16
Ahi vi vatte ten moulien ka kur koe ir
Asuv houlu Deved mutisi
Ahi Asuv, kikur koe inau,
namundesinuk konamaentei tounah tisa nasut nau.
Naviteni minuk keke, “Keik kovi Asuv onak.
Tounah vasi tetahos onak ka venuk.”
 
Meatin keil onen Ahi avi votut ka amoreite mok,
ek vati mok nito hetal min keil.
Ka koakeil amusil ahi sav keil
aleh mahien mai en keil.
Navong keil iha netan min ahi one, nirkapiltei hetal keil;
ka nirlah ruai tei hetal min keil navong akur sanien keil one.
 
Ahi Asuv, kosa moulien onak mules en hem;
en avong keil koa hemai, namundesinuk kisan tounah natamurei eni.
Ahi, keik kotahos komulin atan vuo tounah sav keil ten out netan koa nakur kati.
Inau nakur kat keik enges.
Ahi Asuv, namasmasuk ven korie minau asa numoni.
Ka, en vongien emun, nalei kilea sise koa mal.
Ahi Asuv, lises nalinguk mulamun enau;
veni koro vesesal, tounah tovuol vasak kulul inau. Umen 2:25-28
 
Sakini, nasi nau mok, tinok vilelau en sien,
ka metauen tovuol enau,
10 veni kokur koe nau ran keihoen ten matien.
Lises namum vasi umen koa kosani minau,
sakini, konaseseintei nau nihas en out ten matien. Umen 13:35
 
11 Kitie minau sise ten moulien.
Nalonge tahos imok ven koro ral minau.
Vesesal venuk, sien mul lisenges.

16:8: Umen 2:25-28

16:10: Umen 13:35