivava hau keil hetovuol eni.
8 Koakeil akur keihoen keke avasakin Levaetan*Levaetan vi mari mesau tai suval lerumrum koa amundemi avit kilea van meteiai keke hertitintei ten avong tas. vamea ran huinev ten atas,
kihiteni min keil keke isesenda en avong avasi nau eni.
9 Hitu ten menauilan, kihuli kati natitintei,
konamaentei vongien enek namai nahi meneai.
10 Kisesenda en vongien enek veni kei maeni avasi inau eni,
ka maeni nakur moulien keke nakilea makur mahien ka malonge vatisa.
11 Tahos imok vahit mamat en vangen mama onak,
vuo mamat en hati avong enges varei avasi nau eni.
12 ?Vensa mama onak ling nau en urulin?
?Vensa san susu minau?
13 Vahit mamat tuai en avong enek,
kosa, maseh revi ka marlongtei mun mahien.
25 “Tounah vasi nametauni, umai asut inau,
asas namundemko eni, mai kistal vi anatin.
26 Narkurtei tomat, rendemien onak mul konakon,
nasakras maseh veni mahien onak sakras vavus.”
*3:8: Levaetan vi mari mesau tai suval lerumrum koa amundemi avit kilea van meteiai keke hertitintei ten avong tas.