1 Evus, nales angelo tai mita ran out nesa, en hen vuli kat ki ten Vulvul koa keite teni tovuol ral min sen tai koa meas ka mariso. 2 Kei vuli kat mari dragon, tetal telamu ✡Sen 3:1 koa avise en Temat, vuo Setan, ka par kati en sen koanik ten sua taosen tai (1000). ✡Rev 12:9 3 Anatin, angelo soni vita en Vulvul, koteh kat metareh teni, ka sak kati keih. Kei sakini keke Temat sakras valuvos ris kantri keil emun hetokol navong sua taosen tai heli. Ka hekatau en sua keil enek, Ahi hemaeni hemaluv eris ten avong hehi havivis. ✡2Pit 2:4; Siud 1:6

4 Evus, nales meatin keil arondan en vulin keil ten keihoen ka Ahi maen keil alei rahit usite onen meatin keil vasi. Nalesi emun koakeil koa, mulamu, ara koteh vatie veni avitehiten anatinien usil Iesu ka selusien onen Ahi. Anatin, keil enek arvatei netan min tirendan tisa vuo nana onen, ka arkurtei metai onen en veinae vuo en he. Nales koakeil enek amoul eris ran matien ka amul alosil kat out netan ral min Iesu Kristo ten sua taosen tai (1000). ✡Dan 7:9,22,27; Luk 22:30; 1Kor 6:2; Rev 13:17; 14:9,11; 16:2; 19:20 5 Koanik vi mearisien koa mulamu. Meatin savsav keil koa umat imoul eris esuk navong sua taosen tai heli. 6 Tokolkatien onen Ahi hel en koakeil koa Ahi rali lat keil ran matien en mearisien koa mulamu, ka keil irmattei mun en matien koa elu ten lisenges. ✡Rev 20:14; 21:8 Keil ihi votut ka imai ihi pris onen Ahi ka onen Iesu Kristo, ka ilosil kat out vasi hetal min Iesu sua taosen tai (1000). ✡Eks 19:6; Aes 61:6; 1Pit 2:5,9; Rev 1:6; 5:10

7 Navong sua taosen tai (1000) heli, Ahi hemaen Temat hemaluv ran eim takeih onen. 8 Ka kei heha heluvos meatin ten kantri keil en out vasi netan, houmoni en kantri ten out Gog ka Magog. Temat helah keil imai out hetas ven rea, ka keil imai ihi houlu vis ihi houlu mok hesuval veien koa mul en sisi atas keil. ✡Esek 7:2; 38:2 9 Keil imai ihilelau en out vasi ka il rahit out koa meatin keil onen Ahi umon votevav ome ien ka ikarahit mari taon koa envatien onen mul ien. Ka Ahi hesakin ahang hemita netan ran teilang nesa, hehita hean lin koakeil avi vativieh ral min keil. ✡2Ki 1:10; Esek 38:22; 39:6 10 Evus, Temat koa mul luvos keil, Ahi hesakini isoni hehita en vuli ahang koa suval ahang ten vane, out koa ason tirendan ka provet taluvosien onen luva ien. Ekonek, ahang hean keil meneai ka vongien, ka ilong mahien teni lises ka lisenges. ✡Aes 30:33; Rev 19:20; 20:15; Sen 19:24; Sam 11:6; Esek 38:22; Rev 21:8

11 Evus, nales mari vulin ten keihoen koa muoh ka nales kei koa rondan ien. ✡Dan 7:9-10; Mat 25:31-46 Out netan ka teilang nesa luva rani, luvuol ka arlestei mun keilu. ✡Sam 114:3,7 12 Ka nales meatin vasi keil koa umatmat amulomal vesesal en mari vulin ten keihoen, hetetamen keil vita rokol meatin kuren keil, koakeil amarite vita rokol koakeil avi havipi. Evus, nalesi avue tus keil koa amutis kat sakien vasi keil onen meatin retai mul ien.✡Sam 28:4; 62:12; Pro 24:12; Aes 59:18; Ser 17:10; Rom 2:6; 1Kor 3:8; 2Kor 11:15; 2Tim 4:14; 1Pit 1:17; Rev 2:23; 18:6; 22:12 Ka avue tus tamun, Tus ten Moulien, koa amutis kat isen meatin keil mul ien koa ikur moulien ten lisenges.✡Eks 32:32,33; Sam 69:28; Dan 12:1; Plp 4:3; Rev 3:5; 13:8; 17:8; 20:15; 21:27 Evus, Ahi lei rahit usite onen meatin vasi keil enek musil sakien keil one koa amutis kati mul ien. 13 Atas sa lat koakeil umat ien. Ka Matien ka Hedis, keilu mun lusa lat koakeil umat koa luvuli kat keil. Anatin, en meatin keil vasi, Ahi san mahien min keil musil asa koa keil amumoni. ✡Rev 1:18 14 Evus, Matien ka Hedis, Ahi son keilu luva en vuli ahang koa vi matien koa elu ten lisenges. ✡1Kor 15:26,55 15 Navong avuli Tus ten Moulien koa amutis kat isen meatin keil koa ikur moulien ten lisenges, koakeil arvotintei isei mul ien, ason keil uva en vuli ahang enek. ✡Aes 30:33; Mat 25:41; Rev 19:20; 20:10; 21:8; Eks 32:32,33; Sam 69:28; Dan 12:1; Plp 4:3; Rev 3:5; 13:8; 17:8; 20:12; 21:27