1 Evus, vativar koa elim (5) en keil muh amaru onen. Navong muhi, nales angelo tatisa tai mot mita en out netan suval hitu tai. Asan mini ki ten Vulvul koa keite teni tovuol.*Vulvul koanik vi eim takeih onen ninin tisa keil navong arosin Avong ten Mari Kot onen Ahi. ✡Rev 20:1 2 Kei mai sehen Vulvul enek, ka tupas houlu kikistal ien suval tupas ten mari ahang tai. Tupas enek sakin meneai ka teilang malikelik. ✡Sen 19:28; Eks 19:18 3 Tounah keil suval kal amita en out netan ran tupas. Keil akur poisen en vatike suval skopion keke avasan mahien houlu min meatin keil navong arili keil eni. ✡Eks 10:12,15 4 Akur mengkatien keke anapurun etai oumunai, vatiai vuo tounah sav keil koa avitehiteh amoul. Ahi maen keil avapurun meatin enges koa arkurtei metai onen en veinae. ✡Esek 9:4; Rev 7:3 5 Avati elim (5), maen kal keil enek asakin meatin keil akur mahien houlu, ka anouastei keil anamatmat. Mahien enek suval mahien navong skopion rili meatin. 6 En avati elim (5) enek, meatin keil enek ilei kat matien, ka asakras avahotini; anatin, keil e hehati mok avamat, ka matien helohosai ran keil. ✡Siob 3:21; Ser 8:3; Hos 10:8; Luk 23:30; Rev 6:16

7 Kal keil enek, tounah keil mul koe ave suval hos keil koa asak mesein keil ven vaeen. En vatie, nales tounah koa suval vatluvoluv ten hiasuvien koa amumoni en gol, ka veinae, nalesi suval veinan meatin. ✡Soel 2:4,5 8 Hilie tetaveah suval hilin ahin keil, ka lohe kan suval lohon laeon. ✡Soel 1:6 9 En veimase, hilive keih suval eisin ten vaeen koa amumoni en aean. Ka navong amuka, verien ten apoue suval mari verien navong hos keil houlu amuloh aleh kat tavaeen keil uva en out ten vaeen. ✡Soel 2:5 10 Poisen one mul en vatike suval skopion, ka navong arili meatin eni, meatin longe tisa vis tisa mok. Keil uva amul arili purun meatin keil rokol avati elim (5). 11 Angelo tatisa koa losil kat Vulvul koa keite teni tovuol, kei vi asuv houlu one. En selusien onen me-Isrel keil, isen ‘Abadon,’ ka en selusien onen me-Gris keil, isen ‘Apolion’ koa aneite ten keilu vi ‘meatin tou rasilinien.’

12 !Aue li! Koanik keite ten avong tatisa tai. !Ka aue, o aue li, hekatau en koanik, avong tatisa elu mun luhemai luhekistal!

13 Evus, vativar koa ahetai (6) en keil muh amaru onen. Navong muhi, naraengon rea tai kistal ka en usite ehat (4) ten ahor ten sanien koa amumoni en gol koa mules en meten Ahi. ✡Eks 30:1-3; Rev 8:3 14 Rea enek viteni min vativar koa ahetai (6) en keil vit, “!Kiha ven angelo ehat (4) koa Ahi ling keil amules vesesal en mari Oaisal Upretis, ka kimaen keil iha!” 15 Ven hati avong enek varei, en avong kati ten avati kati ten sua kati koanek, Ahi ling angelo keil en out enek keke avatosin avong koa hemaen keil iha u vini hatte koa tai en meatin keil koa ten out netan, ka hatte koa elu en keil amules. ✡Rev 8:7-12

16-17 En leisanien onak, nalei revi en hos keil ka koakeil amuloh en keil. Meatin tavaeen keil koa amuloh en hos, nalong hulhulien ten keil vi milian handred elu (200,000,000). Eisin tavaeen one vilhili suval ahang, blu suval atas, ka okohis suval sulfa.†Sulfa vi ahat tai koa vi okohis ka merau. Navong amuniti, ahang teni mutin ramat ka tupas teni vite vo suval rolhat. Vatin hos keil asuval vatin laeon, ka ahang, tupas ka sulfa akistal ran onge. 18 Mahien keitel ten ahang, tupas, ka sulfa koa kistal ran onge mu vinvini hatte koa tai en meatin keil ten out netan, ka hatte koa elu en keil amules. 19 Keihoen onen hos keil mul en onge. Ka vatike emun akilea avapurun meatin keil veni vatike suval tetal koa vatin mul.

20 Meatin keil koa armattei veah ven ahang, tupas vuo sulfa, keil arvilestei ran sakien koa uva netan min nana keil ka tounah sav keil koa amumoni en he. Vuo, amules uva netan min ninin tisa keil ka min nana keil. Anatin, amules uva netan min nana keil koa amumonis en gol, silva, brons, ahat, ka ai koa asakras avalele, asakras avataengon tounah, ka asakras avakaka. ✡Dut 32:17; 1Kor 10:19-20; Sam 115:4-7; 135:15-17; Dan 5:23 21 Arvilestei ran sakien koa amu vini meatin sav keil, sakien ten eimas, sakien ten hoeasoen, ka sakien ten henaien one.✡Rev 16:9,11,21