135
Souen ten masmasien
1 !Mihehati lat isen Iahova!
Kami koa mivi meatin toumien keil onen, mihemasmasi.
2 Kami koa miva netan mini en Eim Votut onen,
vuo mimul en teahu teni, mihehou lat isen.
3 Mihehati lat isen Iahova veni kei tahos.
Mihesau mini veni enmahisien onen mariso.
4 Rokilea keke vi anatin veni Iahova rie lat avu orer Siekob vahi onen,
ka rie lat ir, me-Isrel keil, rovahi onen kati.
5 Nakilea keke Iahova vi hetetamen imok,
Ahi orer marite mok mulin ahi sav keil.
6 En out nesa ka en out netan,
Iahova mul sakin tounah vasi mai kistal musil envatien onen.
En atas ka en huinev teni,
tounah keil koa mul kur out musil rendemien onen.
7 Kei sakin mahmah keil amuloh umai ran out keil koa soutin en out netan.
Kei mumon ahil vil en avong ten an tisa, ka lah lat eang ran out teni ka sakini muhuh.
8 En kantri ten out Isip, vi Ahi koa mu vini moeite vasi keil.
Anatin, mu vini moeite onen meatin keil ka onen buluk ka sipsip keil emun.
9 En out enek, kei mumon merikel keil ka marmari tounah keil.
Kei san mahien min asuv houlu ten out Isip, ka min avat keil onen.
10 Vi Ahi koa mu vini meatin keil ten kantri houlu,
ka mu vini asuv houlu keil koa akur keihoen.
11 Kei mu vini Sihon koa vi asuv houlu ten out Amor,
ka Og emun koa vi asuv houlu ten out Basan.
Ahi vitan en asuv houlu vasi keil
koa aro en atan ten out Kenan.
12 Atan koa kulati ran he,
kei sani suk min meatin keil onen ten out Isrel keke vahi one.
13 Meatin keil indem kat isen Iahova lisenges.
Tounah vasi keil koa kei mumoni, meatin keil ihitehiten usili en avong vasi keil koa hemai veah.
14 Ihitehiten usil Iahova veni vi eikokoe onen meatin keil onen,
ka mul rei lat enmahisien onen min meatin toumien keil onen.
15 Ahi keil onen meatin keil ten kantri savsav keil avi nana keil enges koa amumon keil en silva ka gol,
amumon keil ral min he enges.✡Sam 115:4-8; Rev 9:20
16 Amusah onge mul en ahi keil one, ka asakras avaselus,
mete mul, ka asakras avales etai tounah.
17 Ralinge mul, ka asakras avalonglong;
onge mul, ka asakras avaseh.
18 Ahi keil one avi heisav enges, ka vatte hetas en koakeil aling desien one mul en keil.
Ka koakeil akur anatin en keil emun imai ihi heisav enges.
19 Mihehati lat isen Iahova, me-Isrel keil,
pris keil onen Ahi, mihehou lat isen.
20 Mihehati lat isen Iahova, kami koa mimum en Eim Votut onen,
kami vasi koa mivouhou mini, mihou lat isen.
21 Kami koa miro en Hou Saeon, mihesan masmasien min Iahova,
min kei koa ro en out Serusalem.
!Sakini, mihehati lat isen Iahova!